ansar chobanogluسئرچه و داغ سیچانی
انصار قره‌داغی

باهارین سون نفسی‌یله وداعلاشیردی دوغما طبیعت. منه ائله گلیردی کی داغلارین کیرپیک‌لری یاشالمیش، آنجاق دوماندان ساغیلان سیرریلی نارین داملالارا شئح دئییردی‌لر.
کهر آتین یال – قویروغونون توکونو بیر کلک ایله توپ- توپ سیخیلمیش، آلچاق بوی قوجا آلچا کولونون چئوره‌سینه کیم کسیب سپه‌له‌دیسی، زامانی ایله بللی دئییل ایدی.
زامانلارین گئدیشاتیندا اسن یئللر کهر آتین کسیلن ساچلاریندان دوگونلو – دوگونلو جله‌لر هؤرموشدو.
بیر داغ سیچانی ائوینی – یوواسینی همان توک‌لرین جله‌لی اورتالیغیندا امین – آمان یاپمیشدی، بو ایش اونون اوچون هر اطرافلی قازانیردی؛ او توک‌لرله ائو – ائشیگینی مبلمان قیلمیشدی تا کی کؤرپه بالالاری صاباحلارینا دینج – دینج گؤز آچسینلار، بیرده کی قان- قادالی قیرقی‌لار و ستم دیمدیکلی سئرچه‌لر اونون کؤرپه بالالارینی حیات اوفوقوندا هلاک قیلماسینلار.
داغ سیچانی یئنیجه بالالامیشدیر، اونون لوم- لوت بالالارینین گؤزلری هله آچیلمامیشدیر.
او داغ سیچانی هانسی بیر سئودا و هوسله بالالارینا سود وئردیسی منیم حس‌لریمدن داها اوزاق و غریب اولا بیلیردی.
کیلکه‌میش توم- توپ قوجا آلچا کولو‌نون باغرینا ائله دوغما – دوغما سیخینمیشدیر کی فصیل‌لرین شاختالی کوله‌ی‌لری اونون جانینا آجی نئشتر یئریده بیلمیردی.
همن او آلچا کولو کلکین باغرینا کولک‌لر الینده‌ن سییخیلمیش و سئرچه آلچا کولوندا یووا قورموش. آلچا کولونون نارین بوداقلاری و تیکانلاری ائله کیپ-کیپ کیپه‌لمیشدی کی، هئچ بیر قیرقی و هئچ چالیجی ایلان او سئرچه‌نین یوواسینا یول تاپا بیلمیردی.
سئرچه‌نین بالالاری یئنیجه یومورتادان چیخمیشدیلار، بلکه‌ده سیچانین بالالارییلا بیر گونده حیات قوخوسونو آلاراق دونیایا گلمیشدیرلر، آخی اونلاردا لوم- لوت اولاراق کؤینکسیز‌ایدی‌لر و گؤزلری هله آچیلمامیشدی.
او سئرچه هاردانسا بالالارینا یئمک داشییردی، او هر دؤنه کی آغزیندا خوخولجان یا هابئله قورد و… یله یوواسینین سقفینه قونوردو، اونون بالالارینین هر بئشیده لوت بویونلارینی یوخاری اوزاداراق آغیزلارینی گئن – گئن آچیردیلار تا کی آنالاری اونلارا سود یوخ، بلکه یوموشاق – یوموشاق یئمکلردن یئدیرتسین.
آنا سئرچه یئمک داشیماقدان یورولموردو؛ او، قونشولوق حؤرمتینی قورومادان سیچانین یوواسینا گؤزلرینی ائله زیلله‌دی و تیکدی کی یازیق سیچانین اوره‌یی اوزولدو. آنا سئرچه بیر باش قیلینجینی یازیق سیچانین اهل – عیالینین اوستونه چکه‌رک ، اونون یوواسینا هیجوم قیلدی!.
آنا سیچان یوواسینین آغزیندا آغزینی گؤیه دوغرو آچیب – یوما، اوره‌یی قورخا – قورخا بالالارینین پرستارلیغینا دؤنوبن اونلاری قوینونون سقفی آلتینا آلدی!.
آنا سئرچه سیچانین یوواسینین آغزیندا چیغیر – چیغیر چیرپینیردی کی، اونون آیاغینین بیریسی جله‌یه گئچدی!… اولسون کی قاناتلاری آزاد و سربست ایدی، آنجاق آیاق باغلی اولورسا آزاد قانات اوچا بیلمز.
آنا سئرچه قصدیندن دؤنه، قورتولوشونا جهد قیلدی؛ هارای‌لارینی آسمانلارا بوراخدی.
او هر دؤنه چیغیردیقجا بالالاری یئمک قصدی ایله آغیزلارینی گؤیه آچیردیلار !… آنجاق آتالار دئمیشکن: «گئچی جان هاییندا، قصابین کؤنلو پی آختاریر».
سئرچه اؤز جانینین هاییندایدیر، دویغولارا ائله سیزیردی کی آنا سئرچه پام- پاک بالالارینی اونوتموش اولسون.
آنا سئرچه بلکه آنا سیچانا یالواریردی کی کؤرپه بالالارینا خاطیر اونو او تهلکه‌دن قورتارسین!.
قورخولار آنا سئرچه‌نی اطرافلی قرارلاییردی…؛ بیر بوز ایلان کله‌یین جیریغیندان باشینی قووزایاراق آنا سئرچه‌نین شیکارینا اندیشه‌له‌نیردی، بیر چالیجی قیرقی ایسه گؤی اوزره دولاناراق آنا سئرچه‌نین سسلرینه هدفلرینی گئدیردی.
قیرقی گؤی اوزوندن، ایلان ایسه یئردن آنا سئرچه‌یه هیجوم قرارینا گلیردیلر؛ آنا سیچان قیرقی ایله ایلاندان خبرسیز سئرچه‌نی یان قیلماق قرارینا دورموشدو؛ جله‌لری کسگین دیش‌لری ایله چئینه‌ییب بیر- بیر آچیردی، اولسون کی آنا سئرچه ایلان‌لا قیرقی‌دان قورخوردو، آنجاق آنا سیچان اونلارین هر اوچوندن قورخوردو، امما او ایکی دوشماندان خبرسیز‌ایدی!…
آنا سیچان جانینا ال قاتیب آنا سئرچه‌نین آیاغینا باغلی اولان جله‌نی چئینه‌ییب آچاراق اونو قادا – بلادان قورتاردی!….
آنا سئرچه قورتوراراق اوچوب گئتدی یوواسینین سرچینینه قونوب دینجلدی. آنا سیچان ایسه یوواسینا دؤنوب – دؤنمو‌یه، ایلانین زهرلی دیش‌لرینین اورتاسیندا سیخیلیب جان وئردی….!
آنا سئرچه هئچده اونون یاردیمی قرارینا قانات چالمادی…! او بلکه اؤز خیلاص‌لیی سئوینجینه دینج – دینج نفسلرینی دردی.
آنا سیچان جانینی بالالارینا قوربان وئرمیشدی. زامان دورمادان اؤز یولونو توتوب گئدیردی؛ ایلان گؤی اوزره قانادلانان قارانقوشو دویاراق اؤز یوواسینا دؤنموشدو، قیرقی پروازلارینی اوزاقلارا آپارمیشدی. قالمیشدی سیچانین یئتیم بالالاری، بیرده کی بالالی سئرچه….!
آنا سیچانین یوواسینین اطرافیندا اولان جله‌لرین دوگونو آچیلمیشدی. سئرچه‌نین دویغولاری ایله نفسی اورتالیغیندا بیر ظفر و بیر خطر طوفانلانیردی؛ آنا سئرچه داها سسسیزجه‌سینه سیچانین یوواسینا دؤنه، هئچ بیر قوروق ایله قارشی- قارشی اولمادان سیچانین یئتیم بالالارینی دیمدیگینه آلاراق اؤز بالالارینین آج قورساغی اوچون اونلارین حیاتینا سون بیتیردی….!!! آتالار دئمیشکن«قاری دوشمان دوست اولماز».
بلکه‌ده اوچونجو دوشمان آناسیچانین ارینی داغین بیر بوجاغیندا هلاک قیلاجاق….!

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4