سنسیزلیک‌لر(۲۵)
مجتبی نهانی

(۱)
دیبدن دیبه
دال با دال
دالدان دالا
سیچراییب، اوچماغین-
آراسینداکی بوشلوقدا
هله آغارمامیش تئلیندن توتوب
سیرتیق قورخولاریما
یئنی بازارا گلمیش_
حبّ‌لریندن وئریرم
باخ، بیردن بیره
دوشمکدن آیاقلانمیش-
بیر گونه باشلاییرام
ایپین اوجون چوخداندیر کسمیسن
ایندی دئیه‌سن آغزیمدا
قارا-آغ لکه‌لر گؤرونور
سایین سئرچی‌لر،
آلیجیلاریزا ال وورمایین…
مودئرن بیر اؤلو سفئه‌لمکده‌دیر
اندروید یاشاییشینیزین-
سون وئرژئنین
اللریزه یاپیشان-
جئب تئلئفونلاریزا یؤکله‌ییر
سیزی، چاتباش ووران-
بیر سئوگی پروقرامینا،
سرییر، سونرا بوراخیر
بلکه ال ده‌یمه‌میش یولونوزدان
ابدی ین چیخاسیز

(۲)
اللر جمهورییّتینده
سو آلتی، گؤی اوزو
یا هر هانکی بیر یئر
فرق ائتمز
بیری‌لری یوخاری چیخاجاقلار
بیری‌لری ده آشاغییا چکیلجکلر
سن نه یاخشی کی سئچکی‌سیز
اوره‌ییمده حوکومت ائدیرسن
یاشاسین یولداشلار
اؤلسون امپئریال قیسقانجلیقلار
دئمه‌دن، باغیرمادان، آرخا چیخمادان
باغریمین لاپ درینلیکلرینده
ان اوزون سئوینجیمده یاشاییرسان
اؤزگورلوک آنلامین تارتیشمادان…
نه قده‌ر سیلکله‌ییرم سولومو-ساغیمی
هایاندان اولدوغومو بیله بیلمیرم
فیکریمین تاریخی آلت-اوست اولوب
یادیما گلیر ‌پیچیلدامیشدین قولاغیما
هله من، سن بیز اولمامیشدان اؤنجه
هله نوطق وئرمک، مانیفئست یازماق
دیللره، بارماقلارا
آلیشقانلیغا دؤنوشمه‌میشدن
خاطیرلاییرام دوم-دورو سؤزونو:
اوزده دموکراسی-
دویغوسوز سئویشمه‌یه بنزه‌ییر

(۳)
اود توتوب
یانیب
کولو چیخیب
بیر کیچیک مئشه-
اوره ییمده
یانماغی چوخ یاخشی باشاریردی
سؤنمه‌یه هئچ اینانمیردی
هاردان باشلامیشدی
هاردا سونا چاتاجاقدی
بلکه زامان، اؤز ایپینی چکه‌جکدی
بیلینمیردی نه لر اولاجاقدی
یاغیشدان قاچاجاقدیق
یادا بیر یئل فیرتیناسیندا-
ایتگین دوشه‌جکدیق
قار بیزی اونوداجاقدی
یا بیز یاشیللیغی خاطیرلایاجاقدیق
بو فیکیرلر یانماغیما-
داها چوخ نفت تؤکوردو
آلوولار اویناییردی
بیر قادین یئره دوشوب-
سؤیونوردو
هر پالتاریندا گونش ایزی واریدی
تازا آیدینلانیردیم-
قارانلیق اوتاقلارین آرخاسیندان
*نیلگون دئمیشدی،
سول طرفیم آغریماسایدی
بیر قلبیم اولدوغونو بیلمه‌یه‌جکدیم.

*نیلگون مارمارا، تورکیه‌لی شاعیر

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4