تانینمیش آذربایجان یازیچی و ژورنالیستی و صابر ادبی انجومنی‌نین اداره هئیتی عضوی دوکتور مرتضی مجدفر تعلیم تربیه ساحه‌سینده ۴۰ ایلدن آرتیق آردیجیل چالیشماسی و ۱۲۰ عنوان فارسجا و تورکجه کیتاب نشر ائتدییی اوچون، «استاد حسین وحیدی»‌نین آدینی داشییان علمی مکافاتلا تلطیف ائدیلدی.
اسفند آیی‌نین سکگیزینده کئچیریلن بو تدبیرده دوکتور مرتضی مجدفرله برابر دوکتور عادل یغما و دوکتور علیرضا رجالی‌‌ ده همن مکافاتا لاییق گؤرونموشلر. دوکتور مرتضی مجدفر مکافاتی آلارکن اؤز قیسا دانیشیغیندا دئدی: «ماراق و هوس یاراتماق هر یاشدا، هرکس اوچون اؤنملی‌دیر. صاباحدان داها انئرژیلی چالیشاجاغام. سؤز وئریرم کی، گلن ایل، علمی اثرلر یاراتماق ساحه‌سینده، حیاتیمین ان ثمره‌لی ایلی اولاجاقدیر. آلتمیش یاش تامام اولان بیر ایل!»
آرتیرمالی‌ییق کی، «استاد حسین وحیدی» ۷۷ ایل اؤلکه ساحه‌سینده معلم‌لیک ائتدیکدن سونرا ۹۷ یاشیندا بو ایل حیاتا گؤز یومموشدور. اونون آدینی داشییان مکافات سروش تحصیل مرکزی طرفیندن جناب شیرازی‌نین باشچیلیغی ایله تعلیم ‌و ‌تربیه ساحه‌سینده چالیشان آدلیم شخص‌لره وئریلیر.
ایشیق امکداشلاری آدیندان حؤرمتلی دوکتور مرتضی مجدفری تبریک ائده‌رک، اونا علمی ایشلرینده داهادا اوغورلار آرزو ائدیریک.