riyahifar
سوت گؤلو
میرحسینقلی ریاحی‌فر (موزالان)

الا ای خادم میللت آماندیر اولما غافیل‌‌ها!
الین چیخسا بو مجلیسدن اولار قلبینده نیسگیل ‌ها!
یئتیشمیش پوللاری پایلا بو دا بیر جور تیجارتدیر
بیره اون وئرمه‌یین واردیر گلن گونلر بونو بیل‌‌ها!
سحر، آخشام، گئجه، گوندوز دوعاگوی مقامات اول
گولر اوزله قوناقلیق وئر قاپیندان قاوما سائیل ‌ها!
اونوتما کدخدانی، کنده گیرمک نییتین وارسا
تزه یول گؤسترنلردی بو یئرده کؤهنه محفیل‌‌ها!
قیزیشدیر محفیلی سؤیله سیزه تای یوخدو دونیاده
بو عصرین روستمی‌سیزسیز، سیز اولساز یوخدو مشکل ‌ها!
باشاردیقجا یالان سؤیله ایچی بوش وعده وئر خلقه
اؤزون توتما بئش اون گونلوک ریایی اولسادا گول ‌ها!
یاسا باتمیش آداملارلا مچیدلر ایچره همدرد اول
بو یاسلاردان آلیب رایین آریقلار هم ده کی فیل ‌ها!
مذمت ائتمه چوخ خلقی رایین ساتدیقدا آی قارداش
یازیق خلقین الینده گؤر بازاردا بوشدو زنبیل‌‌ها!
الینده قودرتین وارسا رقیبین سرنگون ائیله
بئله ایش گؤرمه‌سن بیل کی اولارسان اوندا زائیل ‌ها!
آماندیر زنگ ائله اود سؤندورنلر تئزجه گلسینلر
یوبانسان اؤزگه‌لر بیر یول ائدرلر تیکدییین کول ‌ها!
دیلیندن اول موواظیب ‌هاردا گلدی سؤیله‌مه هر سؤز
یاشیل باشی یئله وئرمیش جاهاندا قیرمیزی دیل ‌ها!
بیلیرسن سوت گؤلونده اوزمه‌یی ‌هاممی‌دیلر آمما
باجارماق ایسته‌ییر اوزمک بوغوبدور چوخلارین گؤل ‌ها!
وکالت صندلین فتح ائله‌سن، مجلیسده آگاه اول
مبادا محروم اولسونلار گلن گونلرده فامیل ‌ها!
ائشیکده گوردویون یوخسول آداملار دردینه دَیمز
باهاریستانا گیرجک بئینیوه باخ آدلارین سیل ‌ها!
کرامت سوفره‌سیندن منعم ائت اؤز جومله یارانین
بو الطاف اولماسین خلقه سنین دؤورونده شامیل‌‌ها!
آدین اولسا وکیل بسدیر اؤزون فیکرینده اول آنجاق
گؤزل فرصتدی یاوروم بیل تاپیلماز بیرده دؤرد ایل‌‌ها!
بولودلار اویناشان چاغدا، شاخاندا گؤیده شیمشکلر
آماندیر گزمه چایلاقدا ائلی یالقیز قویار سئل ‌ها!
یئری واردیر سنه بیرده دئسین بوردا «موزالان»لار
الین چیخسا بو مجلیسدن قالار قلبینده نیسگیل‌‌ها!