index
اهر چاييندان قاييدان اوشاقلار
داوود اهری

او ايستي ياي گوني، ناهاردان سونرا، 8-7 اوشاق ايديق، اهر چاييندان قاييديرديق. چاي قوروموشدي. آمما بير باغين كناريندا كيچيك گؤل وارايدي و او گوني ايكي بالاجا توسباغا، بير نئچه باليق توتموشدوق. ايكي ده‌نه سو ايلانيني دا توتوب، ديشلريني كيبريت چؤپو ايله سينديريب و دئمه‌لي الي دولو ،سئوينج ايله شه‌هره، ائولريميزه قاييديرديق.
يولدا اوشاقلارين بيريسي، ابي‌نين قارداشي دالي قالميشدي. بيردن گؤردوك قاچا-قاچا الينده بير كؤهنه كوت بيزيم طرفه گلير. ياخينلاشيب، نفس وورا- وورا دئدي:
– بو كوتو يول كناريندا تاپديم.
كوتون جيبينده بير نئچه يئر سندلري و 120 تومن ده پول وار ايدي. اوشاقلارين بيريسي گوله-گوله دئدي:
-جانا بالاخان! بو پول ايلا سينمايه گئده بيله‌ريك و هر بيريميز ده بيركوكاكولا ايچه‌ريك.
من بير آز فيكيرلشديم و دئديم:
-آي اوشاقلار! حتمن بو كوت بير يازيق كندلينين‌دير و كنده گئدنده شايد آتينين اوستوندن دوشوب.‌هارادا اولسا ايندي گله‌جك. گلين اونو گؤزله‌يك و بونلاري اونا وئره‌ك.
اوشاقلارين‌هاميسي راضيلاشيب و داها بير سؤز سؤيله‌مه‌ديلر.
بير مدّتدن سونرا گؤردوك اوزاقدان بير كندلي، باشيندا لبه دار، باشينا دؤيه-دؤيه، يئره باخا- باخا گلير. من اونون طرفينه گئديب و اونا دئديم:
– عمي جان! حتمن كوتونو ايتيريبسن. ناراحات اولما. بو سنين كوتون، يئر سندلرين و بو دا سنين پول‌لارين.
او اول سئويندي. اونلاري آلدي آمما سونرا دئدي:
– يوخ! منيم نئچه مين تومن پولوم دا كوتومون جيبينده وار ايدي. تئز اولون پوللاريمي منه وئرين.
من و اوشاقلار‌هاميميز تعجّوبله بيربيريميزين اوزوموزه باخديق و ناراحات اولدوق. عجب دردسره دوشموشدوك. بو دا بيزيم ياخشيليغيميزدان.
دئديم:
– عمي جان! دئييرسن بس بيز او قده‌ر ساده ايك كي پول‌لاري گؤتوره‌ك و بورادا سني گودك ، كي سن ده بيزيم ياخاميزدان توتاسان؟!
دئدي:
– من بونلاري بيلمه‌رم. اگر وئرمه‌سز گئده‌جه‌ييك شهرباني‌يه.
بيز دوغروسو قورخدوق. بير داشقاچي قوم گتيريردي. ياخينلاشدي. آتينين جيلووونو چكيب داياندي. من موضوعنو اونا سؤيله‌ديم. منه طرف اشاره ائله دي و كندلي عمي‌يه دئدي:
– من بو اوغلاني تانيرام. آتاسي ياخشي آدامدير. اينانماييرام يالان دانيشا.
آمما كندلي عمي بيزلري بوراخان دئييلدي و دائم آند ايچيردي.
من بير آز فيكيرلشديم. اوزومو توتدوم ابي‌نين قارداشينين اوزونه و دئديم:
– دوزوني سؤيله. پول‌لار‌هارادادير؟
آمما او بير سؤز سؤيله‌مه‌دي. بير شاپالاق. دئدي:
– منيمله گل.
گئتديك. يول كناريندا، بير باغين ايچينده بير يئرده گيزلتديگي بير دسته پولو چيخارديب، منه وئردي. گلديك. پول‌لاري كندلي عمي‌يه وئرديم. پول لاري سانادي و سئوينجك دئدي:
– چوخ ساغ اولون.
بير آز دا بيزي خئيير دعا ائديب و كنده ساري يولا دوشدي.
اوشاقلارايلا ائولريميزه ساري گئديرديك. يولدا دئديم:
– آي اوشاقلار! بيليرسينيز كي بيزلر يالنيز سينمايه گئديب، بير فيلم گؤروب و بير كوكاكولا ايچه‌جك‌ايديك و ابي‌نين قارداشي بيزلره گوله‌جك‌ايدي و يازيق كندلي عمي ده بير الي قالاجاق ايدي و بير ده تپه‌سي…!
اوشاقلارين‌هاميسي گولوشدولر. يالنيز ابي‌نين قارداشي بير سؤز سؤيله‌مه‌دن بيزدن آيريليب و فيكيرلي- فيكيرلي ائولرينه طرف يولا دوشدي …!

اهر- 11/2/77