مؤلليفين اؤلومو / رولان بارت* – چئویرن: جاوانشير يوسيفلي

roland-barthes
مؤلليفين اؤلومو
رولان بارت* – چئویرن: جاوانشير يوسيفلي
javanshir

بالزاک «ساررازين» نووئللاسيندا قادين پالتاري گئيينميش خديم کيشي حاققيندا دانيشارکن بئله بير جومله ايشله‌دير: «و ائله اصيل قادين ايدي، قفيلدن باش قالديران قورخو حيسسي، آنلاشيلماز شيلتاقليقلاري، اينستينکتيو هيجانلاري، سبب‌سيز قاباليغي، حريصلييي و بير ده فسونکار، اينجه حيس‌لري ايله بيرگه…» بو سؤزلري دئين کيمدي بئله؟ بلکه قادين‌ليباسي آلتيندا خديمي سئزمه‌مه‌يه چاليشان نووئل قهرماني؟ يا بلکه اؤز شخصي تجروبه‌سيندن قادين حاققيندا فيکير يورودن بالزاک – فرد؟ ياخود قادين ناتوراسي باره ده حؤکم سورَن ادبي تصوورلري ايزله‌ين يازيچي بالزاک؟ بلکه عموم بشري حکمتدي بو؟ کيم بيلير؟! رومانتيک پسيخولوژي اووقاتين تظاهورودورمو بو؟ نه‌ديرسه، بيز اونو هئچ وعده بيله بيلميه‌جه‌ييک، بئله بير سببدن کي، محض آدينا يازي دئديييميزده سس، منبع، مأخذ باره ده هر جور آنلاييش، ساده‌جه گؤمولور! يازي – بليرسيز‌ليين، غئيري-يئکجينس‌ليين، ايکي معنالي‌ليغين ائله بير مکانيدير کي، بورادا بيزيم سوبيئکتيولييميزين ايزلري يوخ اولور. بو، ائله بير آغ-قارا لابيرينتيدير کي، هر جور اؤزونه بنزرليک و ايلک نؤوبه ده يازان آدامين جيسماني نشانه‌سي ايتيب گئدير.
گؤرونور، بو ائله هميشه بئله اولوب: اگر احوالات ائله احوالات خاطيرينه ناغيل ائديليرسه، بو پروسئسده گئرچکلييه بيرباشا تاثير و مداخيله دن، يعني سون نتيجه ده سيمووليک فعاليتدن اؤزگه هر‌هانسي فونکسييادان [كاركرد، ايشلك] سؤز گئتميرسه، – سس اؤز منبعيندن قوپوب آيريلير، مؤلليفين «حجره‌سينه» اؤلوم تشريف گتيرير و يازي دا ائله بو مقامدان باشلانير. آنجاق مختليف دؤنملرده بو حاديثه فرقلي شکيلده قاورانيليب. بئله کي، ابتدايي جمعيتلرده ناغيلچيليقدا ساده بير آدام يوخ، خوصوصي مئدياتور-شامان، ياخود ناغيلچي مشغول اولوردو؛ نه دئييرسينيز دئيين، اونون تحکييه کودلاري ايله رفتاريندان («پئرفورماسييا») لاپ شؤوقه ده گلمک مومکوندور، آمما هئچ وجهله «دوها»سيندان يوخ… مؤلليف فيقورو، اصلينده يئني دؤوره مخصوصدور؛ بئله چيخير کي، بو آنلاييشي اينسان جمعيتي اؤزو اوچون ائله بير مقامدا آشکارلاييب کي، (شوبهه‌سيز، اينگيليس ائمپيريزمي، فرانسيز راسيوناليزمي و رئفورماسييانين تثبيت ائتدييي شخصي اعتقاد سايه‌سينده)، بو دؤورده- اورتا عصرلرين سونا يئتدييي زاماندا فردي‌لياقت گوجلنمه‌يه باشلاييب. فيکريميزين منطيقي آخاري اونا ديره‌نير کي، ادبيات عالمينده «مولليف شخصيتي» کاپيتاليزمين ايدئولوگيياسيني يئکونلاشديران پوزيتيويزمده [اولوملولوق] داها گئنيش قاباريقلاشيب. گونو بو گون ده مؤلليف ادبيات تاريخي درسليکلرينده، يازيچيلارين بيوقرافيياسيندا، ژورنال مصاحبه‌لرينده و شخصيتي ايله ياراديجيليغيني بير اينتيم گونده‌ليک فورماسيندا بيرلشديرمه‌يه جهدده بولونان اديبلرين تفککورونده حؤکمرانليق ائدير. بيزيم مدنيتده مؤوجود ادبيات اوبرازي‌نين کئچيلمز حدودلاريندا مؤلليف شریک‌سيز حاکيم‌ليک ائدير – شخصيتي، حيات تاريخچه‌سي، ذؤوقو، ائحتيراسلاري ايله؛ تنقيد اوچون گونو بو گون ده بودلئرين بوتون ياراديجيليغي اونون، نئجه دئيرلر، حياتي‌نين آلينماماسيندادير؛ وان‌گوگون بوتون ياراديجيليغي اونون اوره‌ک خسته‌ليينده، چايکووسکي‌نين بوتون صنعتي اونون معلوم قوصوروندادير؛ ياراديلان اثرين شرحي و ايضاحي اول-آخير گليب مؤلليف اوزرينه ديره‌نير، ائله‌بيل کي، هر دفعه، هر بير اثرده آز و يا چوخ درجه ده شفاف آللئقوريک [تمثيلي] معنا قاتيني کئچيب عئيني بير شخصين – مؤلليفين سسينه اوغراشيريق.
***
مؤلليفين حاکيميتي هله چوخ گوجلو ايسه ده (يئني تنقيد اونون مؤقعيني بير قدر ده محکم‌لنديردي)، شوبهه‌سيز کي، آرتيق بعضي يازيچيلار اونو چوخدان يئريندن لاخلادا بيلميشلر. فرانسادا بو ايشي ايلکين اولاراق، هئچ شوبهه‌سيز، مالارمه گؤرموشدو، او، قلبي‌نين، روحونون هر ذره‌سيله اولجه دن گؤروردو کي، ديلين اؤزونو اونون صاحیبي‌نين يئرينه قويماق لازيمدير. مالارمه گومان ائدير کي، – بو هم ده ائله بيزيم حاضيرکي تصوورلريميزله اوست-اوسته دوشور، – دانيشان مؤلليف يوخ، ديلين اؤزودور؛ يازي ازلدن سيماسيزلاشديريلميش بير فعاليت دير (بو شخصسيزلشديرمه ني هئچ بير حالدا يازيچي رئاليستين «آختالانميش» اوبيئکتيولييي ايله قاريشديرمامالي)، ائله بير فعاليت کي، «من»ين يوخ، ديلين اؤزونون فعاليتينه شرايط يارادير؛ بوتون مالارمه پوئتيکاسي‌نين مغزي ائله مؤلليفي اوزاقلاشديرماغيندا، اونو يازي ايله عوض ائتمه‌سينده دير، – بو ايسه، بيزيم گؤره‌جه ييميز کيمي، اونا اوخوجو استاتوسو حوقوقو قازانديرماقدير. پسيخولوژي «من» نظريه‌سي ايله ال-آياغي باغلانميش والئري، مالارمه نين ايدئيالاريني خيلي يومشالتميشدي؛ آنجاق اؤزونون کلاسيک ذؤوقونه آرخالاناراق او، ريتوريکا [فن بيان] تجروبه‌سينه اوز توتدو؛ ائله بو سببدن دؤنمه دن مؤلليفي شوبهه يه و مسخره يه معروض قويور، اونون فعاليتي‌نين ديل آسپئکتيني [سرشت] و «گؤزله نيلمز» خاراکتئريني قاباردير، هم ده اؤزونون بوتون نثر اثرلرينده اعتيراف ائتمه يي طلب ائديردي کي، ادبياتين ماهيتي – سؤزده دير، يازيچي‌نين قلب دونياسينا هر نؤوع ايسنادلار ايسه – مؤوهوماتدان اؤزگه بير شئي دئييلدير. حتتا مشهور پسيخولوگيزمي ايله تانينان قلب اوستاسي پروست دا – ساده‌جه تفررعات خيردالاميردي، تفررعاتين درين‌ليکلرينه گئتمکله يازيچي ايله اونون پئرسوناژلاري‌نين موناسيبت لريني مرکب لشديرير – آچيق-آشکار قارشيسيندا دوران وظيفه ني بوندا گؤروردو… پروست تحکيه چي قيسمينده نه ايسه گؤرن، عذاب چکن آدامي يوخ، حتتا يازان آدامي دا سئچميردي، ائله بيريسيني سئچيردي کي، او، هله يازماق حاققيندا دوشونور (اونون رومانينداکي جاوان اوغلان، – يئري گلميشکن، اونون نئچه ياشي وار، کيمدير، نه ايشله مشغولدور – يازماق ايسته يير، آنجاق باشلايا بيلمير و رومان دا او زامان بيتير کي، نهايت، يازي آلينير، ايلک جومله‌سي يازيلير)، بو يوللا پروست موعاصير يازي ائپوپئياسي [حماسه] ياراتدي. بو ساحه ده او، کؤکلو چئوريليشه نايل اولدو؛ روماندا اؤز حياتيني تصوير ائتمک يئرينه، – آخي چوخ زامان مالي مالا قاتيب ائله بئله ده دئييرلر،-او، اؤز کيتابي‌نين نمونه‌سينده ائله اؤز حياتيني، عؤمرونو ادبي اثره دؤندره بيلميشدي و بيزه آيدين اولور: شارل کي مونتئسکيو دان کؤچورولمه ميشدير، عکسينه، محض مونتئسکيو اؤزونون گئرچک-تاريخي حرکت و علامتلريله اولسا-اولسا شارل دان گلمه معين فراقمئنتي [پارچا]، ياخود «قيرينتي»ني تمثيل ائدير. بو سيرادا سونونجوسو سوررئاليزم دير، او، شوبهه‌سيز کي، ديلين سووئرئن [حاكيم، استعلا] حقوقلاريني قبول ائتمک اقتيداريندا دئييلدي؛ ديل سيستئم اولدوغو اوچون و رومانتيزم روحوندا بو حرکتين مقصدي هر جور کودون دارماداغين ائديلمه‌سي اولدوغو اوچون (بو ايللوزور [رويكرد] مقصددير، چونکي کودو عمومن داغيتماق مومکونسوزدور، اونو يالنيز «آزديرماق» اولار) سوررئاليزم بونا گئده بيلمزدي؛ آنجاق سوررئاليزم دايم معنانين کسکين‌ليکله و بيله رکدن پوزولماسينا چاغيريردي (بدنام «معنا قامارلاما» حاديثه‌سي)، او، طلب ائديردي کي، باشين هله عاغلينا گلمه ين لري بئله ال مومکون قدر تئز قئيده آلسين (اوتوماتيک يازي). سوررئاليزم قروپلا (بيرگه) يازيني پرينسيپجه قبول ائديب، رئال اولاراق پراکتيکادان کئچيرديينه و بوتون بونلارا گؤره مؤلليفين مقدس‌ليک تاختيندان دوشورولمه‌سي ايشينه (دئساکراليزاسييا) بؤيوک تؤحفه وئردي. نهايت، ادبياتين چرچيوه‌لريندن کناردا (يئري گلميشکن، ايندي بئله بير حد قويما اؤزونو توکتميشدير) مؤلليف فيقورونون آناليزي و داغيديلماسي اوچون ان ديرلي سيلاحي موعاصير‌لينقويستيکا [ديلچي‌ليك، زبانشناسي] وئردي، بئله بير ساده حقيقتي پيچيلدادي کي، اؤز-اؤزلويونده سؤيلم – بوشونا بير پروسئسدير [گئديش]، اؤز-اؤزونه ده باشا چاتير، بئله کي، اونو دانيشانلارين شخصيتي ايله دولدورماغا لزوم يوخدور.‌لينقويستيکا نؤقطه ي-نظريندن مؤلليف يالنيز و يالنيز يازان آدامدير، نئجه کي، «من» ده ائله دانيشاندا «من» دئيندير؛ ديل «شخصيتي» يوخ، «سوبيئکت»ي تانيير و يالنيز نيطق آکتي‌نين [مقاوله] داخيلينده معين لشن، اوردان کناردا هئچ بير مندريجه‌سي اولمايان بو سوبيئکت بوتونلوکده ديلي اؤزونه «ييغيب»، اونون ايمکانلاريني تامامن توکتمه‌يه ده بس ائله يير.
***
مؤلليفين کنارلاشديريلماسي (برئشتين دالينجا بورادا اصل «اؤزگلشمه دن» سؤز آچماق مومکوندور – ادبي «صحنه‌نين» ان درين بير گوشه‌سينده بالاجا بير فيقور کيمي مؤلليفين بويو گئتديکجه کيچيلير) – تکجه تاريخي فاکت، ياخود يازي‌نين ائفئکتي دئييلدير: بوتون موعاصير متن اؤزولونه، کؤکونه قدر دييشير و بئله دئيک، بو دفعه او، ائله شکيلده ياراديلير و اوخونور کي، مؤلليف بوتون سوييه‌لرده کنارلاشديريلميش اولور. هر شئيدن اؤنجه زامان پئرسپئکتيوي باشقا شکله دوشور. هله ده مؤلليفه اينانانلار اوچون او هر آن کئچميش زاماندا، اونون کيتابينا نظرن دوشونولور؛ مؤلليف ده، کيتابدا اؤز-اؤزلويونده «قدر»له «سونرا» آراسيندا استقامتلنديريلميش عمومي اوخا «کئچيريلميشدير»، بئله حساب ائديلير کي، مؤلليف کيتابي بئينينده، فيکرينده بسله يير، اوندان اول مؤجود اولدوغو اوچون عذاب چکير، اونون اوچون ياشايير، بو ائله آتانين اوغولدان اؤنجه گلمه‌سي کيمي دير. موعاصير سکريپتورا [كاتيب] گلديکده، او، متن له عئيني زاماندا مئيدانا چيخير، يازييا قدر و يازي خاريجينده هئچ بير مؤجودلوق علامتينه ماليک دئييل دير؛ بو قطعيين او سوبيئکت ده دئييل کي، اونا نظرن مؤلليفين کيتابي پرئديکات اولسون؛ اورتادا يالنيز بيرجه زامان قالير – نيطق آکتي زاماني، هر‌هانسي متن ده دايم «ايندي» و «بوراداجا» يازيلميش اولور. بونون نتيجه‌سي (و يا سببي) کيمي «يازماق» فعلي‌نين معناسي ايندن بئله نه ايسه قئيده آلماق؛ تصوير ائتمک، کلاسيک لرين بويوردوقلاري کيمي «رسم ائتمک» دئيه نظرده توتولمامالي، اوکسفورد مکتبيندن اولان فيلوسوفلارين آردينجا‌لينقويست لرين «پئرفورماتيو» {رفتار} آدلانديرديق لاريندا مؤجود اولماليدير – بئله بير نادير فعل فورماسي وار، يالنيز و يالنيز اينديکي زاماني گؤسترير و بو حالدا ايفاده آکتي اؤزونده بو آکتدان غئيري باشقا مضمونو (باشقا دئييمي) احتيوا ائتمير: مثلا، حؤکمدارين ديليندن دئييلن: «فرمان اولدو کي…» ياخود قديم شاعيرين ديلينده: «اوزان سؤيله ميش»… (مقايسه ائت: «آشيق دئير»- ترجمه‌چي). دئمه‌لي مؤلليف‌له اوزلشن موعاصير سکريپتور اؤز سلفي‌نين پاتئتيک [بيهوده] باخيشلارينا اويغون، ظن ائده بيلمز داها، بس ال فيکرين، ياخود دويغولارين آردينجا چاتديرا بيلمير، اگر بو، دوغرودان دا بئله ديرسه، او، قدرله راضيلاشيب اؤزو بو مقامي نظره چارپديرماغا و دايم اثري‌نين فورماسيني جيلالاماغا بورجلو اولاردي؛ عکسينه، سسله هر جور علاقه ني کسن ال تام جيزگي ژئستي (ايفاده ژئستي يوخ!) ايجرا ائدير و باشلانغيجي، چيخيش نؤقطه‌سي اولمايان هر‌هانسي ايشاره وي ساحه جيزير؛ هر حالدا بو ساحه يالنيز ديلين اؤزوندن نشت ائدير، يارانير، او ايسه اوسانمادان باشلانغيج نؤقطه‌ حاققينداکي هر دورلو تصوورو شوبهه آلتينا آلير.
***
ايندي بيز بيليريک کي، متن واحيد، تئولوژي [خداشناسانه] معنا ايفاده ائدن (مؤلليف – آللاهين «ايراده‌سي») خطي سؤز سيراسي دئييل دير، عکسينه، ائله بير چوخ اؤلچولو مکاندير کي، اورادا يازي‌نين مختليف نؤعلري بير آرايا گلير، بحثه گيرير و اونلاردان هئچ بيري باشلانغيج، ايلکين حساب ائديلمير؛ متن مينلرله مدنيت منبعلريني‌ نيشان وئرن سيتات [منبع، مراكز] لاردان هؤرولور. يازيچي الده قلم دايانمادان يازان بووار و پئکوشئيه بنزه يير، عئيني زاماندا هم بؤيوک، هم ده گولونج اولان بو فردلرين درين کوميزمي [بلاهت] اؤزونده محض يازي حقيقتيني حفظ ائدير؛ او، يالنيز اول يازيلان بير شئيي تقليد ائده بيلر، اونون قلمه آلديغي هئچ وعده ايلکين اولا بيلمز؛ اونون حاکيميتي مختليف يازي نؤع لريني بير-بيرينه قاريشديرماق؛ – اونون ايختياريندا اولان بودور – اونلاري باش-باشا گتيريب توققوشدورور و هئچ زامان اونلاردان بيرينه بوتونلوک له اساسلانمير؛ اؤزونو ايفاده مقامينا يئتيشرسه ده، اونا بيلمک گرکدير کي، «وئرمک» ايسته دييي داخيلي «ماهيت» – ايچينده کي سؤزلرين آنجاق ديگر سؤزلرين کؤمه يي ايله ايضاح اولوندوغو حاضير سؤزلوکدن باشقا بير شئي دئييل دير و بو – سونسوز بير ايش دير. توماس دئ کوينسي‌نين اوغراشديغي بير احوالاتي بونا ان پارلاق نمونه سايماق مومکوندور: بودلئرين دئديينه گؤره، او، يونان ديلي‌نين اؤيره نيلمه‌سينده او درجه ده «يئتيشميشدي» کي، بير گون ان موعاصير اوبراز و فيکيرلري بو اؤلو ديل واسيطه‌سيله ايفاده ائتمک عشقينه دوشموش، بو مقصدله هميشه قوللوغوندا حاضير دوراجاق بير لوغت ده حاضيرلاميشدي، بو لوغت – اساسي سؤزون اصل معناسيندا تميز ادبي ترجومه‌لره علاوه ائديلن شرح لردن عيبارت کيتابدان چوخ-چوخ بؤيوک و ايري حجم‌لي آلينميشدي. مؤلليفين يئريني توتان سکريپتور، ائحتيراس، اوقات، حيس-هيجان و تصورات يوخ کي، بو نهنگ لوغتدن عيبارتدير، يازيسي آنسيزين بورادان بارينير؛ بئله کي، حيات اولسا-اولسا کيتابي تقليد ائدير، کيتابين اؤزو ايسه، ايشاره‌لردن هؤرولمک له،‌هانسيسا اونودولموش نسنه‌لره تقليد ائدير و بئله‌جه سونو بيلينمزلييه قدر.
***
مادام کي، مؤلليفين کنارلاشديريلماسي آرتيق باشا چاتميشدير، متنين هر جور آچيليشينا ادعالار دا اساسسيز سسلنه جک. متنه مؤلليف وئرمک – آرتيق متني اَيلتمک کيمي بير شئيدير، بو، هم ده اونو يئک معنايا منجر ائتمکله يازيني قاپاماقدير. بئله بير باخيش اساس وظيفه‌سيني اثرده مؤلليفي (و يا اونون مختليف: – جمعيت، تاريخ، قلب، آزادليق و س. کيمي‌نيشانه‌لريني) تاپماقدا گؤرن تنقيدي تاماميله تامين ائدير: اگر مؤلليف تاپيليبسا، دئمک متن ده «ايضاح ائديليب» و تنقيدچي غلبه چاليب. تعججب لو دئييل کي، تاريخن مؤلليفين حاکيم‌لييي هم ده ائله تنقيدچي‌نين حاکيم‌لييي اولوب و او دا تعججب لو دئييل کي، بو گون مؤلليف له بيرگه تنقيدين ده مؤقعيي لاخلاميش اولدو (قوي لاپ يئني تنقيد اولسون). دوغرودان دا، چوخ اؤلچولو يازيدا آچيقلانمالي نه وار کي، يالنيز و يالنيز کلف لري آچماق لازيم گلير: استروکتورو [قورولوش]، بوتون تکرار و سوييه‌لرينده نظردن کئچيرمک، چکيب-چکيب (جوراب هؤررکن بوشالميش ايلمه ني چکدييين تک) برکه ده چکمک اولار، سونونا وارماق ايسه يوخ؛ يازي مکاني، – ياريب کئچمک اوچون يوخ کي، – بيزه قاچيش اوچون وئريليب – يازي دايم معنالار دوغور، «تؤره يير» – آمما بوراداجا – او اوچوب يوخ اولور، – معنانين سيستئماتيک آزاد اولونماسي گئدير. بونونلا ادبيات (ايندن بئله، يازي دئمک داها دوغرو اولاردي) متنين ده (بير متن کيمي بوتون دونيانين دا) آرخاسيندا‌هانسيسا بير سيرر گيزلندييي، يعني يئک معنا اولدوغو مؤقعيندن ال چکه رک، ماهيتجه کونترتئولوژي {ضد خداشناسانه}، اينقيلابي فعاليتينه تام رواج وئرير، بئله کي، معنا سئلي‌نين قارشيسيني آلماماق – نهايتده ائله آللاهين اؤزونو و اونون بوتون نيشانه‌لريني – راسيونال [عقلاني] نيظامي، علمي و قانونو ردد ائتمک دئمکدير.
***
بير داها بالزاکين جومله‌سينه قاييداق. بو جومله ني هئچ کس دئمير (هئچ کس، – يعني هئچ بير شخص): اگر اونون منبعي و سسي مؤجوددورسا دا، يازيدا يوخ، اوخودا مؤجوددور. بونو آنلاماق اوچون چوخ دقيق بير آنالوگييا [تحليل] کؤمه ييميزه يئتيشه بيلر. سون زامانلارين تدقيقاتلاريندا (ژ.پ.وئرنان) يونان فاجيعه‌سي‌نين اساسيني تشکيل ائدن ايکي معنالي‌ليغي نوماييش ائتديريرلر: اونون متني هر بير پئرسوناژين بيرطرفلي باشا دوشدويو ايکي معناسي اولان سؤزلردن هؤرولموشدور («فاجيعه وي»ليک ده محض بو دايمي آنلاشيلمازليقدان ايره‌لي گلير)؛ آنجاق کيمسه ده وار کي، هر بير سؤزو بوتؤولوکده – ايکي‌لييي ايله ائشيده – قاورايا بيلير، حتتا قارشيسيندا دانيشان پئرسوناژلارين «کارليغيني» دا ائشيدير، بو «کيمسه» – اوخوجو، (کونکرئت حالدا دينله ييجي)دير. يازي‌نين بوتؤولوک ماهيتي بئله‌جه آشکارلانير: متن فرقلي مدنيت لردن گلن، بيري ديگريله ديالوژي [مكالمه]، پاروديک [هجو آميز]، مباحيثه وي موناسيبت لره گيرن چئشيدلي يازي نؤع لريندن قورولور، آنجاق بوتون بو چوخلوق معين بير نؤقطه يه فوکوسلانير [متمركز، اوداقلاشماق] و بو نؤقطه‌ اينديه جن ايصرار اولوندوغو کيمي مؤلليف يوخ، اوخوجودور. اوخوجو – او مکاندير کي، بورادا يازيني تشکيل ائدن هر شئي واحيد سيتاتا قدر حک اولونور؛ متن واحيدلييني تؤرنيشيندن دئييل، يؤنلديينده قازانير، آمما بو يؤنلنمه شخصي عنواني نظرده توتمور؛ اوخوجو – تاريخي، بيوقرافيياسي، پسيخولوگيياسي اولمايان بير کسدير، او، يالنيز يازيلي متنين تشکيل اولوندوغو شتريخ لري [قلمرو] بير آرايا گتيريب بيرلشديرن کيمسنه دير. اؤزونو ريياکارجاسينا اوخوجو حقوقلاري‌نين مدافعه چيسي قيسمينده تقديم ائديب ان يئني يازيني‌هانسيسا هومانيزم آدينا محاکمه ائتمک جهدلري بو سببدن گولونج دور. اوخوجو کلاسسيک طرزده تنقيدي هئچ وعده ماراقلانديرماميشدي، اونون اوچون ادبياتدا يالنيز يازان آدام مؤجوددور. بيزي داها بو ساياق آنتيفراسيس [ظاهرفريب]لرله آلداتماق اولماز، چونکي بو يوللا يوکسک جمعيت عالي جنابجاسينا غيظله او کسين مدافعه‌سينه قالخير کي، عملييه يه گلديکده محض اونو سيخيشديريب ردد ائدير، ازيب – محوه سوروکله يير. ايندي بيز بيليريک: يازي‌نين گله‌جه ييني تامين ائتمک اوچون اونون باره‌سينده کي ميفي ايچ ائتمک گرکدير – اوخوجونون دوغوشو مؤلليفين اؤلومو باهاسينادير.
1968. «مانتئيا»

ایضاح: بو یازی حؤرمتلی همت شهبازي واسطه‌سیله یازیمیزا کؤچورولوبدور. بوتون ايكي كروشه [] آراسيندا گلن آچيقلامالار كؤچورن طرفيندن يازيليبدير.

*: رولان بارت (به فرانسوی: Roland Barthes) (زادهٔ ۱۲ نوامبر ۱۹۱۵-درگذشتهٔ ۲۵ مارس ۱۹۸۰) نویسنده، فیلسوف و نشانه‌شناس معروف فرانسوی است. بارت در دوران فعالیت حرفه‌ایش نحله‌های گوناگونی را آزمود؛ از جمله مؤلفه‌های مهم کار او ساختارگرایی (Structuralism)، پساساختارگرایی، واسازی دریدایی، لذت گرایی و همچنین تحلیل نشانه‌شناسانهٔ متأثر از سوسور هستند.(منبع: ویکی پدیا)

Check Also

شعرلر / اوکتاویو پاز – فرانسیز دیلیندن چئویرن: جاوانشیر یوسیفلی‌

شعرلر اوکتاویو پاز* فرانسیز دیلیندن چئویرن: جاوانشیر یوسیفلی‌ ۱٫ هیمن اوچون باشلانغیج: گؤزلرین (۱۹۴۳-۱۹۴۸) گؤزلرین ...

One comment

  1. ادبیاتین ان گوزل مقاله سی‌دیر بو. اونون مترجیمینین و کؤچوره‌نین الی آغریماسین. ایشیق سایتیدان خواهش ائلیرم بو کیمی یازیلار آرتیق یئر آییرسین.

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *