«اَکیز تایی»نین تورشمزه‌لری (6)
چئویرن: رقیه کبیری
ترجمه: رقیه کبیری
رقیه کبیری

– الو سلام خورتدان گلین باجی! نئجه سیز؟

– نومره‌ ترسه دوشوب. من خورتدان بانو دئییلم.  اکیز تایی‌سی‌یام.

– نه فرقی وار؟ مگر بیر تخوم‌دان، بیر بطن‌دن دوغولمویوبسوز؟ منه گؤره خورتدان خانیملارین هامیسی منیم گلین باجیم ساییلیر.

بو سؤز چوخ خوشوما گئتدی. هر زامان خورتدان بانودان فرقلی بیر کاراکتر داشیدیغیمی دوشونموشدوم. بو قالماقالدا گؤزله‌مه‌دیییم بیر زنگ ایدی، خورتدان بانونون یئرینه منیم تئلفونومون خطینه دوشموشدو. بو گونلر تئلفونلاری هئچ دوشونمک ایسته‌میرم. او سببدن کیتاب‌لارین یازیلارینی گؤزومه تپیرم. منه ائله گلیردی کی تئلفونوم یوز ایللرایدی هئچ زنگ چالمامیشدی. فیکیریم  قاراماقاریشیق دوشونجه‌لریمه قاریشمیشدی. انتخابات دان یازیم یوخسا، شورالاردان دئیه، دوشونوردوم. خیاللاریمدا بوغولموشدوم. بیر گون بیر قادین رئیس جومهورلوغا نامزد اولسا، بلکه بیز خانیملار، آغینا- قاراسینا باخمایاراق، قادین اولدوغو اوچون اونا رای سالاریق، دئییردیم اؤز- اؤزومله. گلین باجی آدینی ائشیتدییم‌ده ایستر- ایسته‌مز دوداغیم قاچدی. انتخابات ، شورالار، حتی هله دوغولمامیش،ریاست جمهوری‌یه سئچیلن قادینین وارلیغی بئله باشیمدان اوچدو. گلین باجی سؤزو بو گونلر اونودولموش بیر سؤز اولسادا، بئله چاغریلماقدان خوشلاندیم .هله قالسین کی خورتدان گلین باجی  سسله‌سینلر.

-گلین باجی! یولداشلاریمین بیرینین توی مراسیمی وار . اونون کارت عروسی‌سینه بیر شعر یازارسان؟

بو سؤزو ائشیتمکده قورودوم. تئلفون الیمده قالدی. من گؤر نه هاوالاردا اوچورام، یئردن خبرسیز!!!

– آلو… گلین باجی! خورتدان گلین باجی سس کسیلدی؟ خط وئرمیر؟

جواب وئرمه‌ییم گلمیردی. اؤز- اؤزومه دوشوندوم کی:« انتخابات دوشونجه‌سی هارا، توی- دویون هارا!!! « من توی- دویون شاعری‌ام؟ یوخسا …» دئمک ایسته‌دییمده، سوسدوم. ایسته میردیم اونون قلبینی سیندیرام.. گوله- گوله دئدیم باخین گؤرون  بو شعری بیه‌نیرسیز؟:

« از پاره‌های گوشه‌ی جگرتان یعنی از درددانه‌هایتان،  در فرصت‌های بعدی  پذیرایی خواهد شد»

اؤز شانسیما لعنت اوخوماغیم گلیردی. آز قالیردیم دئییم:« هر ایشیم قورتولوب ائله فقط عروسی کارتینا شعر یازماغیم قالیب هاااا… !!!»

تئلفون آرخاسنیدان نه گلین باجی سسی گلدی، نه ده منی شیرین- شیرین خورتدان گلین باجی چاغیردی. اونو اینجیتمک قصدیم یوخ‌ایدی. اما ندنسه هردن بیر دیلیمن اوجوندا تیکان بیتَر. یئرلی- یئرسیز سؤزلریمین آراسیندان قورتولوب، ائشیده‌نین اوره‌یینه تاخیلار.  بعضن تیکان لاپ ائله اوره‌یین اورتاسینا تاخیلار. قانلار آخار. بو قانی یوز دفعه ده عذر ایسته‌مکله یویوب آپارماق اولماز. بعضن اوره‌یین بطنینه، هردن ده تیکان دوم- دوز آتیلیب، اوره‌یین دهلیزینه تاخیلار. اوره‌کدن قان آخماسا بئله، داها او دهلیزه آیاق قویماغا یول- یؤندم تاپا بیلمیرسن. گاهدان دا  اولور کی تیکان دیلدن قورتولوب، اوره‌یین ایچینه دئییل، عضله‌نین دؤوره‌سینی آلمیش یاغا توخونور. بیر چیمدیک سانجیسی قدر اینجیدیر اینسانی. اما گؤزون او گونو گؤرمه‌سین! گاهدان اولار کی سنین هئچ گوناهین اولماز. سنی ائشیتمه‌دن، سنه ایچدن اؤفکه‌یله باخانلاردا اولا بیلر. بو اینسانلارا گؤره آغزینی آچمادان، تیکانلی نفسین بئله، هاوانی دَلیک- دئشیک ائده‌ر.

 بیر داها گوله- گوله دئدیم:

– یوخسا بینمه‌دیز؟

اینجیکلی سسی‌ایله یولداشینین کیم اولدوغونو، تحصیلاتینی، و اونا عایید بیلگی‌لری منه سؤیله‌ینده، بیردن بیره کالبای چیلانین سؤزو یادیما دوشدو:« بیز کیمه یازیریخ؟ اؤزوموزه؟ یوخسا میللته؟» کالبای چیلانین قول- قانادی سینیب،  خورتدان ادبیاتیندان اوزاق دوشوب، اورتالیقلاردا گؤرونمه‌سه ده، سؤزو بو آن دا بئینیمه باتدی. بیر نئچه ثانیه اولسادا اؤز تویوم یادیما دوشدو. توت ها توت زامانی ایدی، وورها وور چاغی. آینا- شمعدانسیز، توی- قاوالسیز، کارت سیز، عکاس‌سیز، فیلیمبردارسیز تویومو خاطیرلادیم. نه دوغوم تاریخیمین ساییسی قدر قیزیل پهلوی سالدیلار کبینیمه، نه زیارت سفری، نه ده خاریجه سفری. ایکینجی دونیا ساواشینین چریک‌لرینین تویونا بنزه‌ییردی تویوم. آز قالمیشدی  مبارک باد یئرینه، انترناسیونال سرودی اوخویاق!!! هله بال آیینی استانبول دئییل، بیر نئچه کالباس، اوچ- دؤرد  دَنَه خورما، بیر پرتقالی کوله‌یه آتیب، داغ- دره‌ده کئچیرتدیغیمیزدن سؤز آچمیرام.

۲۷ ایل سووشوب کئچسه ده، تویومدا گؤروب گؤرمه‌دییمه پئشمانلیق دویمورام. ایندی خورتدانا چئوریلدیغیم من ، او زامان، او نسیلین دوشونجه‌لی گنج قادینی ساییلیردیم.

نوستالژیک دوشونجه‌لریم غروروما توخوندو. هاردان باشلاییب، هارا چاتدیغیمی دوشوندوم.خالقین آدی ایلا باشلادیغیمیزی، ایندیسه خالق دان قاچدیغیمیزی هئچ دوشونمه‌میشدیم. غرورلاندیغیما اؤزومدن اوتاندیم. کالبای چیلان دوز دئییرمیش:« کیمه یازیریخ؟»

عروسی کارتینا نئجه بیر شعر یازماغیمی دوشونوب، داشینمادان دئدیم:

-یازارم. اما بیر شرطی وار.

-خورتدان گلین باجی!یولداشیم خیرخیرایاجان بورج ایچینده دی.

قولاق آسین، دئدیم:

-بیرینجی سؤزوم!…  منیم اؤز آدیم وار. منی اکیز تایی گلین باجی چاغیرین. ایکینجیسی، مگر من دیوان شاعری‌ام کی پول – پارادا گؤزوم اولسون! سیزین یولداشیزین کارت عروسی‌سینه شعر یازاجاغام، آما شرطی بودور کی شعرین آلتیندا منیم آدیم دا یازیلسین. اوخویانلار شعرین کیمه عایید اولدوغونو بیلسینلر.

– آما اکیزتایی گلین باجی! هاردا گؤروبسوز کی کارت عروسی ده یازدیقلاری شعرین آلتیندا شاعیرین آدی یازیلسین؟

-گؤرمه‌میشم. آما بیزه دئین اولسا، بوندان بئله گؤره‌ریخ انشاآلاه!

تئلفون آرخاسیندا کی سس سوسموشدو. سانکی گئنه دیلیمدن بیر تیکان قوپوب،  منی خورتدان گلین باجی چاغیران آدامین اوره‌یینین اورتاسینا دئییل، عضله‌سی‌‌نین دؤره‌سینی آلمیش یاغینا  تیکان تاخیلمیشدی….

۹۲.۳.۱۳

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

«اَکیز تایی»نین تورشمزه‌لری (6)

“کارت عروسی” یوخسا تیکان بیتمیش دیل!

رقیه کبیری
www.ishiq.net

آذربایجان ادبیات و اینجه‌صنعت سایتی

«اَکیز تایی»نین تورشمزه‌لری (6)

“کارت عروسی” یوخسا تیکان بیتمیش دیل!

رقیه کبیری
www.ishiq.net

آذربایجان ادبیات و اینجه‌صنعت سایتی

«اَکیز تایی»نین تورشمزه‌لری (6)

“کارت عروسی” یوخسا تیکان بیتمیش دیل!

رقیه کبیری
www.ishiq.net

آذربایجان ادبیات و اینجه‌صنعت سایتی