چوخ سئویندیریجی حالدیر کی بؤیوک شاعر، یازیچی و ادبیات خادمی استاد کریم مشروطه‌چی سؤنمز جنابلارینین ۹۵ یاشلیغینی بؤیوک توتور و تبریک ائدیریک و آذربایجان ادبیاتی سماسیندا پارلایان بو سؤنمز اولدوزا اوزون عؤمور و تزه باشارلار دیله‌ییریک. هابئله چوخ سئویندیریجی و روحلاندیریجی حالدیر کی آذربایجان ادبیات خادملری محدودیت‌لر و چتین‌لیک‌لره باخمایاراق بیر یئره توپلاشیب، گؤزل تؤره‌ن قورماقلا قوجامان و اوجامان استاد، کریم مشروطه‌چی‌نین بارلی برکتلی یارادیجلیق سوره‌سیندن تقدیر ائله‌ییبلر: جناب دکتر مرتضی مجدفر، علیرضا صرافی، ائلدار موغانلی، اکبر صالحی، ائلدار صدیق ،حسین ریاضی، اسماعیل هادی و آیری قاتیلانلار، هابئله ادبی قوروم‌لار او جمله‌دن: زریاب ادبی انجومنی، ائل بیلیمی موسسه‌سی، ایشیق درگیسی، ساهر آدینا ادبی درنک، صابر ادبی انجومنی، نامه صدیق درگیسی و آذری مجله‌سیندن سایسیز تشکرلر یئری وار. اللری وار و ایشلری آواند اولسون.
سؤنمز، چاغداش آذربایجان شعری و ادبیاتینین زیروه سینده دایانان لاپ پارلاق اولدوزلاردان بیری‌دیر. اونو برک ال ایله استاد شهریار و بولوت قاراچورلو سهندین کناریندا آذربایجان چاغداش ادبیاتینین اوچ بینووره‌سیندن بیری سایماق اولار. سؤنمزین آخار، درین معنالی، چکیملی و اوره‌ک اوخشایان مصراعلاری حقیقتا آذربایجان ادبی روحونون اینجه‌لیگی، درینلیگی و عین حالدا گئنیش ظرفیت‌لرینی اؤزونده عکس ائتدیریر:
نه قده‌ر گؤزه‌ل‌دیر سئوگی عالمی
هر کسین عشقی وار دئه نه‌یی یوخدو؟!
اوره‌گین واردیسا سن سئوه‌جکسن
عشقی اولمایانین اوره‌گی یوخدو
نه قده‌ر گؤزه‌ل‌دیر محبت سؤزو
محبت سئحر ائده‌ر اوره‌گی، گؤزو
منی سئومه‌ینی سئویرم دوزو
اگر چی الیمین امگی یوخدو
هر کسین عشقی وار دئه نه‌یی یوخدو؟!
سؤنمز عین حالدا، آلچاق گؤیول، قالماقالسیز و ادعاسیز بیر شاعردی. تاسف‌لر اولسون کی اونون دولغون و پارلاق ادبی یارادیجیلیغی آذربایجان ادبی نقد سپهرینده اؤزونه لایق یئر تاپماییب (هانسی ادبی نقد؟!) بونونلا بئله او بو مسئله‌نی وئجه آلمایاراق جوشار بیر بولاق کیمی اوز ایشینده‌دیر، کیم ایچدی کیم کئچدی‌نین فرقینه وارمادان:
صمیمی باخیشام انسان گؤزونده
منی بیر باخیشدا سئچنه منت
بولاغام آخارام بو یئر اوزونده
اییلیب سویومدان ایچنه منت
حیاتا یول آچدیم گره‌ک‌لر اوچون
مقدس آرزولار دیلک‌لر اوچون
بیر آزاد کؤرپویم اوره‌ک‌لر اوچون
منت‌سیز اوستومدن کئچنه منت.
گؤزه‌ل شاعریمیز سؤنمزین بیری بیریندن درین و تکرارسیز اثرلری اصیل آذربایجان دیل و فرهنگینی تمثیل ائده‌رک باکی یا ترکیه دئییشلرینین تاثیریندن اوزاق، آری- آیدین ادبیات اورنک‌لری آرایا گتیریب:
یارانیشیم بوراخیلسا اؤزومه
آی اولمارام او گونش دن پای ایستر
گونش اوللام ائل قیزینار کؤزومه
ایشیغیمدان اولدوز ایستر آی ایستر
شیمشک اولمام چاخان کیمی سؤنر او
ایلک آددیمدا اؤز یولوندان دؤنر او
وجدان اوللام من سوساندا دینر او
هارای چکیب او دا مندن های ایستر.
تاسف‌لو حالدیر کی بارماق سایلاریندان آرتیق اولمایان درگی‌لر و سایت‌لاریمیزدا دا سؤنمز و اونا تای شاعرلره لایقینجه یئر وئریلمیر؛ بونا گوره گئنیش اوخوجو کوتله‌سی اونلاری تانیماقدان و اثرلری ایله ایلگی قورماقدان محروم قالیرلار. ناشرلریمیزین ده تکلیفی معلومدور، هرکس پول وئرسه اثری چاپ اولاجاق، آغینا قاراسینا باخمادان. استاد سؤنمز کیمی شاعرلرین ده اثرلری هابئله. بیر شاعرین شخصی سرمایه‌سی ایله چاپ اولان اثر هارا چاتار؟ یئری وار آذربایجانین ادبی جامعه‌سی خصوصا آذربایجانلی ناشرلر دریندن احساس مسئولیت ائله‌ییب بؤیوک و قالارقی شاعریمیزین اثرلرینی گؤزه‌ل ترتیبات و مکمل شکیلده، گئنیش تیراژدا چاپ و نشر ائله‌سین‌لر(اونلار گئج یا تئز بو ایشین مادی منفعت‌لرینی ده گؤره‌جک‌لر). ائله اولمالی‌دیر کی آذربایجان شهرلرینین معتبر کتابفروشی‌لرینده همیشه سؤنمزین اثرلرینی گؤرمک اولا( نئجه کی خوشبختلیکدن اوستاد شهریارین تورکو اثرلر مجموعه‌سی ایندی بئله‌دیر). آیری بیر طرفدن اوستاد سؤنمزین دگرلی اثرلرینی آلماق، اونلاری اوخوماق، دوستلار، تانیشلار و ادبیات سئورلره ،هابئله عمومی کتابخانالارا پای وئرمک هر بیر آذربایجانلی اوچون باشلیجا فرهنگی بورج ساییلمالی‌دیر.
نه ایسه، بو سوزلره گلمز. بؤیوک، قالارقی و سؤنمز آذربایجان شاعری، گؤزه‌ل روحلو، اینجه دویغولو، آخار قلملی، اوزونو گورمه‌دیگیم، سسینی دویمادیغیم، دی گلدین اوزون ایللر بویوندا یازی‌سیندان، پوزوسوندان، قلمیندن، المیندن بول بهره‌لر آلدیغیم، باجاریقلی شاعر و یاخشی انسان، استاد کریم مشروطه‌چی سؤنمز جنابلارینا اوزون عؤمور و داها آرتیق باشارلار دیله‌ییر، حسین عارفین مصراعلارینی بورج آلاراق دئییرم:
نه یاخشی گورلاییر اصلانین سسی
چاققاللار چکردی جار بو دونیا دا
نه یاخشی یاییلیر گونون شعله‌سی
نه یاخشی «سؤنمز»لر وار بو دنیادا.
