قاشقایلی صنعتکار «پروین بهمنی» حیاتلا وداعلاشدی
چئویرن: پروین بهمنی
ترجمه: پروین بهمنی
پروین بهمنی
00:00
00:00

چوخ تاسفله، گؤرکملی فولکلور تدقیقاتچی و خواننده‌سی قاشقایلی پروین بی‌بی بهمنی مهر آیی‌نین ۲۹-نجی گونو آغ جییار کانسری سببیندن ۷۲ یاشیندا حیاتلا ابدی‌لیک وداعلاشدی.
گؤرکملی ائل صنعتکاری و خالق موسیقی تدقیقاتچیسی «پروین بی‌بی بهمنی»نین اؤلومو فولک موسیقی صنعتینه خصوصیله‌ده قاشقای موسیقی و اینجه صنعت اجتماعیاتینا بؤیوک بیر ایتگی‌دیر. «ایشیق»- آذربایجان ادبیات و اینجه صنعت سایتی امکداشلاری آدیندان بو ایتگینی موسیقی صنعتی جمعیتیمیزه، قاشقای ائلینه، خصوصیله ده ده‌یرلی صنعتکارین حؤرمتلی عائله‌سینه باش ساغلیغی وئریر، خاطیره‌سینی عزیزله‌ییریک.

***

پروین بهمنی ۱۳۲۸-نجی ایل فیروزآبادین(فارس ایالتی) جایدشت قیشلاغیندا قاشقایلی بیر عائله‌ده دونیایا گؤز آچمیش، اوشاق یاشلاریندان آتاسی(غلامرضاخان بهمنی)ایله برابر موسیقی و شعر مجلیسلرینده اولموش و بو واسیطه‌ایله قاشقای فولکلور نغمه‌لری‌نین تانینمیش صنعتکاری سوییه‌سینه یوکسلمیشدیر. ابتدایی مکتبی بیتیردیکدن سونرا اورتا مکتبده بیر چوخ قاشقایلی‌لار کیمی «عشایری دانشسراسی»نا داخیل اولور و دانشسرانی بیتیردیکدن سونرا اون آلتی ایل مدتینده قاشقای ائلینده معللیم‌لیک ائدیر و معللیملیک‌له برابر موسیقی صنعتی‌نین خصوصیله ده خالق موسیقیسی‌نین سیرلرینی محمدحسین کیانی، حبیب‌خان گرگین و محمدقلی خورشیدی کیمی اوستادلارین نزدینده اؤیره‌نیر.
پروین بهمنی ایران موسیقیسی ردیف‌لرینی ایکی ایل مدتینده تهراندا «هنگامه اخوان» و «مرتضی شریف»‌دن اؤیره‌نیر، سونرا ایسه ایکی ایل ایتالیادا موسیقی تحصیلاتینی تکمیللشدیریر. ۱۳۷۲-نجی ایلدن قاشقای موسیقی گروپونون باشیچیسی کیمی «آینه آواز» فستیوالیندا ایلک اورکستراسیون ایفاسینی اجرا ائدیر. سونرالار مستقل گروه کیمی اؤلکه مقیاسیندا مختلف ایفالاری اولور و نهایت ۱۳۸۰-نجی ایلدن «حاوا موسیقی گروهونو» تشکیل ائده‌رک بو گروهون چرچیوه‌سینده بیر چوخ کونسئرتلر ایران، روسیا، آلمان، دانمارک، قزاقستان، ایتالیا، تورکیه، تاجیکستان، امارات و …دا کئچیریر.
پروین بهمنی تانینمیش ائل صنعتکاری کیمی ایفا ائتدییی «لایلالار»لا خصوصیله ده «منیژه حکمت»‌ین رئژیسورلوق ائتدییی «سه زن» فیلمینده ایفا ائتدییی «لایلالار»لا داها دا آرتیق شؤهرت قازانیر. اونون بو ایفاسی نه اینکی ایران چرچیوه‌سینده، باشقا اؤلکه‌لرده ده گئنیش رغبتله قارشیلانیر و قاشقای موسیقیسی‌نین یاییلماسیندا و تانینماسیندا جیددی رول اویناییر. بونون اوچون ده مختلف مکافاتلارا و فخری آدلارا لاییق گؤرونور. او جومله‌دن:
– بیرینجی درجه‌ده فخری دوکتورا (مدنیت ناظرلییی)؛
– دونیا تورک مدنیتی‌نین فخری قادین صنعتکاری (آتاتورک دانیشگاهی)؛
– پروین بهمنی آدینا تورکیه‌نین گیرئسون دانیشگاهیندا کئچیریلن موسیقیچیلر فئستیوالی؛
– اؤلکه‌نین موسیقی زمینینده سئچیلمیش آلتی قادینیندان بیری؛
– ایران اینجه‌صنعت وئترانلاری موسسه‌سی‌نین عضوی؛
– دونیا تورکلری‌نین سئچیلمیش مدنیت خاتینی؛
– اؤلکه‌نین گؤرکملی سیمالاری درنه‌یی‌نین عضوی؛
– اؤلکه‌نین سئچیلمیش صنعتکاری؛
– و … سایر.
پروین بهمنی اوزون ایل‌لر ایران و تورک فولک موسیقیسی اوزه‌رینده تدقیق‌لر آپارمیش و بیر چوخ مقاله‌لرین و کیتابلاری موللیفی و موللیف هئیاتی‌نین امکداشی کیمی فعالیت ائتمیشدیر. او جومله‌دن:
– پروفسور علی کافکاسیالی ایله امکداشلیقدا آلتی جیلدلیک «تورک موسیقیسی، ادبیاتی و مدنیتی حاققیندا»؛
– «ایران اویونلاری ائنسیکلوپئدیاسی» موللیفلر هئیاتی عضوی؛
– «ایران بؤلگه‌لری موسیقی ائنسیکلوپئدیاسی»نین موللیف امکداشی؛
– «ایرانین سیملی و ضربی آلت‌لری ائنسیکلوپئدیاسی»نین موللیف امکداشی؛
– «اصلی و کرم منظومه‌سی»نین موللیفی؛
– «قاشقای صنعتکارلارینین بیوگرافیالاری»نین موللیفی؛
– «گؤرکملی قاشقای قادینلاری»نین موللیفی؛
– «قاشقای عاشیقلارینین موسیقیسی» کیتاب و اوچ آلبوم؛
– «قاشقای ماهنی‌لاری» (تدقیقی آلبوم) محمدحسین کیانی ایله برابر؛
– «آللاهیم من غریبم» آلبومو؛
– «فرودون خاطیره‌سینه» آلبومو؛
– «قاشقای‌لارین ناغیللی لایلالاری»
– و بیر چوخ دیگر اثرلر.

«ایشیق»- آذربایجان ادبیات و اینجه صنعت سایتی
۳۰/۰۷/۱۴۰۰
.

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اوخوماق زامانی: 2 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

قاشقایلی صنعتکار «پروین بهمنی» حیاتلا وداعلاشدی

پروین بهمنی
www.ishiq.net

آذربایجان ادبیات و اینجه‌صنعت سایتی

قاشقایلی صنعتکار «پروین بهمنی» حیاتلا وداعلاشدی

پروین بهمنی
www.ishiq.net

آذربایجان ادبیات و اینجه‌صنعت سایتی