گولله‌لنسین! اؤزوده، شعری‌ده!..
صابر نبی‌اوغلو

محکمه اونون حاقیندا آلتی اؤلوم حؤکمی‌بیر واختدا چیخارتدی. حؤکملردن بیری‌ده “متهم‌ین اؤز شعرلری‌ایله “خلقی موجود شاهلیق رژیمینی سارسیتماغا و اؤلکه‌ده امنیتی پوزماغا دعوت ائتدیگینه گؤره”ایدی.
–    گولله‌لنسین! اؤزوده، شعری‌ده!..

گؤره‌سن بورونلاری‌نین اوجوندان اوزاغی گؤرمه‌ین بو حاکم لباسلی مقوالار، شعر حاقیندا اؤلوم حؤکمی‌چیخارارکن، دوغرودانمی‌اونو بیر دفعه‌لیک دفن ائده‌جکلرینه اینانیردیلار؟! بلکه‌ده! فقط حیات نه غریبه استاددیر. حتی یاراتدیغی ان ناخلف، ان فراست‌سیز، ان دراکه‌سیز مخلوقلارین بئله سهولرینی دوزلتمک‌دن ارینمیر. اؤلوم جزاسینا محکوم اولونموش شعرلر بو حؤکمدن سونرا یاشاماق اوچون سانکی یئنی حقوق قازاندیلار. اونلار جانسیز کاغاذلارین صحیفه‌لریندن، انسانلارین بئیین‌لرینه، ادراک عالم‌لرینه، اوره‌کلره کؤچدولر. دیللرده، آغیزلاردا دولاشماغا باشلادیلار. اؤلومه محکوم ائدیلمیش مصراعلار دوستلارین، قدیربیلن انسانلارین سعی‌لری و اللری‌ایله سطیر-سطیر، بیت- بیت بیر یئره توپلاشدی. سن دئمه آیری- آیری ایشارتیلار ، قارانلیقلار قوینوندا بیرجه آنلیغا چاخیب- سؤنن قیغیلجیملار بیر یئره جمعلشنده گور ایشیق سئلی عمله گتیررمیش! بو دفعه‌ده بئله اولدو. اونون شعر توپلوسونا دوستلاری “ایشیق” وئردیلر. بو ایشیقلی عالمین ان پارلاق اولدوزو ایسه ظولمت دونیاسیندا گونشلی گوندوزلر، آیدین اوفوقلر آرزوسو ایله یاشایان، یوخ، تکجه آرزو ایله یاشایان یوخ، بو علوی دونیا اوغروندا گئدن مبارزه‌لرده اصیل پرومئته‌ی هنری گؤسترن علیرضا نابدل (اوختای) سیاره‌سی اولدو.

علیرضا نابدل! بیر شاعر کیمی‌ایسه او، “اوخ تای”ایدی.
بورادان باشلایاق کی، قارانلیق سئون بایقوشلار مینلر، اون‌مینلرله وطن ائولادی کیمی، بؤیوک وطنپرور علیرضانین، شاعر اوختای‌ندا عؤمرونه قصد ائتدیلر. اودلو بیر عؤمور، احتراصلی بیر یارادیجیلیق یاری یولدا قیریلدی. او سکگیز نفر مبارزه و دؤیوش دوستو‌ایله، هیمن اوخویا- اوخویا سیلاحلی جزا دسته‌سی‌نین قاباغیندا دایانماغا محکوم ائدیلرکن، هئچ اوتوز یاشی‌دا تمام اولمامیشدی. آمما کئچدیگی دؤیوش یوللاری اونو دؤنمز ایراده‌لی، زنگین تجربه‌لی بیر کوماندیر کیمی‌یئتیشدیرمیشدی. “یوخ باغلامایین منیم گؤزلریمی؛ نه قده‌ر کی قلبیم وورور، نه قده‌ر کی بئینیم دوشونور، من بیرجه آن بئله دونیایا گؤزو باغلی، کور باخماق ایسته‌میرم”!

اوختای صنعتی بیز دئیردیک کی غیرعادی بیر حیاتین غیرعادی انعکاسی‌دیر. شعرلرینده‌کی بیر قده‌ر غریبه‌لیگین، غیرعادی‌لیگین کؤکونو ده بورادا آختارماق لازمدیر. پارتیزان دسته‌سینده موقتی دینجلمک اوچون “تهلکه‌سیز” بیر کولون دیبینده، زیندانلار قوینوندا، دهشتلی ایشکنجه‌لردن سونرا قارانلیق کامئرالارین کیمسه‌سیزلیگینده، اوچان دورنالارین دسته‌سی ایکی بارماقلی باجادان سئیر ائدیلن یئرده، توفنگ قونداغی اوستونده، لال مئشه سکوتوندا یازیلمیش میصراعلارین “غریبه‌لیک”ی تعجبلومودور؟ اصلا یوخ!

باشقا مهم بیر مطلب‌ده وار.
او شعرلرینی‌می‌مبارزه ایده‌آلینا خدمته یؤنلتمیش، یوخسا یوکسک ایده‌آللاری عشقینه‌می، شاعر اولموشدور؟ بلکه‌ده دقیق صیقل‌لنمیش جوابا هئچ احتیاجدا دویولمور…
حقیقت بوندان عبارتدیر: اونون ادراک دونیاسیندا مبارزه ایله صنعت ایده‌آلی‌نین، شعرایله سیلاحین غریبه‌بیر سنتزی واردیر. آداما ائله گلیر کی‌هانسینی اونون الیندن آلسان، یئرده بیر شئی قالماز. نه شعر قالار نه سیلاح!
اوختایین صنعت دونیاسی‌نین چوخ معتبر محصولو اولان “ایشیق” آدلی شعرینی شاهدلیگه چاغیراق. او همین شعرینده بیر سیرا پئشه صاحبلرینه مراجعت ائده‌رک، اونلارا چوخ ماراقلی مصلحتلر وئریر:
–    ای قارا تئللی کبریتچی، کارخانادا ائله کبریت یارات کی، او ظولمون کؤکونو یاندیریب، یاخسین. قوی بو آلووون شعله سی ایشیغیندا دونیا بیزی تانیسین!
–    سن ای ساری تئللی زنجانلی دوست، پولاددان و پولاد کیمی‌سوموکدن ائله بیچاقلار دوزلت کی، “ییرتا بیلسین ظولمون چیرکین اوره‌یین”!
–    منیم خورما تئللی معلم همکاریم، سن‌ده کؤرپه‌لره تکجه الیفبانی اؤیرتمکله قالما. اونلارین گؤزلرینه ائله ایشیق بخش ائت کی آیسیز- اولدوزسوز آسماندا هر شئیی آیدینجا گؤره بیلسینلر.
–    گون ایشیغینا حسرت قویولان خالچاچی دوستوم. بیرجه دفعه‌ده خالچاندا ائله بیر شکیل توخو کی، باخانلارین دیزلری قوروسون. قوی خالچانی ساتان‌دا، آلان‌دا بیلسین کی، سنین دیلسیز اللرینده نه سیرلر وار. قوی بیلسین کی، دیلسیز دینسه، نه لر اولا بیلر، نه قیامت قوپار!

گؤروندویو کیمی، اوختایین تکجه “ایشیق” شعری ایله تانیش اولماقلادا اونون پوئتیک دونیاسی، حیات و صنعت ایده‌آلی حاقیندا “گول اکیب، خار درن” خالقی‌نین آپاردیغی تاریخی دؤیوشلرده شعر و صنعتین اوزه‌رینه دوشن وظیفه‌نی معین‌لشدیرمک معیاری باره‌ده قناعته گلمک چتین دئییلدیر.

بیزه بئله گلیر کی، شعر بو آلوولو وطنپروره سؤزون اصیل معنادا بیر دؤیوش سیلاحی کیمی‌لازیم اولموشدور. او، آچیق و گیزلی فعالیت دؤرونده یقین کی، داشیدیغی اودلو سیلاحیندان بیرجه آن بئله آیریلمامیشدیر. هم‌ده او بو سیلاحی‌نین دیلینی‌ده پیس بیلمه‌میشدیر. اوختای و اونون مبارزه دوستلاری اوچ نفرله بؤیوک بیر اردو دسته‌سینه قارشی دورارکن، محض اؤزلری‌نین دمیر اراده‌لرینه، عمل‌لرینین حاقلیغینا و اودلو سیلاحلارینا آرخالانیردیلار. لاکین بعضا بو سیلاحین آتش امکانلاری محدودلاشیر، اونون اودلو گولله‌لری صاحبی‌نین دؤیوش عزمینی ایفا ائتمکدن عاجیز قالیردی. محض بئله حاللاردا او، داها سرراست آتان، مانعه و سد تانیمایان سیلاحینا ال آتمالی اولوردو. اونون بو سیلاحی نه مسافه اوزاقلیغی قارشیسیندا عاجیز قالیر، نه‌هاوانین چنلی- دومانلی اولماسیندان کورلوق چکیر، نه دوشمان هدفین بلاواسیطه گؤزله گؤرونمه‌مه‌سی اونا انگل تؤرده بیلیردی. ائله حاللار اولوردو کی، نه دؤیوشچونون آچیق دؤیوشه گیریشمه‌سینه اختیار وئریلیردی، نه‌ده جبهه‌نی بوش قویماغا.

شعر سیلاحی اوختایا باشقا بیر حالدادا چوخ معتبر دوست اولموشدور. او، قیسا عؤمرونون نئچه- نئچه عزیز و معنالی گونلرینی دوشمانین پنجه‌سینده، یاغی‌لارین اسارتینده ، قوش کیمی‌دمیر قفسده کئچیرمه‌لی اولموشدور. بئله واختلاردا علیرضانین هر شئیینی  الیندن آلان دوشمان، اونون تکجه بئینینه، میصرالارینین دوغولوب اته- قانا دولدوغو پوئتیک عالمینه یول تاپا بیلمه‌میشدیر. دوغمالارینا، دؤیوش و مبارزه دوستلارینا، الی چاتمایان، اونو یئتمه‌ین شاعیر سطیرلرینده میصراعلار یووالانمیش بیرجه واراق کاغیذی حیرت‌لندیره‌جک اوستالیقلا معتبر بیر ائلچی‌یه چئویرمگه موفق اولموشدور.

بیر شئی تاسف دوغورور کی، علیرضانین ترجمه‌ی حالی الیمیزده یوخدور. یوخسا بیر سیرا شعرلرین یارانما شرایطینی، مقصد و هدفینی داها دوزگون تعیین ائتمک اولاردی. اونون عؤمور یولو چوخ غایه‌لی و رومانتیک‌دیر.
“هانکی تورپاغا” آدلی شعری 14 میصراعدان عبارتدیر. آمما بو بیر نئچه میصراع‌ایله مونومئنتال بیر حیاتین هئیکلی اوجالدیلیر:
من تابوت دئییلم!
ایچیمده هر لحظه مین اوره‌ک دیریلیر!
هانکی تورپاغا قویلایا بیله‌جکسیز منی؟
بو یولسوز کوچه‌نین بئلینده گئده‌رک
هانکی تورپاغا قویلایا بیلرسیز؟
هانکی تورپاغا،
قویلایا بیله‌جکسیز منی؟

بو اؤلمزلیک فیکری‌نین نه واخت میصرالاندیغینی دقیق سؤیله‌مک چتیندیر. بو فیکیرلر بلکه‌ده، سایجا، قووه‌جه، قات- قات اوستون اولان دوشمانلا قانلی دؤیوشلردن سونرا قیسا مدتلی فاصله زامانی شعره دؤنموشدور. بلکه، مشهور ساواک جلادی،  سونرالار اؤزونون غیرانسانی عمل‌لری اوچون لاییقلی جزا آلمیش “نیک‌طبع”ی اونون دیلینی آچا بیلمه‌یرک داها تجربه‌لی و آمانسیز ساواک وحشی‌سی “پرویز ثابتی” نین کؤمکی‌ایله اولمازین ایشکنجه‌یه معروض قالدیقدان سونرا یازیلمیشدیر؟
بو انسانلار، بو خسرو روزبه، صمد بهرنگی نسلی بو قدرتی، بو قطعیتی‌هارادان آلمیشدیلار! اونلار تاریخین چارخینی ایسته‌دیگی استقامته چئویرمک اوچون قوللارینداکی گوجو، اراده‌لرینده‌کی دؤنمزلیگی‌هارادان و نه‌دن اخذ ائتمیشدیلر؟ حیات‌دان، تاریخی ضروریت‌دن! جمعیت شاهلارین آچدیقلاری جیغیرلا یوخ، خالقین اؤز ذکاسی و الی‌ایله سالدیغی یوللا گئتمه‌لیدیر.

علیرضا نابدل بو یولون بوکولمز بیلک‌لی دؤیوشچوسو، اوختای‌ایسه اود نفسلی، پولاد میصراعلی شاعیری‌ایدی:
سازاق،
دان یئرینده
بیزی گؤزله‌ییر.
سویوق اللر ایله آچا بیلمه‌ریک
گله‌جک گونلرین قیزیل قاپیسین.
سویوق اللر ایله چالا بیلمه‌ریک
گونلرین سازیندا ظفر ماهنیسین!

سون 60-65 ایلدن بری ایران آذربایجانیندا یازیب یارادان شاعیرلرین اثرلرینده سیاسی  موتیو، سون درجه گوجلودور.
اوختایین حادثه‌لره پوئتیک مناسبتی چوخ ماراقلی‌دیر. او، گئرچک وارلیغی دویوب درک ائتمکده، خارجی عالمین حادثه‌لری آراسینداکی وحدت و علاقه‌نی کشف ائتمکده داها چوخ مجرد تفکورون کؤمکه چاغیریرسا، اوبیئکتیو وارلیقدان آلدیقلارینی، دویوب اوزه چیخارتدیقلارینی باشقالارینا تقدیم ائتمکده پوئتیک ادراکین قدرتینه سیغینیر. باشقا سؤزله ایده‌آلینی، بدیعی دوندا اورتایا چیخارتماغی مقبول یول حساب ائدیر. شاعیر اوختایین دؤیوشچو  علیرضا نابدل ایله قوووشدوغو مقامدا محض بو نقطه‌ده آشکارلانیر. بو آیدینلیق “سئوگیلیم اولارسانمی؟” شعرینده دوم- دورو چشمه سویونداکی کیمی‌بیللورلاشیر.

شاعیر یاناقلاریندان قان دامان قیزیل گوله مراجعت ائده‌رک سوروشور کی، سئوگیلیم اولارسانمی؟ جاواب آیدین و قیسادیر: منیم یاریم بولبول‌دور. منیم اوچون بولبول کیمی‌نغمه‌لر اوخویا بیلرسنمی؟ داغ‌دا همین سووالا ترددسیز جاواب وئریر: منیم سئوگیلیم داییم باشیما فیرلانان گونش‌دیر. اگر منیم اوچون گونش اولا بیلرسنسه، سنی‌ده سئوه بیلرم. چایین جاوابیندادا حیکمتلی معنا واردیر: اگر دنیز کیمی‌منی کؤکسونده یئرلشدیره بیلرسنسه، سن‌ده سئویلمه‌یه لاییقسن. گول اؤز سئوگیلیسی کیمی‌اونون سینه سینه داملا- داملا سئوینج و فرح گتیرن لئچک‌لرینین توزونو، کؤنلونون غبارینی سیلن یاغیشی سئویر.

شاعیر اولدوزلارین، آیین، بولودلارین، باتاقلیقلارین، دوزلاقلارین، دالغالی زمی‌لرین، قارانلیق دره‌لرین، کئچمز مئشه‌لرین‌ده اؤز سئوگیلری ایله یاشادیقلاری‌نین شاهدی اولور. بوتون دونیانی ایاقدان سالان شاعیر نهایت، اؤز یوردونا، دوغما یئرلره قاییدیر، آختاردیغی سئوگیلیسینی محض اؤز ائلینده، دوغما کندی اولان میلان‌دا تاپیر:
میلان‌دا بیر قیز گؤردوم
ناردان قیرمیزی گؤردوم
قاشی- گؤزو قاپ قارا
او قیزین آدی سارا….

شاعیر نه‌دن و نه مقصدله دانیشیر، دانیشسین، اونون اثرلرینین اساس جهتی انسان‌دیر. دویان- دوشونن  فرحلنمه‌یی، کدرلنمه‌یی باجاران انسان، فقط بو انسانین ان زنگین بزه‌یی آزادلیق، ان یوکسک دگری بو علوی نعمته دوغرو جان آتماق قراری‌دیر. “یورد” آدلی شعرینده مرتجع رژیمین یاراتدیغی ظولمت دونیاسیندا سانکی هر شئیین قارایا بوروندویو بیر عالم تصویر اولونور. لاکین بو ظولمت سلطنتینده‌ده شاعیر چوخ اعتبارلی و عظمتلی و ایشیق منبعی تاپیر. یوردو آددیم- آددیم گزه‌ن شاعیر، نهایت خالقین عظمت و وقاری‌نین سیمبولو اولان ارک قالاسینا چاتیر. بو اولو آبیده عصیرلرین طوفانلاریندان مردلیکله کئچیب گلدیگی، اؤزونون عظمتینی قورویوب ساخلادیغی کیمی‌گله‌جه‌یه‌ده اومیدله باخیر:
انسان محکوم اولمایاجاق
انسانیت سولمایاجاق!- دئییر

اوختایین ادراک دونیاسیندا باشقا بیر باخیشدا چوخ معنالی‌دیر. اجتماعی محیط تکجه انسانلارین طالعینه دئییل، همچنین طبیعتله انسان آراسینداکی  مناسبتلره‌ده تاثیرسیز قالمیر. بو ائله تاثیرلی بیر عامیلدیر کی، حتی عادیجه طبیعت حادثه‌سینی، بو طبیعتین بیر پارچاسی اولان بیرجه غنچه گولون، بیر اودوم سو، بیر چنگه اود، بیر چنگه اوت، بیر یاتاقلیق چایین بئله معناسینی ده‌ییشدیره بیلیر.
یاغیشین عادی داملالاری بئله شاعیرین گؤزونده چوخ معنالی و تاثیرلی گؤرونور. “یاغدی یاغیشلار” شعرینده اولدوغو کیمی.

طبیعتین عادی حادثه‌سی اولان یاغیش شاعیرین وطنینده نه غریبه ایشلر گؤرور. او “ائینالی” داغینین تورپاغیندان رنگ آلاراق بوتون تبریزی قیرمیزی‌یا بویاییر، سئیره بولبولون یوواسینی ایسلادیر، پالچیق داخمالاری لرزه‌یه سالیر، بولبولون بالاسینی یووادا اؤلدورور.

بس، یاغیشین ایسلاتدیغی یووانی کیم قوروداجاقدیر. سامانلا دولان نوودانلارین قاباغینی کیم آچاجاقدیر. پالچیق ائولری کیم سئلدن- سودان خلاص ائده‌جکدیر؟ اوخوجو بو سوواللار اطرافیندا دوشوننده سانکی کیمسه چاخان ایلدیریمین، کورلایان گویون، آشیب- داشان سئللرین دیلی‌ایله تکرار ائدیر:
–    ای اینسان، سن! سن! سن!

اوختایین‌دا صنعتی‌نین غایه‌سی او یاغمورلو، یاغیشلی گونلرده، وطن گؤیلری‌نین قارا بولودلار، اؤلکه‌نین اجتماعی و سیاسی حیاتینی قورخو، هده، تعقیب بورودویو گونلرده انسانین اؤزونو درک ائتمه‌سینده  اونون گؤزلرینه و ذکاسینا آیدینلیق نورو چیله‌مکدن عبارتدیر. بو  غایه‌نین چوخ نورلو نمونه‌لریندن بیری ائله آدیندان‌دا ایشیق سئلی شلاله‌نن “دان یئری” شعری‌دیر.

اثرین یازیلدیغی گونلرده وطن ائولادلاری‌نین قارانلیقلار سلطنتینده صاباحین ایشیقلی اوفوقلرینی گؤرمه‌لرینه بؤیوک احتیاج دویولوردو.  اؤز طالعینی خالقین، وطنین طالعیندن آیری حساب ائتمه‌ین انسان بیلیب درک ائتمه‌لی ایدی کی، حیات یالنیز محرومیتلردن، دوستونون سالیندیغی قارانلیق زیندانلاردان، عذاب و ایشکنجه دوشرگه‌لریندن عبارت دئییلدیر. خالقین آزادلیق و قورتولوش قاطاری قارشیسی آلینماز بیر سرعت و عزم‌ایله صاباحا دوغرو شوتویور. اوختای و اونون قلم دوستلاری‌نین ان گؤزل جهتلری او صاباحین قیزاران اوفوقلرینی داها آیدین گؤرمه‌لرینده‌ایدی.
آییق قالدیق بو قارانلیق و اولدوزسوز گئجه‌ده بیز،
یورولمادان دیکیلیبدیر
دان یئرینه گؤزلریمیز.
آییق قالیب گؤزله‌ییریک:
–    یوردوموزدا گؤرن‌هاچان دان سؤکولو؟
قوی سوواراق قانیمیزلا بو سعادت نهالینی
غنچه‌لنیب قوی آچیلسین
اوجا داغلار ذیروه‌سینده
دان یئری‌نین قیزیل گولو!

اوختایین یارادیجیلیغیندا معاصر دؤور اوچون خصوصیله مهم اهمیت کسب ائدن چوخ مهم بیر پروبلئم اولدوقجا پاک و صمیمی‌مناسبت واردیر. بودا عینی دؤیوش سنگرینده بیرلشن مختلف خالقلار آراسینداکی دوستلوق و قارداشلیق علاقه‌لری‌دیر. بو، شبهه یوخدور کی، حیاتین اؤزوندن قیدالانان بیر ایده‌آلدیر. سون اون ایل‌لیک‌لرین دؤیوش و مبارزه سنگرلرینده فارس و آذربایجانلی، کورد و ائرمنی، تورکمن و عرب وطنپرورلری‌نین قانلاری شاه دئییلن جلاد و اونون ساواک‌دان اولان انسان سیمالی وحشی‌لری طرفیندن عینی آمانسیزلیقلا آخیدیلمیشدیر. بو قانلار معتبر بیر اؤزول کیمی‌مختلف ملت‌لردن اولان مبارزلرین دوستلوق قالاسینی داهادا مؤحکم‌لندیرمیش و خالقلاری بیر- بیرینه داهادا یاخینلاشدیرمیشدیر. لاکین بورادا اینجه بیر مطلب‌ده واردیر. مسئله تکجه بو خالقلارین دوستلوق و قارداشلیغینی قبول ائتمکده دئییل. اصل مطلب بو اتفاق و قارداشلیغین مقدس پرنسپلرینه نئجه عمل ائتمکدن، اونا‌هانسی حس‌لرله یاناشماقدان عبارتدیر.

علیرضا نابدل‌ین “ایشیق” آدلی کتابیندا خالقلار دوستلوغونا حصر ائدیلمیش اثرلر کمیت اعتباریله او قده‌رده چوخ دئییلدیر. لاکین بو شعرلرده دوست خالقا محبتله دؤیونن شاعیر قلبی‌نین تمیزلیگینه حیران قالماماق اولمور.
بو د اغلار اوجا باش!
اوجا باش د اغلارا قانلی چکمه‌لر یول آچا بیلمز!
بو داغین جئیرانی اؤزگه اووچونون اوونا گلمز!

قارداش کوردوستانین عظمت و ووقاری، دؤیوش و مبارزه روحو، عرض و ناموسو، وطن و آنا مقدسلیگی بو اوچ‌جه میصراعدا نه اوستالیقلا اؤزونون بدیعی عکسینی تاپمیشدیر. اوچ‌جه میصراعدا کوردوستانین الاهی گؤزللیگی حاقیندا:
آخشاملار هر قوش قوشور مین داستان …
بو لایلای سسیله آستاجا- آستاجا
یوخویا گئدیر گؤزه‌ل کوردوستان.
بیر آغیز نغمه‌ده ایکی خالق آراسینداکی مناسبت باره‌ده :
بو داغلار قوجا باش، ائللری اوجا باش
هامی‌یا بیر دوست، بیزلره قارداش
یانار اودلارا بیرلیکده یانان وفالی یولداش.

اؤز دؤرونون ان نادر سیمالاریندان بیری‌ده، صمد بهرنگی اولموشدور. آذربایجان خالقی‌نین بو عالم، متفکر یازیچی، معلم اوغلو اؤز حیاتینی دوغما خالقین بالالاری، انقلابی مبارزه اوچون آلوولانان مشعله چئویرمک اوچون اصل فرهاد هنری گؤسترمیشدیر. علیرضا نابدل بیر وطنپرور کیمی‌بؤیوک معاصری‌نین ایده‌یالارینا درین حؤرمت بسله‌میش، صمد بهرنگی مکتبینه منصوب اولماغی‌ایله فخر ائتمیشدیر. ساواک جلادلاری تاریخی جنایته ال آتاراق بهرنگینی خایینجه‌سینه تلف ائتدیلر. آرازین بولانا- بولانا، بورولا- بورولا آخان گور سولاری بو خیانتی هنچ واخت اونوتمایاجاقدیر. علیرضا نابدل بؤیوک اوستادی حاقیندا قوشدوغو ماهنینی آرازین اعتراض روحلو، نهنگ قدرتلی نغمه‌لرینه قوشماقدا گؤزه‌ل نمونه گؤسترمیشدیر:
نگران قالماسین اولدوزا دئیین
کؤنلومه آلمیشام صمدین عشقین
“صمد” کؤنلومده‌دیر، اوره‌ییمده‌دیر
“وورغون”ون آداشی جییه‌ریمده‌دیر
انتقام آلاجاق ائل دوشمنیندن!

چوخ کؤورک بیر جهت. اوختای پولاددان تؤکولموش اراده‌یه، مبارزه دؤیونتولو قلبه مالیک اولسادا، عؤمرونون معناسینی، خالق اوچون، وطن اوچون یانماقدا گؤرسه‌ده، عادی انسان‌ایدی. سئویب، سئویلمه‌یین علویتینی، پاک محبتین قدرتینی بوتون عظمتی و سیقلتی‌ایله دویوب، درک ائدن شاعیر، آغیر دؤیوشلردن فرصت تاپدیقدا، یاد گؤزلردن کناردا، بیر چای آخاریندا، بیر آیلی گئجه‌ده، بیر خان چینارین کؤلگه‌سینده، بیر چوبان توته‌یینین سسیندن قوپان ماهنی‌لارین چکیب آپاردیغی گؤزللیک عالمینده، اودا سئودیگی ساراسی‌نین جان آلیجی قارا گؤزلرینین اسارتیندن خلاص اولا بیلمه‌میشدیر. اونون دؤیوش سنگرلرینده آغلاییب سیزلاماق بیلمه‌ین قلبی‌نین‌هاراسینداسا سارانین محبتی باش قالدیرمیش، بوتون وارلیغینا حاکیم کسیلمیشدیر:
نولاردی سن قویایدین کی،
داملا- داملا ارییه‌ایدیم سو اولایدیم
دؤشونده‌کی قیزیل گولو ایسلادایدیم
گؤزه‌ل سارا
سنی تاری
گئده- گئده دالا باخما
گؤز یاشیمی‌گؤرمه باری….

اوختایین شفاهی خالق شعریندن، فولکلوردان استفاده ائتمکده، بو توکنمز ائل ثروتیندن فیدالانماقدا اؤزونه مخصوص شاعیر سلیقه‌سی و صنعتکار ذووقو واردیر. تکجه اوراسینی قئید ائده‌ک کی، اونون شعرلرینده بو بهره‌لنمه‌نین‌هارادا باشلاییب،‌هارادا قورتارماسینی معین‌لشدیرمک چتین‌دیر. بوراسی آیدین‌دیر کی، او خزینه‌ده اولان حکمت دونیاسی قطره- قطره، داملا- داملا اوختایین شعرلرینه هوپاراق، بو اثرلره بیر آخیجیلیق، حکمت آشقاری، تاثیرلیلیک گوجو بخش ائدیر. “من کیچیک بیر چردک‌ایدیم” شعرینده خیرداجا بیر تومجیغاز تورپاغا دوشندن قوللو- بوداقلی قیزیل گوله چئوریله‌نه‌دک اؤز حیاتینی دانیشیر. اؤزوده باخ بو آهنگ اوسته:
او یانا قاچدیم سیخدیلار
بو یانا قاچدیم ییخدیلار
اؤلوم منه چاتمادی
آغ بولودلار یاتمادی
جانلادیم یول ایسته‌دیم
تورپاقدان قول ایسته‌دیم
قول- قاناد وئردی تورپاق
قانادلاندیم اوچماغا
حیات یولون آچماغا….

علیرضا نابدل (اوختای) قیسا مدتلی عؤمرونو مشعله چئویریب قارانلیقلار ایچه‌ریسندن گله‌جه‌یه یول آچانلارین سیرالارینا قوشولدو. آلوولاندی، نور ساچدی. سؤندو…
یوخ، سؤنمه‌دی! اودونو، آلووونو زرتشت بابانین آلیشدیردیغی ابدی آتشدن، گوجونو، قووه‌تینی خالق دئییلن نهنگ اوکئیاندان آلان بیر اوجاق‌دا سؤنرمی؟!
نه یاخشی کی، او هم‌ده شاعیر‌ایدی. دؤیوش و مردلیک ماهنیلاری بسته‌له‌ین شاعیر! وارلیغی‌نین بیر پارچاسینی، حیات و انسانلار حاقیندا کی گؤزه‌ل آرزولارینی اودلو میصراعلارا چئویردی. او علیرضا نابدل کیمی، خالقین ابدیته قوووشان اوغول‌لاری‌نین مقدس معبدگاهیندا، شاعیر اوختای کیمی‌یاراتدیغی میصراعلارین قوینوندا اؤزونون ایکینجی عؤمرونو خزانسیز، زوالسیز عؤمرونو یاشاییر…