ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

mammad qa
منيم بالام هاردادیر

محمد قاضي

بئلي بوكولموشدو؛ گؤزلري ياخشی گؤرمه‌ييردي؛ كوچه‌ده گـئديردي… ياواش- ياواش گـئديردي، ائله ياواش كي، اونو گؤروب گؤرن كيمي، اؤز- اؤزومه دئديم: بو ظالـیم فلك آنالارین چييين‌لرينه نه آغـیر يوك چاتـیر؟

سونرا اونا ياخـینلاشـیب دئديم:

ـ سلام لئـيلا ننه!.

ـ سلام بالا!.

ـ لئـيلا ننه ياخشی سان‌می؟.

ـ ياخشی؟ هه بالام ياخشی‌يام… سن نـئجه‌سن؟ آمما بيليرسن من سني تانـیمادیم ها؟!…

– لئـيلا ننه من رحيمم… رحيم!.

لئـيلا ننه ديل ـ دوداغی آراسیندا زمزمه ائـتدي: رحيم… رحيم…؟! عؤمرونون ايلك بهاریندا، او زامان‌كي نه گلين ايدي نه قـیز؛ لئـيلانـین اري اؤلدو. لئـيلا ننه قالدی بيرده يـئـتيم يـئسيرلري. او يـئري اكدي، يـئـتيم‌لري بؤيوتدو. يـئـتيم‌لر، قوشلارین بالالاری كيمي بير- بير قاناد آچـیب، اوچوب گـئـتديلر. لاكين بير قاراقاش ـ قاراگؤز بالا (آخـیرینجی يـئـتيم) آنانـین يانـیندا قالدی تا ائـوين چـیراغي اولسون، داخمانـین كيشي‌سي اولسون. او دئدي:

آنا قورخما ايشله‌رم سنين زحمتلريني اؤده‌رم، بيزده بير گونه چـیخاریق. آنا قـئـيرتلي بالانی گؤروب گووندي، اوره‌يي‌نـین سولموش چيچكلري طراوتلندي. بالا ايشله‌دي، درس اوخودو، ياخشی‌دا اوخودو، لاپ ياخشی اوخويان بالا، مدرسه‌ده فرانسه ديليني اؤز يانـیندا ائله اؤيره‌نميشدي كي، اونا اوشاقلار بعضن زارافات اوچون عبدالله يـئرينه «فرانسه» دئـييرديلر. لاكين بو خوش گونلر چوخ سورمه‌دي. بيرگون ساواك مأمورلاری مدرسه‌ده اونو ياخالادیلار، آخی او شاهین ضيددينه چـیخـیش ائـتميشدي. ايكي ايل ساواكـین «كميته‌-ي ضد خرابكاري» سئلول‌لاریندا قالدی. بو مودّت آنا آغلار قالـیب، گؤزونو يوللارا تيكدي. بيرگون خبر گلدي عبدالله-ني «ائوين» زندانـینا آپاریبلار، آنا بالانـین، گؤروشونه گـئـتدي:

ـ بالا عبدالله؟.

اوغول گولدو:

ـ آنا ياخشی‌سان؟

 آناـ بالا دويونجا آغلاشدیلار.

سككيز ايلدن سونرا بالا آنانـین يانـینا قايـیـتدي، آنانـین داخماسین ايشیقلاندیردي. لاكين بو چیراق سحره‌دك يانمادی… عبدالله يـئنه‌ده ياخالاندی و بير سحر عبدالله-ني گولله‌له‌ديلر، لئـيلا ننه بو اؤلومو بيلمه‌دي.

منه باخـیب دئدي:

ـ دئدين رحيم؟ هانسی رحيم؟ عبدالله‌نـین يـولداشی رحيم؟ منيم بالام هاردادیر؟ جواب وئر بالا، منيم بالام هاردادیر؟

بو سؤزه جاواب نه اولاردی، سوسدوم… ايچيمده ياندیم!!!

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *