داریخدیم بو گون
حسین امکانی

داریخدیم بوگون آی قیز!
داریخدیم او گونلریمه
ال‌لریم زیتون قوخویوردو
ساچلاریم تئل-تئل.
داریخدیم بابامین یاتدیغی توپراقلارا
یوخودا منه وئردیگی سیغارایا
کؤینگی‌نین تر قوخوسونا داریخدیم.
داریخدیم گؤزلرینی یوموب گولومسه‌مه‌سینه
یئریمه‌سینه، آیاقلارینا داریخدیم
نفسینه، سسینه داریخدیم،
یاتدیغی توپراقلاردا بیتن بوبنه‌لری قوخولادیم
داملاردا چیخان شووه‌رن‌لره گولومسه‌دیم
توپراغا توخوندوم
گونشده ویزیلدایان آری‌نی دینله‌دیم
قالخیب بو یئرلره گلدیم آی قیز، شهره گیردیم
باشی لؤلو‌ نم-نه‌لر، نم-نیه، نم-هاردا دولانیرام
سونو گلمز یوخودا بورالاردان قاچدیقجا یوخونلاشیرام بورایا
بیر نفسیمی‌درمه‌دیم
آغزیمی‌آچیب دانیشمادیم
بابام‌دان سیغارایی آلیب ایچمه‌یه ده اوتاندیم
باخدیم بو نیسگیله، باخا-باخا لذّته دولدوم.