چئویرن: بهزاد بیات‌فرد (حسرت زنگانلی)
ترجمه: بهزاد بیات‌فرد (حسرت زنگانلی)
بهزاد بیات‌فرد (حسرت زنگانلی)

آذربایجانین مدنی ـ فیکری تاریخی ان اسکی عصرلردن باشلامیش بو گونه قده‌ر یاشاییشینا داوام وئریب. تاریخ بویونجا آذربایجاندا یاشایان تورکلرین دوغال احساس، آیدین دوشونجه و کوتله‌وی حیات تجربه‌لری بوردا جانلاناراق اؤز قاینار باجاریقلاریندان باش توتوب سنه‌لری آرخادا قویوب بیزیم الیمیزه چاتان مدنی- فیکری بؤلوملردن بیریده تولوق اوخشامالاری اولموشدور.
فولکلور فضالاریمیزا بیر باخیش سالاراق، آذربایجان آغیز ادبیاتیندا دولانان تولوق اوخشامالارى اسکى زامانلاردان دیل به دیل _ سینه به سینه دولانمیشسا ایندیسه اونلارین یئرى بیزیم ادبیاتیمیزین باغریندا بوشدور.
دئمه لى بو یئرین بوش اولماسى منه آغیر گله‌رک، نییتیم بو اولدو کى بو اوخشامالارى بیر یئره توپلایام.
خاتین‌لارین و قوجا ننه و گلین‌لرین تولوق اوخشاماسیندان آماجلارى دئمک ده تولوغون آیرانی و کره‌سى‌نین برکتلى اولماغى ایمیش.
اشاغى دا گلن تولوق اوخشامالارى زنگان ماحالیندا ٩٣ کند دن ٩آى ١٣ گونده ١٢٧ ساى دا توپلانیب.
ایندیسه نئچه ساى بو اوخشامالاردان باخیشلارینیزا اتحاف ائدیرم.

زنگان امام کندیندن توپلانان اوخشامالار: (صفیه ننه‌نین دیلیندن آلینمیش)

تولوغوم چالخان یاغ اولسون
کــره‌سى قــایمــاغ اولســون
اؤزگــه یـئــســه درد یئـســین
یولداش یئــسه چـاغ اولسون

تولوغــوم جانیــن درى دیـر
ســنى چالخــایان پــرى دیر
قاپـــى ســـســى گــلـــیــرى
قــاپــى دالـیــنــدا ارى دیــر

تولوغوم ایچین توخ گومان
سنه تاى تولوق یوخ گومان
بیــر ائــل قونـاق گـلمــه‌لى
آیــران کــره‌ن چوخ گومان

زنگان اشاغى ورمزیار کندیندن توپلانان اوخشامالار: (گولو خالانین دیلیندن آلینمیش)

تولوغـوم ائللردن گلیر
دورنـا گؤل‌لـردن گلـیر
سنى چالخایان قـیزگلین
سسى ائــولـردن گــلیــر

تولوغوم چالخان گرک‌دن
سالــما منى چــؤرک‌دن
ال دستامــازلى ایــندى
آسیرام سـنــى دیـرک‌دن

سلطانیه شکورآباد کندیندن توپلانان اوخشامالار: (فاطمه خانیمین دیلیندن آلینمیش)

بو داغین سره‌سى دادلى
آشى‌نین تره‌سى دادلى
تولوغون ایچینده آیران
یئمه‌یه کره‌سى دادلى

کؤووسوم دو یایماق اولماز
برکــتدى سـایماق اولـماز
بئله تامـلى‌دیــر کره‌سى
یئمه‌یى ایله دویماق اولماز

ماهنشان مادآباد کندیندن توپلانان اوخشامالار: (گولگز خانیمین دیلیندن آلینمیش)

سود دیبی تولوق دیبی
قوربانین اولسون بی بی
سود یالا قایماق یالا
قوربانین اولسون خالا

تولوق سنی آسایدیم
یاغلى تاسا باسایدیم
اوغلوم بؤیوک اولاندا
قیلپى قازان آسایدیم

خدابنده امیرلو کندیندن توپلانان اوخشامالار: (رغیبه ننه‌نین دیلیندن آلینمیش)

حرده حرده تولوغوم
ایپک پرده تولوغوم
هرکیم سنی ایسته‌مه‌سه
دوشسون درده تولوغوم

تولوغــوم گـــلیر ائــللردن
باشینا سانجــیب گـوللردن
تولوغومو حاق ساخلاسین
یامان گوز یامان دیللردن

ابهر چرکر کندیندن توپلانان اوخشامالار: (زیورخالانین دیلیندن آلینمیش)

هشتی هوشتی تولوغوم
اوبا کؤشدو تولوغوم
بئى‌لر بیزه قوناقدیر
دولدور تشتی تولوغوم

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

تولوق اوخشامالارى (۱)

بهزاد بیات‌فرد (حسرت زنگانلی)
www.ishiq.net

آذربایجان ادبیات و اینجه‌صنعت سایتی

تولوق اوخشامالارى (۱)

بهزاد بیات‌فرد (حسرت زنگانلی)
www.ishiq.net

آذربایجان ادبیات و اینجه‌صنعت سایتی

تولوق اوخشامالارى (۱)

بهزاد بیات‌فرد (حسرت زنگانلی)
www.ishiq.net

آذربایجان ادبیات و اینجه‌صنعت سایتی