tarlan_2
چنگیزیم!
هاشم ترلان
اوستاد عاشیق، چنگیز مهدی‌پورا اتحاف

سن دونیایا قوشا گلدین سازینلا،
دؤوران سنی اوخشامادی نازینلا،
ایندی ھنر میدانیندا یازینلا،
تهران سنین اووجوندادیر چنگیزیم،
سنین خالقا بورجوندادیر چنگیزیم!

یوردوموزون دره‌سینده، دوزونده،
نورلو گونش پاریلداسین گؤزونده،
ھر اؤلکه‌یه قدم قویسان ایزینده
آنا دیلیم لایلا دئسین چنگیزیم،
سئوینجیمی‌پایلا دئسین چنگیزیم!

سن چالاندا ناله قوپور دریندن،
اوره‌کلری اوینادیرسان یئریندن،
گؤیده اوچان دورنالاردا پریندن
له‌لک سپیر صنعتینه چنگیزیم،
ھنرینه، قدرتینه چنگیزیم!

بارماقلارین توخوناندا سیملره،
ھئچ بیلمیریک دونیا قالیب کیملره،
پرده‌لرده زیل دؤننده بملره
روح اویانیر کؤنوللرده چنگیزیم،
قلم چکیر غمه، درده چنگیزیم!

یئره باخدیم، گؤیه باخدیم اؤترگی،
دونیامیزین نه آخیری، نه ایلکی،
او سئحیرلی مضرابیندا نه وار کی
اوره‌کلری حئیران ائدیر چنگیزیم،
اوفوقلره آخیب گئدیر چنگیزیم!

چال قارداشیم نغمه‌لرین گور اولسون،
گئجه‌لرین گوندوزونده دورولسون،
او گون گلسین توی مجلیسی قورولسون،
یازا چیخسین ائللریمیز چنگیزیم،
شاققیلداسین سئللریمیز چنگیزیم!

تار اوتانار سنین سازین دیننده،
اینجه‌لیکلر وجده گلیر سیننده،
آدین، سانین کؤھلنینه میننده
کؤنوللره کمند آتیر چنگیزیم،
آیا، گونه قاش اوینادیر چنگیزیم.

سن آذری ائولادیسان، غمین کم،
شوخ آدینلا فخر ائیله‌ییر بو اؤلکم،
اوزون آغدیر، باشین اوجا و محکم،
اوغور اولسون امه‌یینه چنگیزیم،
شرف یاغسین دیله‌یینه چنگیزیم!

“فرخ”، “سولدوز” قان قارداشین سنین تک،
اونلار نغمه عالمینده بیر چیچک،
صاباح تاریخ اوزونوزدن اؤپه‌جک
باشیزا نور سپه‌جکدیر چنگیزیم،
آلنینیزدان اؤپه‌جکدیر چنگیزیم!

۲۷ آبان ۱۳۸۹ – تھران