ansar
اوینا، بایرام گلیر ..!
انصار قره داغلی

قوی سنین گؤزونده یاشلار آغلاسین
گؤزلرینین اوسته قاشلار آغلاسین
خسته خیالیندا قوشلار آغلاسین
او گؤز یاشلارین تک بولدور دردیمیز
اوینا، بایرام گلیر آی قده‌رلی قیز!

سنین کؤرپه قلبین آی‌دیر، آینادیر
بو گون تورک اوغلانلار «بوز قورد» اوینادیر!…
سن صغیرین پایی «تراختور»دادیر!!
آغیللی ده‌لی‌لر گئینمیش قیرمیز
اوینا، بایرام گلیر آی قده‌رلی قیز!

هارای…! مرد اوغلانلار نامرد گؤرونور!
یوخسوللار قلبینده مین درد گؤرونور
شهرده نه قده‌ر ثروت گؤرونور!!!
کندلرین قانینی سومورور تبریز
اوینا، بایرام گلیر آی قده‌رلی قیز!

خالقا خوش گلمه‌ییر من چالان چالغی!…
آمریکا قاوالی اوینادیر خالقی
قارتالام ـ دئیه‌نلر قوزقوندور، قیرقی
بَی‌لر یازیق خالقی قول ایستیر، کنیز!
اوینا، بایرام گلیر آی قده‌رلی قیز!

سن، من یاشاییشدا اولموشوق قومار
شیطان قوشونودور سرمایه‌دارلار
نه دادا چاتان وار، نه ده دیوان وار
آخیر گؤز یاشلارین، اوشویور دنیز
اوینا، بایرام گلیر آی قده‌رلی قیز!

دؤولتده اوینادیر، میللت ده بیزی!!!
بو اؤگئی روزگارین کور اولسون گؤزو
گؤز یاشین خنجردیر، یار قلبیمیزی
«انصاری» دانیشماز هئچ زامان یئرسیز
اوینا، بایرام گلیر آی قده‌رلی قیز!
۱۴/۱۲/۱۳۹۲

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4