گون گلدی آی دولانـدی
یاز گئچـدی یای دولاندی
پاییز چاتدی نه چاتـدی !
یئل سسیـنی اوجالـتـدی
باغچالارین، بـاغـلاریـن
بوستانلاریـن، تـاغـلاریـن
اؤز حؤکمونو یئـریـتـدی
قانـادلاریـن قـوروتـدو
سویوق دوشدو داغـلارا
قونـدو خـزل بـاغـلارا
یاشیل شالین آچدی داغ
دوزَنـمه دی باغچـا بـاغ
باغدا دونون چیخارتـدی
خزل دیـشین آغارتـدی
قیش پاییزی خوشـلادی
داغدا قـاری بـاشـلادی
قیش داغا قـار سـرنـده
پـاییز بـئـلـه گـؤرنـده
گوردو وئریب تختیـنـی
دانـلادی اؤز بختـیـنـی
چوخ چالیشدی اولمادی
آرزولاری دولــمـادی
اولدو پاییز کؤچمـه‌لـی
اؤز حققیندن کئچـمه‌لی
قیش پاییـزی قـاتـلادی
پاییز یاندی چـارتـلادی
عُؤمرو باشا چاتمـامـیـش
باشین آچیب یاتـمامیش
آلدی عؤمرون احـتـیـاج
اولدو پایـیـز نـا عـلاج
قالدی یاریم جان قالدی
قیش میدانـی دولانـدی
×××
کوشولدادی چـاغـلادی
گَدیکـلـری بـاغـلادی
یول یولاغی کـسـدی او
اؤز کئفی تک اسدی او
قیش چالخانا ـ چالخانـا
دؤندو قودوز دوشمانـا
مکتبـه یـول اولـمـادی
اولمـادی کی اولمـادی
اوشاقلار ائوده قـالـدی
ائوده سس کوی اوجالدی
اوشاق، بؤیوک هامیسی
بیر ـ بیره قاتدی سسـی
هامی دئدی یـاز گـلـه
یازدا کئفی ساز گـلـه
سون قویا قیش عؤمرونـه
یاز یایا فرمـان یـئـنـه
کیچیک چیلله قوتارجاق
یاز یئره ساچدی ناچاق
ائتدی قیشـی مـسـخـره
بورنونو سورتدو یئـره
قیشین قارین، بوزونـدا
سویوقوندا، سوزونـدا
ائـتـدی مـلایـم بـاهـار
قالدی او جور قیش ناچار
بوتون قارلار سـو اولـدو
قور ـ‌قوبویه دولونـدو
دؤزمه‌دی قیـش آغـلادی
داغدا قـارا بـاغـلادی
دانـلادی داغ داشـلاری
قیش گؤزونون یاشلاری
یاز یاغیشی دئـیـیـلـدی
تورپاق بوتون آییلـدی
قار آلتدا بیتدی چیچـک
داغلارا اولدو لئـچـک
×××
باغ باغـاتـدا اویـانـدی
شهـامـتـلـه دایـانـدی
چیچک آچدی گول آشدی
گول یارپاغا دولاشـدی
گؤیدن سازین ائندیـردی
گول بولبولو دیندیـردی
قـوربـاغـالار سـولاردا
سس اوجالتـدی اونلا ردا
دَیدی بوتون سس سسـه
هلیک لر دوشدو بحثـه
قاققیلداشـدی داغـلاردا
بولـبـولـرده بـاغـلاردا
چهچه ووروب اوخـودو
گول چیچکلر قوخـودو
عطیر سپـدی هـر یـئـره
پیچیلدادی بیـر ـ بیـره
شاعیر اولا ایندی کـاش
دینله‌یـه یاواش ـ یاواش
بو نغمه نی بـو عـطـری
بو چلنگی بـو چـتـری
شعر ایپیـنـه تـوخـویـا
اوشـاقـلارا اوخـویـا
آرزولایـا یـاز عؤمـرون
یازین کئفی ساز عؤمرون
یازا اوشـاقـلار اوچـون
کؤچورده قیشین کؤچون
“سئل اوغلو”یا بیـلـدیـره
اوشاقـلاری گـولدوره
یادا سالا کئچمیـشـیـن
چارتلادا عؤمرون قیشین
