همیشه دویونلرین
گؤزل بیر خالچا کیمی
آوروپادا تابلو
اورتا دوغودا آیاقلار آلتیندا
و آفریقادا حصیر کیمی اولدوغونو دوشونورسن.
آما اونودورسان گؤزه‌ل گؤرونن هر بیر شئی‌ین آلتیندا
گؤزه گؤرونمه‌ین ایشکنجه‌لری.
باخ!
ساده‌جه کراواتین دویونو دئییل
بوغازیمدا
اوتقونا بیلمه‌دیییم اوست اوسته دویونلر وار.
هر گئجه اوتوله‌دیییم کوت شالواریم کیمی
اوتوله‌ییرم گووده‌مین قیریشلارینی
ساریرام یارالارینی
هر سحر کراواتیم قیریب دویونله‌ندیکلریمین اوستونه وورولور
ایندی من دویونلرله آیاقدا قالمیش اؤزوم بویدا بیر دویونم
یا چؤز
یا سوروش
یادا دویونلن گؤوده‌مه
شعر دویونله باشلانیب، آددیم آددیم قاباغا گئدیر. امما هرنه دویونلودور. شعرین سونوندا شاعیر بویدا بیر دویون وار. بلکه دویونلر یاواش یاواش جمع‌له‌نیب و شاعیری دویونه چئویریبلر. شعر بیر مفهوم ارائه وئریر. آمما بو مفهوم مخاطبی فیکره دالدیریر. مخاطب دویونلرین ایچینه گیرمه‌سه بو مفهومو آنلامایاجاق. هر یئر دویونله دولودور و دویون، دولو کیمی یاغیر. مخاطب بو شعرله اؤزدشلیک (همزادپنداری) ائده بیلر. بلکه مخاطبین‌ده یاشامیندا بو شعری اوخویاندان سونرا اونلارا واردیغی باشقا دویونلر وار. شعر باشلانیر، دوزگون قورولوشلا (ساختار) آردی گلیر. بو قورولوش دوزگون اولماسا، مخاطب شعری ایتیرر. اصلن قورولوش دوزگون اولماسا شعر ایتر، یادداشلاردان محو اولار و قالارغی اولماز.
اما اونودورسان گؤزه/ل گؤرونن هر بیر شئی‌ین آلتیندا
گؤزه گؤرونمه‌ین ایشکنجه‌لری.
بوردا بیر دیل اویونو (بازی زبانی) وار. آمما او قدر دوغما و یئرلی‌دیر کی حیس ائدیرسن گرک بئله اولا.
شعر نئچه لایه بیر شعردی. آمما او دره‌دن بو دره‌دن یاپای شکیلده آنلاشیلماز گؤسترسین دئیه کلمه‌لر توپلانماییب. بو بونو گوستریر کی مدرن شعری یالنیز مدرن کلمه‌لر دئییل، بلکه مدرن تفکر یارادیر. چون اگر ساده‌جه مدرن کلمه‌لر اولسا او شعر دئییل بلکه کلمه توپلوسودور.
شعرین مبهم سونو وار:
یا چؤز
یا سوروش
یادا دویونلن گؤوده‌مه
بو قدر دویونو چؤزمک نئجه اولار؟ شاعیرین مخاطبی هانسی سئچه‌نه‌جه‌یه اوستونلوک وئره‌جک؟!
اگر شاعیرین مخاطبی شاعیرین گؤوده‌سینه دویونلنسه؛ دویونله باشلانان شعر، دویون‌له‌ده بیته‌جک…
بو شعر، گئرچک شعردی.
