«اوستالاشدیق بیرآز داها داشی قیرماقدا، دوستو دوشمندن آییرماقدا» (ناظم حکمت)
یازار: خیرالدین فیلیز(Hayrettin Filiz)
چئویرن: علی آغ‌گونئیلی
بهرنگی‌نین اؤلوموندن سونرا، « بالاجا قارا بالیق» آدلی ناغیلی، ۱۹۶۸ـ ده «اوشاق و یئنی‌یئتمه‌لرین فیکیر تربیه‌سی اوجاغی(کانون پرورش فکری کودکان و نوجوانان)» طرفیندن چوخ گؤزه‌ل شکیللرله بیرلیکده، کیفیتلی کاغیذدا چاپ و نشر ائدیلیر. کیتاب اؤز تصویرلری اعتباریله ۱۹۶۸ ـ جی ایلده، ایتالیانین ملت‌لر آراسی «بولونیا» عنوانلی آلتینجی اوشاق کتابی سرگیسی‌نین بیرینجی مکافاتینی و چک‌اسلواکی‌نین ایکی‌ایل‌لیک اوشاق کیتابی تصویرچیلییی موضوعسوندا «براتیسلاوای» مکافاتی‌نین فخری دیپلوماسینی قازانیر. دونیانین ان گؤزل اوشاق کیتابلاریندان بیری کیمی قبول ائدیلن «بالاجا قارا بالیق» ۱۹۶۸ ـ جی ایلده، ایراندا دا، «اوشاق کیتابی شوراسی»(شورای کیتابی کودک) طرفیندن ایلین آن یاخشی کیتابی سئچیلیر. ۲۰۱۴ –جی ایلده «هانس کرستین آندرسن» مکافاتی‌نین آن گؤزل اوشاق ناغیلی بؤلومونده، بو کیتابا چکدییی شکیللره گؤره «فرشید مثقالی»یه مکافات وئریلیر.
بالاجا قارا بالیغین تورکیه‌ده ایلک چاپی۱۹۷۵ ـ جی ایلده، «هاله کونتای(Hâle Kuntay)» ترجمه‌سینده، «آرخاداش کیتابلار» نشریاتی‌نین، «اوشاق سئریسی»نین ۶ ـ جی نومره‌لی کیتابی اولاراق نشر اولونموشدور. کیتاب تورک رسامی و کاریکاتوراچیسی «محمد سؤنمز(Mehmet Sonmez )» طرفیندن شکیللنمیشدیر. رسام، بالاجا قارابالیغا چکدییی شکیللره گؤره، ایکی آیری تصویرچلیک مکافاتی قازانمیشدیر.
قید ائده‌ک کی یادداشلاریمیزا حک اولان بالاجا قارابالیق کیتابی‌نین شکیللری، دونیادا بو موضوعدا چاپ ائدیلمیش کیتابلار آراسیندا، آن یاخشی رسیم‌لر سیراسیندا قبول اولونور.
بالاجا قارا بالیق کیتابی آذربایجاندا «محمدرضا عافیت» طرفیندن آذربایجان دیلینه چئوریلیر. او، کیتابین آدینا صادق قالاراق اونو «بالاجا قارا بالیق» آدی‌لا نشر ائتمیشدیر.
اثرین دونیا سویه‌سینده شؤهرت قازانماسینا، انگلیسجه ترجمه‌‌سی سبب اولموشدور. بو ترجمه‌چی‌لر ده کیتابین آدینا صادق قالاراق اونو «The little Black Fish» آدی ایله ترجمه ائتمیشلر. کیتابی، آلمانجادا «Der Kleine Schwarz Fisch»، فرانسیزجادا «Petit Poisson Noir»، ایتالیانجادا «Il Pesciolino Nero»، سوئد دیلینده «Svarta Fisken Den lille»، روسجادا «Маленькая черная рыба»، چک دیلینده «Ryby Malé černé»، اسپانجادا «Pequeno Pez Negro»، کوردجه‌ده «Biçuk Masireşe»، تورکیه‌ده یئرلی بیر دیل اولان «لاز»جادا «Uça Çxomina» آدلاری‌لا اوخونور. بونلاردان علاوه کیتاب: پشتو، کروات، عرب، تالش، بلوچ، لر و اسپرانتو دیللرینه ده ترجمه اولوبدور.
قایناق: اینترنت
