دؤنوش
قاسیم پناهی – (ایکینجی بؤلوم)

قاپی تاراق‌لا باغلاندی. رامیز قاپییا ساری دؤنونجه کامیون‌لا توققوشان آدام کیمی‌توللانیب دیوارا زوپاندی. الینده‌کی فنرله توفنگین هره‌سی بیر یئره دوشدو. فنرین ایشدن دوشمه‌سی ایله داخما ظولمت خانایا دؤندو. یئشیگه ساریدان قاه_قاها سسی یوکسَلدی. سونرا سس گلن یئردن آلوو قالخیب یاواش_یاواش کیشی گؤوده‌سینه دؤندو. رامیز قیمیلدامادان دوشدوگو یئردن اولان‌لاری ایزله‌ییردی. بنیزی آغ_آپباق اولموشدو. اؤزونو دبرتمک ایسته‌سه ده توخانان ووروش اونون عَضَله‌لرینی کئییده‌جک قدر برک ایدی.
کیشی بوغونوق سس‌له بیر نئچه دؤنه _ سن سونونجوسان _ دئیه‌رَک باغیردی. آلوو گئتدیکجه سؤنمه‌گه باشلادی. سؤندوکجه ده اوندان یارانان کیشی نورمال بیر اینسان کیمی‌گؤروندو. اوستونده قارا دری‌دن تیکیلمیش پاپاقلی بورونجک وار ایدی. پاپاغی بورنونون اوجونا قدر اوزاندیغینا گؤره اوز_گؤزو گؤرونموردو. آنجاق بئلینین دونقاسینی گؤرمک اولوردو. رامیزه یاخینلاشماق ایسته‌دی. سول قیچینین آخسادیغیندان سنده‌له‌سه ده الینده‌کی خاچا بنزر آغاج‌لا قولچاق قالدیریر کیمی‌اونو یئردن قالدیریب آیاق‌لاری اوستونده دایاندیردی. سونرا سول الی ایله بوغازیندان یاپیشیب یئشیگه ساری سورودو. دیوار بویونجا اوزانان لمه‌نین قارشیسیندا یئنیدن اونو دیوارا زوللادی. رامیزین باغری یاریلمیشدی. نه دیلی سؤز توتوردو نه ده گؤوده‌سی اؤز ایختیاریندا ایدی. فیکریندن بوتون وارلیغیلا باغیریب ‘ یاردیم ائدین’ چاغیرماق کئچیردی آنجاق هر نه ائتسه ده دوشوندوگونو دیلینه گتیره بیلمیردی. سانکی دوداق‌لارینا قیفیل وورولوب، گؤوده‌سینه گؤرونمز زنجیر هؤرولموشدو.
کیشی سول الی ایله رفدن بیر قافا تاسی گؤتوروب رامیزین اؤنونه توتدو.
ـ بونا یاخشی باخ. بو سنین آتانین باشی دیر.
اونو یئره قویوب باشقا بیر قافا تاسی گتیردی. _بو دا آتانین آتاسی دیر. _ قاققیلدایاراق بیر باشقاسینی دا گتیردی. بو ده‌ده‌ن دیر.
بیر آز سونرا بوتون قافا تاس‌لارینی اونون اؤنونه ییغسا دا لمه‌ده بیری داها قالیردی.
رامیز قورخوسو توکولن ساواشچی‌ کیمی‌گؤزلری ایله رفده‌کی باشی گؤرستدی. کیشی اونو دا آلیب داییره‌وی شکیلده ییغدیغی باش‌لارین اوستونه قویدو.
ـ بوتون بو اولان‌لارین سوچلوسو بودور.
رامیز ـ _ دوشکون سسی ایله_ بو کیم دیر؟ مندن نه ایسته‌ییرسن؟
ـ بیر آز دا داها سس‌سیز قالسایدین سنین بو سویدان اولدوغونا قوشقولاناجاقدیم. _ سسی قابالاشدی _ بونون آدی دلی باش ایدی. بابکین ان یاخین دؤیوشچولریندن بیری ساییلیردی. منیم آتا_آنامی‌گؤزلریمین اؤنونده دوغرادی. من ده اونون سویونو قوروتماغا آند ایچدیم. ایشده، سن اونون سویوندان گلن‌لرین سونونجوسو‌سان. بورادا اون‌یئددی قافا تاسی وار. سنینکی ایله اون‌سکگیز تامام اولور. منیم ده حئسابیم قاپانیر.
رامیز سرسم اولاجاق دورومدا ایدی. نه کیشینین دئدیک‌لریندن باش آچیردی، نه ده قورتاریش اوچون بئینینه بیر یول چاتیردی . گؤزلرینی اورا_بورا گزدیررکن یئشگین اوستونده‌کی ایکی یاریم داییره بیر داها ایلگیسینی چکدی. کیشی آرخاسینی رامیزه چئویریب بورونجه‌گینین آلتیندان ایکی شام چیخاردیب یاندیردی. شام‌لاری دئمک اولار کی اوتوز سانتی‌مئتر آرا ایله داخمانین بوجاغیندا یئره قویدو. بورونجه‌گینین آلتیندان دمیر بیر خاچ دا چیخاردیب شام‌لاردان بیر آز ایره‌لی‌ده یاتایینا یئره باسدی. بوینوندان آسلانان بوتون اشیاءلارینی چیخاردیب یئشیگین اوستونه قویدوقدان سونرا دیز چؤکوب ال‌لرینی بورونجه‌گینین آلتیندا داراقلایاراق گؤزلرینی یوموب نه‌سه پیچیلداماغا باشلادی.
رامیز سس‌سیزجه سورونوب اؤزونو قاپییا چاتدیردی. بوتون گوجو ایله اونو آچماغا چالیشسا دا باجارمادی. واختی اؤلدورمک فایداسیز دیر دئیه دوشونوب یئشیگه یاخینلاشدی. الینی آتیب یاریم داییره‌لرله بویون باغی‌لاری گؤتورن کیمی‌کیشی اود آلوولاری ایله بوروندو. رامیز قورخوسوندان بیر نئچه آددیم دالی گئدیب دیوارا سؤیکندی. کیشی‌نین قولاق باتیران باغیرتیسی داخمانی اوچورتماق اوزره ایدی. آنجاق یئریندن ده‌بره بیلمیردی. بوتون وارلیغیلا اونلاری گئری وئر دئیه‌رَک یالوارماغا باشلادی.
رامیز قورخو فیلم‌لرینده بئله طیلیسیم‌لری گؤردوگونه گؤره ایکی قیرانلیغی تئز دوشدو. اورک‌لنیب _منی بوراخ_ دئیه‌رَک سسلندی .
کیشی اینیلده‌یه‌رَک بورادان چیخیش یوخدور دئدی.
رامیز اؤز یانیندا یاریم داییره‌لری بیر_بیرینه یاپیشدیرارسام طیلیسیم چورویر دئیه دوشونوب اونلاری بیر_بیربیرینه یاخینلاشدیردی. کیشی آن ایچینده بوتون قیزغین‌لیغی ایله رامیزه ساری توللاندی. رامیز دامغالاری یاپیشدیردی. چیخان ایشیق اوجباتیندان گؤزلرینین قاپاغینی قاپادیب دیش‌لرینی سیخاراق اونلاری یاپیشیق شکیلده ساخلاماغا چالیشدی. دامغادان بوراخیلان گوج بیر آن بومبا کیمی‌آچیلدی. قوش‌لارین سسی ایله اؤزونه گلدی. نانه، رئیحان، ککلیک اوتو قوخوسوندان کئفله‌نیب آرد_آردا بیر نئچه کره جیگر دولوسو نفس آلدی. ایل‌لرجه‌هانسی‌سا قارانلیقدان ائشیگه چیخمایان بیری کیمی‌چتین‌لیک‌له ایشیغا آلیشیب گؤزلرینی قییاراق اورا_بورا باخدیغیندا گؤردوک‌لرینه اینانا بیلمه‌دی. ال‌لری ایله گؤزلرینی اووخالاییب بیر داها باخدی. بذ قالاسینین ایچینده ایدی. قالادا اولدوغوندان داها چوخ اورانین ساغلام اولدوغونا مات قالدی. چئوره‌سینی یوخلاماق اوچون آیاغا قالخیب آرخاسینداکی دیوارین تینیندن بویلاندی. اؤزونو اله آلا بیلمه‌گه گؤره بیر نئچه دؤنه داها درین نفس آلدی. کئچمیشده گؤردوگو جیزگی فیلم‌لرینی آنیمساییب یوخودان آییلماق اوچون سول قولوندان بیر نئچه توک چکدی. گؤردوک‌لرینین یوخو اولمادیغینا ایناندیقدان سونرا بیر داها بویلاندی. قاراوول‌خانالاردا گؤزتچی‌لر ال‌‌لرینده‌کی اوخ‌لارینی حاضیر توتاراق کئشیک وئریردی‌لر. قالانین ایچینده بیر نئچه داوار سوروسو، آت‌لار، دیوارلاری ساغلام‌لاشدیران اَرلر، اورا_بورا قاچان اوشاق‌لار بیر ده کیلیم‌خانادا چالیشان قادین‌لار وار ایدی‌لار. بوتون کیشی‌لرین باش‌لاریندا کئچه پاپاق‌لار اولسا دا بئل‌لرینده قیلینج‌لاری اولان‌ عسگرلرین پاپاق‌لاری کوتله‌‌دن سئچیلمک اوچون اؤزل بیچیمده ایدی. قادین‌لار تومان_کؤینک‌لی اوشاقلار ایسه چوخونلوق‌لا چاریق‌لی گؤرونوردولر. اوودانا ساریدان قولاغینا سس‌لر گلدی. تئز اؤزونو دیوارین او باشینا چاتدیردی. بویلو بوخونلو گنج اوغلان گور سسی ایله دیوارا سؤیکه‌نن قیزلا دانیشیردی .
ـ باخ مارینا، ایگیدلیگیمه آند اولسون بوتون آچون قارشیمدا دورسا سندن ال چکمه‌یه‌جه‌یم.
مارینا ـ _دولومساناراق_ سنه اینانیرام گورشاد.
گورشاد ساغ الینی قیلینجی‌نین ساپیندان بوراخمادان سول الی ایله مارینانین سولموش بنیزیندن گؤز یاش‌لارینی سیلیب باشینی کؤکسونه یاسلاییب بئلینه‌ دَک اوزانان ساری ساچ‌لارینی سیغاللادی. مارینا الینی گورشادین دولو دؤشونون اوزریندن اورگینین باشینا قویدو.
مارینا ـ گل بورالاردان چیخیب گئدَک. بیزانس بورنوموزون اوجوندا دیر. هم اورادا بیزی کیمسه تانیمیر. باش آغری‌سیز عؤمور سوره‌ریک.
گورشاد ـ اولماز.
مارینا ـ _سس تونونو قالدیریب اوندان آرالاناراق_ اولماز، اولماز، اولماز. منی سئودیگینی دئییرسن ، آنجاق منیم اوچون هئچ بیر ایشه قاتلانمیرسان. ان دویغوسال آنلاریمیز دا بئله الینی قیلینجیندان آییرمیرسان. دَلی باش بویروق وئرسین گؤزونو قیرپمادان اؤزونو اؤلمه آتارسان. سنین یانیندا نه بو اسکیمیش قالا قدر، نه ده او قورباغا گؤزلو دلی باش قدر دگریم یوخدور.
گورشاد ـ من دلی باشین بویروغونا دئییل بو تورپاغین ، بو اولوسون گله‌جه‌گینه گؤره گؤزومو قیرپمادان اؤزومو اؤلومه آتیرام. سن بیزی یاخشی تانیماییبسان. بیزیم اوچون وطن هر شئی‌دن اؤنجه گلیر. او یالین آیاقلا اورا_بورا قاچان چوجوق‌لار، قان تر ایچینده دیوار هؤرن اَرلر ، گؤزلرینین ایشیق‌لارینی کیلیمین ایلمه‌گینده ایتیرن آنالار منیم جان پارچالاریم دیر. من بو قالادا دوغولموشام، قانیمین سون داملاسینا قدر ده اونو قوروماق اوچون چالیشاجاغام.
مارینادان سونرا گورشاد دا اورادان اوزاقلاشدی. رامیز نئجه بیر اوغورسوزلوغا دوشدوگونو قاورایا بیلمه‌دی. چوخ دوشوندوکدن سونرا چاره‌سیزجه گیزلندیگی دیوارین دیبینده اوتوردو. اولای‌لاری بیر داها گؤزونون اؤنوندن کئچیرتدی. ارک قالاسینین چئوره‌سینده‌کی کوتله‌وی گورداکی اون یئددی ایسکلئت ، مکتوب ، داخما ، طیلیسیم سونوندا دا قالادا اولدوغونون‌هامیسی دونقا بئلین دئدیک‌لرینی دوغرولاییردی. آیریجا آتاسی دا واختی ایله بیردن یوخ اولموشدو. بیر آن زامان گزینتیسینه نه‌دن اولان ایکی یاریم داییره‌نی خاطیرلادی. چیخیش یولونو تاپمیش کیمی‌گؤزلری ایشیلدادی. چئوره‌سینه گؤز گزدیردی. تاپمایینجا دا اورا_بورانی آختارماق ایسته‌دی. آیاغا قالخدی.‌هارادا اولدوغونو یادینا سالیب همن یئره اوتوردو . _ بو گئییم‌لرله منی گؤررلرسه یا اؤلدوررلر، یا دا دوستاق ائدرلر_ دئیه‌ر‌َک میزیلداییب اولدوغو یئرده قالیب گئجه‌نین گلیشینی گؤزله‌دی.
گئجه‌نین گلیشی ایله قالانین هر یانیندا تونقال‌لار قالاندی. اینسان‌لار تونقال‌لارین چئوره‌سینه ییغیلدی‌لار. کیمی‌لری آی ایشیغی آلتیندا قیلینج قوللانماق مشق ائدیردی‌لر، کیمی‌لری ایسه ده قیمیز ایچیب یاللی گئدیردی‌لر. گؤرونن‌لر رامیزین اورگینی اوخشاییردی. آدام‌لار آیری_سئچکی‌لیک ائتمه‌دن ، بیر_بیرینی اینجیتمه‌دن دئییب گولوردولر. گون بویونجا آغیر ایش‌لرده چالیشان‌لار بیرلیکده دینجَلیردی‌لر. رامیز سس‌سیزجه دیوارین دیبیندن چیخیب گیزلیجه دام‌لارین بیرینه گیردی. بیر دست عسگر گئییمی‌تاپیب پالتارینی دگیشدی.اؤز پالتارلارینی دا بوخچالاییب دیوارین اوستوندن مئشه‌یه ساری آتدی. گورشادی تاپماق اوچون بیر_بیر ییغینجاق‌لارا باش چکمه‌گی کسدیردی. دامدان چیخیب پیلله‌کن‌لرله قالانین اتگینده‌کی بولاغا ساری یولا دوشدو. گؤی اوزونده سایریشان میلیون‌لارجا اولدوز قارا قوماشین اوزرینه تیکیلن داش_قاش‌لار کیمی‌پاریلداییردی‌لار. دیقّت‌له باخینجا سامان یولونو بئله گؤرمک اولوردو. رامیز یولونون اوستونده‌کی ییغینجاق‌لاری گؤزدن کئچیرتدیکدن سونرا بؤیوک تونقالین یانیندا گورشادی گؤردو. یاد اولدوغونون اورتایا چیخماسیندان قورخدوغو اوچون یاخینلاشماغا اورک ائتمه‌‌سه ده اونا یاردیم ائده بیله‌جک تک کیشی گورشادین اولدوغونو بیلیردی. مارینا ایله دانیشاندا دلی باشدان سؤز آچمیشدی‌لار. دونقا بئل ده اولان‌لارین سوچلوسو دلی باش دیر دئمیشدی. تونقالدان بیر آز آرالیدا تک باشینا اوتوران ساققالی کیشی بوغونوق سسی ایله رامیزه باخاراق _ آ بالا، بری گل . _ سؤیله‌دی. تیتره‌ک آددیم‌لارلا یاخینلاشدی. ال‌لرینی اووشدوراراق کیشی‌نین اؤنونده دایاندی. ساچ‌لاری چیگین‌لرینه دَک اوزانمیشدی. بورنو قارتال دیمدیگینه بنزه‌ییردی. دومبا گؤزلرینه باخینجا رامیزی قارا باسدی.‌هامی‌اونلارا ساری دؤنموشدو.
ـ آدین نه دیر؟
رامیز ـ آدیم، آدیم بوغدای دیر.
ـ سنی هئچ گؤرمه‌میشم. نه‌چی‌سن؟ کیم‌سن؟
رامیز ـ من … .
ـ سن نه؟
رامیز ـ من بو گون خرّمی‌لرین اوردوسونا قوشولموشام.
ساققالی کیشی گورشادی چاغیردی. بونو سنه تاپشیریرام.
گورشاد ـ بویروق سنین دیر دلی باش بگ.

باجادان اوزونه دوشن گونش ایستیسی ایله یوخودان آییلدی. چوخدان یوخودان دوروب گئیینن گورشاد قیلینجینی بئلینه آسیب قالخ آیاغا گئدیریک دئدی. رامیز تئز قالخیب آنیق اولدو. بیرلیکده قالانین چیخیشینا ساری یولا دوشدولر . قورویوجولار اونلاری آختاریب یولا سالینجا مئشه‌یه دالدی‌‌لار.
گورشاد ـ دئدین آدین بوغدای دیر؟
رامیز ـ هه.
گورشاد ـ‌هارادین گلیب‌سن؟
رامیز ـ وراوی‌دن.
گورشاد ـ باخ دلی باش سنی منه تاپشیردی. منیم ایشیم بیلگی توپلاماق دیر. ائله واخت اولور ماُمونون اوردوسونون آراسینا سیزیب آی‌لارجا اورادا قالیرام. اونون اوچون گؤره‌ویم اؤنملی دیر. منه دئمه‌دن اؤز باشینا هئچ بیر ایشه یئلتنمه.
رامیز ـ اولدو. بو ، دلی باش کیم دیر؟
گورشاد ـ بابکین ان چوخ گووَندیگی باشچی‌لاردان دیر.
رامیز ـ عاییله‌سی وار؟
گورشاد ـ هه، بیر اوغلونو ساواشدا ایتیریب. او بیریسی ده منیم کیمی‌جاسوس دور . اونلار دا سیزین بؤلگه‌دن گلمه ‌دیرلر. رامیز دونقا بئلین سؤیله‌دیک‌لرینه اینانیب سوسدو. یول بویونجا دوشدوگو دورومدان اؤزونو نئجه قورتاراجاغینی دوشونسه ده بیر یول تاپا بیلمه‌دی. چوخ یول گئتدیکدن سونرا قالانین اؤنونده‌کی بؤیوک تپه‌نین آرخاسینداکی داخمایا چاتدی‌لار.