بير باهار گونو
عمران صلاحي

بير باهار گونو, بير چيچک‎لي آغاجين آلتـيندا, لاله پارکـيندا, بير کيشي ‎کي کوتونون سول قولتوغونون جيبينه قويموشدور, نيمکتين اوستونده, بير کيشي ايله کي نظره گليردي تازا بازنشسته اولوب دانـيشـيردي:

– دوز بويورورسوز, اقتصادي  سيخينتي‎لار هميشه باعث اولوب آدام بعضي شئي‎لري زيندگانليق‎دا حذف ائله‎سين. آدام ائله‎يه بيلمز ات, چؤر‎ه‌ک و ياغ آلمايا, آمما ائله‎يه بيلر مثلن کيتابي اؤز برنامه‎سيندن حذف ائله‎يه. آدام خور‎ک يـئمه‎سه اؤلر, آمما اگر کيتاب اوخوماسا, اونا هئچ بير شئي اولماز، تازا مومکون‎دور ترقّي‎ده ائله‎يه, خلاصه لازيم اولمايان شئي‎لرين حذفي آداما ضرر وورماز.

منيم بئش قـيزيم وار. دورد اوغلان‌هاواسينا دونـيايا گليب‎لر. بئش‌ايل بوندان قاباق, اوّل‎کي قـيزيمي گره‎گ اره وئره‎يديم. آمما جئهيز آلماغا پولوم يوخ ‎ايدي. نه پس‌اندازي واريدي, نه ساتماق اوچون بير درده ديه‎ن شئي. وام آلماغا دا ايمکانـيم يوخ ‎ايدي. بير گون بو پارک‎دا اوتورموشدوم روزنامه اوخويوردوم. گؤردوم بير مناقصه آگهي‎سينده يازيب‎لار: «بؤيره‎ک آلـيريق».

اؤزومله فيکيرلشديم کي، دونـيادا چوخ‎لاري بير بؤيره‎ک‎له زيندگانلـيق ائديرلر. نييه بو آللاه وئرگي‎سي سرمايه‎دن استفاده ائله‎مه‎ييم.

بؤيره‎ک‎لريمين بيريني ساتديم, اول‎کي قـيزيمي ار ائوينه گؤنده‎‎رديم. بير ايل‎دن سونرا ايکينجي قـيزيم ارليک اولموشدور. يـئنه‌هامان پولسوزلوق‌ايدي و‌هامان چتين‎ليک‎لر. منيم آبيريم واريدي, ائله‎يه بيلمز ايديم ايکينجي قـيزيمي جئهيزسيز ار ائوينه گونده‎‎رم. يـئنه‎ بير گون بو نيمکتين اوستونده اوتوردوم و بدنين آيري يـئرلرينه فيکيرلشديم. البته او يـئرلره‎کي جوت ايدي. مثلن گؤزلريمه. اؤزوم‎له دئديم ايکي گؤزو نئيله‎ييرم. مگر گؤرمه‎لي شئي‎ ده وار؟ نييه بو قات- قاريشـيق دونـيانـي ايکي برابر گؤروم و ايکي برابر عذاب چکيم. هر نه روزنامه‎لرين آگهي‎سينه باخديم, گؤردوم گؤز آلان يوخ‎دور. اؤزوم بير آگهي وئرديم، روزنامه‎لرين بيرينده چاپ ائله‎ديلر. بير گون‎دن سونرا موشتري تاپيلدي، ايکينجي قـيزيم دا اره گئتدي. ايندي گؤزلريمين بيري شوشه‎دن‎دير.

بير ايل‎دن سونرا اوچونجو قـيزيمين نووبتي ايدي.‌هامي قاپيلار اوزومه باغلي ايدي. بيلميرديم نئيله‎يم. آز قالـيردي باغريم چارتلايا. قولاق‎لاريما فيکيرلشديم. دئديم اونلارين بيرين ساتارام, آمما کيم قولاق آلاجاق ايدي؟ چوخ مايوس پارک‎دا اوتورموشدوم, روزنامه‎ني ورق‎له‎ييرديم، گؤردوم آگهي صحيفه‎سينده يازيبلار: «بدنين هر يـئرين آلـيريق» ائله‎بيل دونـيانـي منه وئرميشديلر. تئلفون ووردوم سوروشدوم قولاق ‎دا آلـيرسيز؟

دئدي‎لر: بير نفر اونلارين موسسه‎سينه موراجيعه ائله‎ييب، دئيير کي، قولاق‎لاري‎نـين بيرين بير داوادا الدن وئريب, ايندي ائله‎يه‎ بيلمير قولاق‎سيز کيتاب اوخويا. سوروشدوم قولاغـين نه ربطي‎ وار کيتاب اوخوماغا؟ دئدي‎لر: موشتري قولاغـي بوندان اؤتورو ايسته‎يير کي عئينکي‎نين دسته‎سين قويا اونون اوستونه. تئز معامله باشا چاتدي. اوچونجو قـيزيم ‎دا ار ائوينه گئتدي. ايندي توک‎لريمي اوزاتميشام، توکموشم باشـيمين اويان- بويانـينا, بيلينمير بير قولاغـيم يوخدور.

بير ايل‎دن سونرا دؤردونجو قـيزيمين نووبتي ايدي. اوميديمي لاپ الدن وئرميشيديم. آمما دوز‌هامان وقت‌هامان موسسه‎دن من‎له تماس توتدولار کي، فوري بير سول اله احتياج‎لاري وار. سئوينجک اولدوم. داهي سوروشماديم نه اوچون ايسته‎ييرلر. تئز گئتديم بيمارستانا, سول اليمي وئرديم، اونون پولو ايله دوردونجو قـيزي ‎دا اره وئرديم. ياخچي ال ايدي. بير بارماغـي سينميشدي، آمما ياخچي ايشله‎ييردي. او تاريخدن بويانا اوزويومو ساغ اليمين بارماغـينا تاخميشام و ايندي موشتري منيم اليم‎له نه ايش‎لر گورور- آللاه بيلير.

بير ايل‎دن سونرا گرک آخير قـيزيمي اره وئره‎يديم. يـئنه‌هامان پولسوزلوق ايدي و‌هامان گرفتارچيلـيق. گلديم بوردا بو گؤلون قـيراغـيندا اوتوردوم و بدنيمين آيري يـئرلرينه فيکيرلشديم. آياغـي ساتماق اولماز ايدي. ماشـين آيناسيز و قاپي‎سيز يولا گئده بيلر، آمما تکرسيز يوخ. بورنومو دا اولمازدي ساتام, اوندا قيافه‎مي الدن وئره‎رديم. ديليمي‎ ده آلميرديلار, دئييرديلر چوخ ايتي‎دير. بير ديله احتياج‎لاري وار ايدي کي، يالاندان تعريف ائله‎سين. بيلميرسيز نه موکافات ايله آخير قيزيمي اره وئرديم. او گئتدي ائو- ائشيگي‎نين باشـينا.

آمما ايندي من اؤزوم ائودن آوارا اولموشام. آرواديم مني ائوه يول وئرمير و ‎دئيير من داهي نه اوميدله سن ايله ياشايـيم.