ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

حیوان دوشونجه‌سي
ممد قاضي

 بو خاطيره هئچ واخت منيم ياديمدان چيخماز. من چوبانليق ائد‌ن ايل‌لرين بيرينده‌ ياي ‌فصلي هر ايلده‌كي كيمي «شاه‌وئردي» يايلاغـينا كؤچ ائتديك. من او زامان آتامين يانـيندا كؤمكچي گئده‌رديم. هامي مني «بالاچوبان» سسله‌يردي، بير گون من آتاملا يايلاقدا قويون – كئچي‌لري اوتاريرديم كي، آتام اوزونو منه توتوب دئدي:

ـ بالا چوبان! من داغـين اته‌يينده‌كي كنده گئديرم. آخشام قاش قارالاندا قايـيداجاغام، سورودن ميغايات اول. ايت‌لر ده كي، يانـيندادير. سونرا سوروشدو: تك قورخمازسان كي؟ من بيلمه‌ديم كي، قورخارام يا يـوخ! يالنـيز گولومسه‌ديم. آتام اليني كوره‌ييمه ووروب دئدي: باراكاللا اوغلوم! بيليرديم كي، قورخمازسان، سن داها بير كيشي اولموسان!

آتام گئتدي… آخشام اولدو. من نه قده‌ر گؤزله‌ديم، آتام گلمه‌دي. اؤز- اؤزومه دئديم: ‌حتمن گئجه‌نـين قارانليغـيندا يـولو ايتيريب، هاردان اولسا سحر گلر. اوره‌ييمه قورخو دوشموشدو، ياتا بيلميرديم. ايت‌لر ده ياتميشديلار… بير سس ائشيتديم، گؤره‌سن كيمدير؟- دئديم؛ آدام‌دير، يوخسا جاناوار…

سسله‌ديم: آتا… آتا! جاواب گلمه‌دي. يـئنه هامان سسي ائشيتديم. سانكي بيري حزين سسله آغلايـيردي. دقتله باخديم… قارانليقدا گؤزوم بير بالاجا آيي‌يا ساتاشدي. ايسته‌ديم ايت‌لري هايلايام. ديليم توتولدو. آيي منيم ايكي آدديم‌ليغـيمدا دايانميشدي. بير اليني گؤيه قالديريب، آغلايـيردي. ياخشي باخديم حـيوانـين آياغـينا بير چالغي تيكان باتميشدي. تيكاني آيـي‌نـين آياغـيندان چيخارتديم. آيي آغلاماق سسي‌ني كسيب و درحال اورادان اوزاقلاشدي. منيم حاليم اؤزومه گلدي، قورخودان چيخديم، آمما يـئنه ده يوخوم گلمه‌دي. گئجه ياري‌يا چاتميشدي. قويون‌لار، ايت‌لر ياتميشديلار. آتامدان يـئنه خبر چيخمادي. آي ‌سود كيمي ايشيغـي‌نـي داغ- داشا سالميشدي… يـئنه بير سس قولاغـيما چاتدي. ياخشي باخاندا ايكي آيـي‌نـي گؤردوم. آنا و بالا ال‌لرينده بؤيوك بير شئـي گتيريرديلر. قورخودان ايت‌لري اوياتديم. آيـي‌لار ايت‌لري گؤردوكده ال‌لرينده‌كي شئـيي يـئره قويوب گئري قايـيتديلار. من ياواش- ياواش او شئيه ياخين‌لاشديم؛ بير بال پته‌يي گؤردوم. دئمه، آنا آيي منه بال سؤوقات گتيرميشدي. آخي من اونون بالاسيني آغـير درددن قورتارميشديم. سحر آچيلاندا، آتام گلدي و من اونا ماجراني دانيشديم، آتام گولدو و چوبوغونون توستوسونو گؤيه اؤتوروب دئدي:

ـ اوغول! آنالار چوخ بؤيوك ايش‌لر گؤره‌ر، بال گتير‌ن آيي ‌دا بير آنادير…اوغلوم… آنا!

یک پاسخ

  1. روحو شاد اولسون محمد قاضی نین. ایشیق سایتی نین دولاندیرانلارینا دا عشق اولسون کی بو یازیچی لاریمیزین آدلارینی دیری ساخلاییرلار. محمد قاضی یاشاسایدی یقین بیزیم ادبیاتیمیزدا یئنی بیر گنجعلی صباحی وجودا گله جک ایدی. اونون اوره گه یاتان حئکایه لرینین بعضی نمونه لرینی 1360 و 1361- نجی ایللرده چاپ اولان ” یئنی یول” مجله سینده اوخویا بیلرسینیز. من محمد قاضی ایله فقط بیر ایکی دفعه تئلفونلا دانیشدیم . آنجا اونون لطفو همیشه منه شامیل اولموشدو. او تبریزین ثبت احوال اداره سینده ایشله دیگی گونلرده منیم باجیم تبریز ده سیجیللیسینی دگیشدیرمک اوچون او اداره یه گئدیر . قاضی شناسنامه نین اوستوندن باجیمی تانییر و آتامین آدین چکه رک دئییر: بیز بو شاعیره خدمت ائتمه لییک . وبئله لیکله اوزو اداره نین اوتاقلارینی بیر بیر آرخادا قویوب و باجیمین ایشینی انجام وئریر. اونون بو ایشی هله ده بیزیم عائله ده دئییلیر. بوندان علاوه ماماقانلی معلم داود سلمانزاده ممقانی دا اوندان منه چوخ خوش خاطیره لر تعریف له ییب کی واختیله اونلاری یازاجاعام ان شا الله. محمد قاضی نین خاطیره سی همیشه بیز آذربایجانلی یازیچیلارین یادیندا دیری قالاجاقدیر.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *