Home / شعر / سنی دئییرلر / ایلقار موذن‌زاده

سنی دئییرلر / ایلقار موذن‌زاده

سنی دئییرلر
ایلقار موذن‌زاده

اوره‌ییمین چنلی یولون
و کؤنلومون گَدیک-گَدیک حیرانلیغیندا دولانان سنی،
منی دئییردی؛

بیر شئه‌لی حوزونو
بلکه‌ده
بئینیمین چیخماز کوچه‌لرینده دولانان چنی؛

دانیشیرکن،
دومانلی رؤیامدا
پالچیغا باتمیش آیاق یالین‌هانسی‌سا بیر خاطیره‌دن،
خییوو گئجه‌لری
و ائولرینده‌کی گیزلی-گیزلی گیزیلتی‌نی؛

دئییردی؛
ممّد بیجه‌نین آلنی قیریش یورقونلوغو
و بیجه‌یه گئدیلمه‌ین یوللارین آدرسینی؛

اصولی‌نین دَنه سَرگیسی اولان
باش‌چاهارراه‌لا آشاغی چاهارراه آراسی دولانان ایشسیزلییی؛

سنی
میللت بانکی قاباغینداکی حوسولی‌‌نین فلج آددیمینی
و ژیلِتلرینده‌ گیزلنمیش گؤزه‌للییی قییلایان
هارداسا بیر شَنی دئییردی؛

دلی قولونون
آرخلار قیراغیندا
سو شیریلتی‌سی‌نین
سس شَنلییینی،
یوخسا
ایستیکان گؤتونه‌ده اولمایان
آغیللی عسکرین
گؤزونده‌کی موبهم باخیشی،
خالیقین سنگک صَفینده بای قویولان عسکرین گؤزلویونده‌کی قیرمیزی کئشی‌می‌ایدی
کورو
کاری
اویسا کیمی‌دئییردی‌سه بیلمه‌دیم؛

دئییلمَزلر مزاری
اعتیرافین دار کوریدورلارداکی اؤلوم دانسی
پریشان سؤزجوکلرین
قولونا باغلانمیش مورفین سئروملارینی

سن
داواخانادا
نوسخه ده قالمیشدین
پارامین قالانی
و کلمه‌لر ‌آلنیندا
چارپاز یارا چسبی

قوش-قوش اَمینه‌نین قیزلیغینداکی یالقیزلیق‌‌می‌ایدی
و عَبدولون نادیری پاساژیندا‌کی تنهالیغی‌می؟
عادیلین الینده ساتدیغی قزئته‌لرینده‌کی آجی خبری‌می؟
یوخسا “سیاب”ین یوللارا سریلن گؤزلرینده‌کی اینتیظار‌می؟

شوشه‌یه بیر قان توتولموشدو
و بارماق اوجوندا
شوشه اوزه‌رینده بیر اورک شکیلی چکیردی بیر اوشاق
هموفیل دویغولارین
دایانمیر قانی دوکتور!
تبریزه‌می‌گؤتورَک خسته‌نی؟

دئییردی ‌بیریسینی‌ نه ایسه،
بلکه
اورتا چاهارراهین یورقون گون اورتالاریندا قییلانیلان “موز احسانا”نین تَرلی تکرار دورقونلوغونو
و اکبرلی‌نین کئفلی آغاجلار ساقی‌سی اولان،
ائیووللانین دولچاسی‌لا ایستیکان ایستیکانا…
لعنت یالانچیا!

سنی دئییردی،
اردبیلین حافیظ میدانیندا
گؤزلریمدن محببت ساغیردی
قیرمیزی چیراق آرخاسینداکی ساغیر اوشاق،
ساققیزلارینی
شیشیردیب
رؤیالارینی پارتلادان
آزادی‌ شهرکی‌نین یاساقلیغینی
و قیزلاری‌نین
یئددی قلم بَزَنمیش عارسیزلیغینا وورولدوغوم آخشام‌اوستوسو ایدی؛

باش آچمیردیم
کیملر کیمی‌دئییردی
آوارمیردیم
کیمی‌لری لال اول دینمه
کیمیسی‌ده کافر، دینسیز
کیمیسینه دانیش، گول، دین
کیمیسینه اوینا سیندیر؛

کیمی‌لری سنی دئسه
کیمیلری دَنی دوشو
کیمی‌لری منی دئسه
کیمی‌لری یایدا اوشو
کیمی‌لری قاردا قودور
کیمی‌لری قایدا بودور…

نه دن قالمیش دن‌قابی‌دان
نه چن قالمیش او داغلاردان
نه سن گلمیش مَنسیزلیک‌دن
نه من چاتمیش سنسیزلییین آلاچیغیندان
او بویلانان کلایغیلی قیزجیغاز؛

اینسان آدلی
ایرمی‌بیرینجی عصرین یالقیز موجودو
سنی دئییرلر…

۹۷/۰۶/۱۱-خییوو

About ایشیق

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *