۶- هاوام حاققیندا
… بو گئجه منیم هاوام چوخ دا پیس دئییل، باشیمدا بیر آز چن وار، گؤزلریمه دومان چؤکسه‌ده بیر تهر قاباغیمی گؤرورم. اوره‌ییمه هله بیر شئی دامماییب، بلکه بیر نئچه ساعاتدان سونرا بولودلو اولدوم. چترینیز همشه یانینیزدا اولسون.
لوطفن میس قازانی یانینیزدا اولسون بلکه بو گئجه دولو یاغدی مندن، باشینیزا توتارسینیز.
دئیه‌سن گونئی طرفیندن شیددتلی و سویوق یئل اسیر، زنجیرلرینیزی اونوتمایین، مومکوندور شاختا و بورانلی اولام منی اوخویاندا بیر آز ماز یولدان چیخاسیز. اگر ایسته‌ییرسینیزسه سیزی یئل آپارماسین جئبینیزه بیر نئچه داش آتماغی اونوتمایین.
۷- قاسیمسئل
… بیری ایرانسئلی سئویر، بیری چوبانسئلی(مین اوچ یوز قدیمده کند اهالیسی ایشله‌درمیش) من ده قاسیمسئلی. قاسیمسئل دئینده عاغلینیزا ایرانسئلین ساری سیم کارتی دوشمه‌سین. بیزیم قاسیمسئلین هئچ بیر سیمه و کارتا احتیاجی یوخ. قاسیمسئلله بیر یئری توتماق ایسته ییرسنسه، قاقاقاقاقاقاقا دئمه‌لیسن، سونرا دونیانین بوتون قاسیملارینین فئرکانسی بئینینه دوشه‌جک. سن هئچ بیلمه‌یه‌جکسن هانسی قاسیملا ایلگی قوراسان.
من قاسیملارین هامیسیندان چوخ قوش قاسیمی سئویرم، ایکینجیسینی دئسه‌یدیلر سئچ، ازیک قاسیمی سئچردیم. هر حالدا دونیادا هره بیر قاسیمی سئویر، بیری مال قاسیمی، بیری قارغا قاسیمی، بیری چیلخا قاسیمی، او بیری ده پانکی قاسیمی.
ماشاللاه اؤلکه‌میزده او کی چوخدو قاسیمدیر. آنجاق هر آدام قوش قاسیم اولا بیلمز. قاسیملارین دا اؤزلرینه گؤره یئری وار.
ان چوخ آجیغیم گلدیییم قاسیم، اوستاد قاسیمدیر.
۸- فارسی شکردیر
… دوغوردان ایندی باشا دوشدوم کی فارسی شکردیر، یوخسا تورکلرده بو قدر دیابت توتان اولمازدی. آداما زورلا بیر شئیی یئدیردنده، آدام اوغلونا ائله بیر شئی اولار. من دئییرم هئچ اولماسا گونده بیر ایستکان آجی تورک قهوه‌سی ایچین، قورخمایین آجی اولسا دا، هئچ اولماسا بیر آز – ماز بو توتدوغونوز دیابتین قاباغینی آلار. ایش – ایشدن کئچسه قیچلاریمیزی دا کسدیرمه لیییک. قیچیمیز کسیلندن سونرا، بیر اوتاقدا اوتوراراکن، عذاب چکیب، اؤلوموموزو گؤزله مه لیییک.
آدام اوغلو بونو آنلامالی دیر کی شکردن واز کئچمه لی دیر، یوخسا بو دیابت اونو یئر اوزوندن محو ائده بیلر و اوندان هئچ بیر ایز ده قالماز.
۹- یولچو یولدا گرک
ان آغیر دورومداییق، دورولماغیمیزا چالیشساق دا بعضی لری اؤزلرینی لیللندیریب، اؤزلریندن بالیق توتماق ایسته‌ییرلر. بیز لیللنمک نیتینده دئییلیک، بالیقلارلا دا ایشیمیز یوخ! پارادوکسیکال بیر دورومدا یاشاساق دا دورولماغیمیزا چالیشیریق. چیرکینلیکلریمیزی آیدینجا گؤرمک، چیرکینلییمیزی اوزه چیخاردیب، درینلیکلره باخماق ایسته‌ییریک. اوستو اؤرتولو بازاردا آلیش وئریشده اولانلار اینجیمه‌سین. بوراسی دونیادیر داشی قومو اولسا دا، نه قاشیمیز قالاجاق نه ده باشیمیز. نه بوردا هئچ کیم وار نه ده بغداددا. بوردا هامی وار. هیم ـ جیم ائدیب هاییمیزا هارای ایسته‌میریک. باشیمیزی یئره سوخاندا، یئرین آلتیندا کؤکوموزون نه اولدوغونو آنلاییریق. گؤیلره اوچماق. پلمه‌لریزی تاوامیزا سالیب یاغموروزو دا اله کئچیرتمک ایسته میریک. ایستر ایسته‌مز بو یولو کئچیب، کئچی اوتارانلارین اوره‌یینه گلسه ده آرخادا قویمالییق. یولچو یولدا گرک!
۱۰- ننه‌م و سیاست
ننه‌مین فئمئنیستی دوشونجه‌لری، اونو سیاست عالمینه سالدی. ننه‌م چوخ فیکیرلشدی. گؤردو کی مطبخده یئرالما سوغان سویماقلا هئچ بیر ایش گؤره بیلمه‌یه‌جک. زنجان بیچاغینی آتیب، سیاست توفنگینی گؤتوروب دوشدو سیاست مئیدانینا. آتی اولماسا دا، گاوازکی ماتورا مینیب دوشدو مئیدانا. باشلادی مئیدان اوخوماغا.
ننه‌م سیاست مئیدانیندا هونر گؤستردی، بوتون ننه‌لر مئیدانچانین اورتاسینا گلیب، ننه‌می دستکله‌دیلر.
هئچ کیم ننه‌مه قارشی چیخا بیلمزدی، کیشیلر کیشیلنسه‌لر ده، ننه‌مین الینده توفنگی گؤروب، هامیسی سیچان دئشیینی ساتین آلدیلار. سیچان دئشییینده، باشلادیلار سیاست پلانی تؤکمه‌یه. سیچان دئشییندن چیخان سیاست، سیچان قاراسی اولوب، دوشدولر مملکتین جانینا. مملکتین جانی نوخوشلوقدان دورا بیلمیردی. «دور دور» بئیی چاغیردیلار، دئدیلر مملکتی دورغوز. «دور دور» بئی دئدی بو منیم ایشیم دئییل. سیز گرک دانقیل بئیدن کؤمک آلاسیز. گئتدیلر دانقیل بئیین یانینا، او دا دئدی بو ایش قامبول بئیین ایشیدیر. خیلاصه قامبول بئی ده دئدی بو جانقول و رانقول بئیین ایشی دیر….
خیلاصه کیشی لردن بیرینده هئی اولمادی، هئیوا ننه ننه می خبردار ائتدی. ننه مملکتین وضعینی گؤروب تئز یارپیزلا کهلیک اوتو دمله دی وئردی مملکت ایچدی سونرا مملکتین حالی جورلاندی. واللاه دوز دئییرم یالان دئیه نی سیچان یئسین.
