(بو یازی «سوسن خانیم نواده‌رضی»نین وفاتیندان سونرا ائل‌بیلیمی‌نین طرفیندن تبریزده قورولان آغیرلاما مجلیسینده دانیشدیق‌لاریمین تکمیللشمیشی‌دیر و سوسن خانیمین ایتگیسی‌نین ایل دؤنومو موناسیبتیله یئنی‌دن یاییلیر)
«استفن کاوی» تاثیرلی آدام‌لارین عادت‌لری‌نین بیریندن بئله دئییر: آخیردن اوّله گلین. یانی قبریزین باشیندان باشلایین! ایستیرسیز نه سؤزلرله تانیناسیز، قبریزین اوستونه کیم‌لر گلسین، گلن‌لر سیزدن نه‌لر دئسین؟
هله بونو قیراغا قویساق، منجه بیرآز اوندان قاباغا گلک. گؤره‌ک جان وئرنده نه‌لرین یا نه‌یین حسرتی‌له گئده‌جه‌ییک؟ بونا بیرآز فیکیرلشنده بیر سؤز گلیر ذهنیمه: جسارت، جرئت! یانی دونیادان گئدنده دئمییه‌سن ایسته‌دییم ایشه یا ایش‌لره جسارتیم اولمادی، یا سئودییم کیمی یاشامادیم. اینسانین گؤردوگو ایش‌لردن پئشمان اولماسی بیر سؤزدو، اما گؤرمه‌دیگی ایش‌لردن پئشمان قالماسی داها یئکه سؤزدی. بیر اوندا گؤره‌سن چوخ عادی یاشادین و سئودیگین، ها بئله جسارت طلب ائده‌ن ایش‌لری گؤرمه‌میش گئدیسن!
بو اؤن سؤزدن سوسن خانیما چاتاق. نییه اونو توپراغا وئرمک بیزه بئله آغیر گلدی، یئری‌نین بوشلوغو داها آغیر؟ نییه آغنادیق قبریستانلیغا؟ گلین بوردان اوّله گئده‌ک، اونون اوشاقلیغینا قاییداق و نه یاخجی کی اوشاقلیغین بیزه یازیب گئدیب.
«من و اننه‌‌م» کیتابینا باخاندا شیرین شلوغ، طناز بیر قیز اوشاغین گؤروروک؛ هر زادا باش اوزالدیر. اؤز اوشاقلیق شیوه‌سی‌ایله ایشه یاراییر. سورغو- سوال‌لا بؤیوک‌لری ذله ائلییر. هر سؤزو هوه به هوه چینه‌دانینا ییغیب، سورغولاری‌لا یئنه هر زادی سوال آلتینا آپاریر. او اؤز سایاغی‌لا توپلومون کشف ائدیر.
بئله بیر قیزین قاباغیندا ایکی سئچیم وار: یا توپلومون کلیشه‌لرینه اویوب، عادی بیر خانیم اولماغا ساری گئده. سورا دا باشین سالا زندگانلیغین ائلییه. چوخلاریمیزدا بیر استعدادلار وار، انگیزه‌لر وار، اما نئچه‌میز فرقلی یولا اوز قویوروق، یارادیجیلق یولون سئچیریک؟ نئچه‌میز حیاتین عادت فئلینه اویوب اوتوروروق. چوخ چوخوموز توپلومون قورال‌لاریلا یاشاییب، اونون قورقوسونا سیغیشیب، نهایت عاقبت بخیر اولماق میدالین عوام میللت‌دن آلیریق. یاخجی آنا، یاخجی خانیم، یاخجی قیز ایدی دئییلیر بیزه. پَنچر تَیَر کیمی بیر قرار گئدیریک، سورا گؤروروک هئچ یول گلمه‌میشیک. اؤزوموزو یاشامامیشیق! بئله حیاتدا قادین اؤزو غاییب اولور، محو اولور، ائو اوشاغی و ائشی‌له تانینیر.
اما سوسن خانیم اوشاقلیق عالمینده اؤزوندن سوروشور: آخی به من نییه او بیری‌لر کیمی دئییلم. یانی قاریشمیرام او بیری اوشاق‌لارا، عادی آدام اولام!
او اوچ باجی‌نین اورتانجیسی‌دی. اؤزو دئمیشکن بالاجا باجی خیردالیغیندان ایسته‌نیلیر، بؤیوک ده کی عزیز گرامی ساییلیر. بو آرادا قالیر. هر ایشه بو قاچیر، داها چوخ مسئولیت آلتینا قویولور؛ یا اؤزو هرایشه باش اوزالدیر گؤرسون نه وار، نه یوخ. قایغی چکن اولور. کنجکاو، انگیزه‌لی، یاشامین شورو و شرّیندن دولو بو قیز، کلیشه‌لره اویاسیا بنزه‌میر!
نهایت او اوشاق سوسن خانیم اولور. سوسن خانیم غیرعادی یول سئچیر. اؤزوندن چوخ آغیر یوک گؤتورور، توپلومونون، دیلی‌نین، ائلی‌نین قئیدینه قالیر. یازیر پوزور، توپلاییر. مدیر و مدروک بیر خانیم اولور. یئری گلدیکده گؤردویوموز کیمی ورزقان زلزله‌سی اوز وئرنده یاردیم الینه دؤنور و …
اما بو یولون خمیری چوخ سو آپاراندی. هزینه وئرماق، زمان قویماق، جانیندان مالیندان اؤزوندن عائله‌ندن مایا قویماق یولودو. بو یولو گئدن‌لره چوخو احسنت دئییر، آزی آیاق قاباغا قویار. کیشی‌لرین چوخو بئله قادین‌لارا کیشی کیمی‌دیر، دئییب آلقیشلار، اما سیرا اؤز ائو اوشاق‌لارینا گلنده راضیلاشماز اونلار بو یولا گئتسینلر. منفعت‌لریندن بو راحاتلیغا کئچمزلر. خانیم باشین سالیب، ائو اوشاغی‌نین ایشین قاباغا آپارسا یاخجیدی!
ایندی گلین فرض ائلییک همن او قیز اوشاغی نورمال بیر توپلومدا اولسایدی، – قیزلارا دار دون گئیدیریلمه‌ین بیر یئرده، اونو ائله- بونو ائله‌مه‌سی اولمایان، داها دا قول قاناد وئریلن نه کی قاناد قیرتان، قوش حددینه سالینان بیر یئرده اولسایدی- استعدادلاری آرتیق مئیدان تاپیب، داها دؤیوشکن، داها دا ایش بیلن اولوب، داها اوجا یئرلره چاتمازمییدی سیزجه؟
«رومن رولان» «جان شیفته»ده دئییر: سورو نه قده‌ر بؤیوک اولسا یول آپارماسی او قده‌ر راحات اولار! بوتون سیستم‌لر حکومتدن توتدو، دین، سیاست ائیتیم سیستمی، عائله ایچی هاممیسی اینسان‌لاری سورو کیمی یولا گتیرماقدادی. بونلارا سؤزه باخان آدام لازیمدی. آیریجا قاتی توپلوم‌لاردا آیری- سئچگیلیک‌لر قات با قات آرتیر، زنجیری زنجیرین اوستونه گتیریب دارتدیریر اینسانی؛ اوشاغی، قادینی. بئله حالدا ایستییه‌سن اینسان قالاسان، هله قادین اولاسان، تورک بیر قادین قالاسان…
بوردادی کی سوسن خانیم اولماق هر آدامین، داها دوغروسو هر قادینین ایشی دئییل. داها چوخ هزینه‌لر وئریر. مادی معنوی جسمی و بیر یئرده حتی داها جانی بدنی اعتراض ائلیر بو قده‌ر یوک چکمه‌سینه. دا بوردا او عاقبت بخیر اولماقدان خبر یوخدو. بئله اولور کی داغ کیمی سوسن خانیمی الدن وئریریک. ارییب گئدیر الیمیزدن.
بلی دوست‌لار! بیلدیگینیز کیمی بوراسی چتین یئردی. خصوصا تبریزین توپراغی یوموشاق یئرین بئلداری اولانلارین یئری دئییل. بوردا هر ایش قات قات آغیر قاباغا گئده‌ر. بوردا چیچکلنمک چتیندی!
خلاصه کی سوسن خانیمین دیلیندن دئسم، بو شعریم چیخار اورتایا:
آیاق‌لاریمی یئره دیره‌دیم
دیک‌دابان‌لاریم بلکه
بیر گؤز یئر آچسین
قادینلیغیمی جوجرتمگه
بو چتین توپراقدا!
یک پاسخ
سلام
رومن رولان دا فارسجا یازارمیش؟
جان شیفته!