جمال میرصادقی
چئویرن: ع. آغ‌ گونئیلی
ترجمه: ع. آغ‌ گونئیلی
ع. آغ‌ گونئیلی

آقا وثاغی دایانیر؛ اطرافینا باخیر؛ حیوان یوخدو. اوٍره‌کدن سئوینیر. آددیم‌لاری یوٍنگوٍللشیر، ائوینین قاباغینداکی اقاقیا آغاجی‌نین یانیندان کئچیر. اقاقیا آغاجی‌نین تومورجوق‌لاری آچیب و بوٍتوٍن بوداقلارینی، خیردا و پارلاق یارپاقلار بوٍروٍیوٍبدوٍر. سانکی آغاج، یاشیل یانان چیراقلارلا بزه‌نیبدیر.
آقا وثاقی ماشینینا ساری گئدیر. رولون دالیسیندا اوتورور و گوٍزگوٍده اؤز سیر- صیفتینه باخیر. اوٍره‌یینده‌کی سئوینجی و شادلیغی بیردن- بیره یوخ اولور. ماشینی‌نین قاپیسینی باغلایانادک، حیوان چاغریلمامیش بیر قوناق کیمی ماشینا آتیلیر و آرخا صندلی‌ده یئرلشیر.
آقا وثاقی عصبی‌لیکله اییلیر. اختیارسیز اولاراق، الی، آیاغی‌نین آلتینداکی اولان دمیر میله‌یه ساری گئدیر؛ آنجاق اونون باخیشی، ائوینین قاباغینداکی چیلچیراق کیمی یانان اقاقی آغاجینا ساتاشیر. او، الینی دالی چکیر، دوٍزه‌لیر یئرینده اوتورور. ماشینی ایشله‌دیر، یولا دوٍشوٍر.
آقا وثاقی گوٍزگوٍده حیوانی گؤروٍر. او، ازگین و حوصله‌سیز، ماشینین آرخا صندلیسینده سره‌لنیب، یورغون و یوخولو باخیشینی ائشییه تیکیب‌دیر. ال- آیاغی تیتره‌ییر، خسته‌لیک ایزلری، اونون بوٍتوٍن بدنینده گؤروٍنوٍر.
آقا وثاقی شهردن ائشییه گئده‌ن یولا دوٍشوٍر. او دوٍشوٍنوٍر کی، «اؤتن جوما گوٍنوٍ عجب یاخشی هاوایدی، گوٍن چیخمیشدی، هاوا ایستی ایدی. یاخشی یاپیشیردی. یاخشی اولار یولداشلارین هامیسی گله. اؤتن هفته، نئچه نفری گلمه‌میشدیلر. اونلارلا اولاندا آدام راحات نفس آلیر و اؤروٍنده دیری‌لیک حیس ائدیر. قریبه ایرنج یاشاییشیمیز واردیر. گئجه‌لر چاخیر ایچمک‌دن، قومار اویناماقدان لاپ داها چوٍروٍموٍشدوٍم. نه بیر زاد اوخویوردوم، نه بیر یئره گئدیردیم، نه کیمسه‌نی گؤروٍردوٍم؛ آللاه کسسین…» آقا وثاقی حیوانین خورولتوسونو ائشیدیر، بئزمیشجه‌سینه گوٍزگوٍدن اونا باخیر. بولاشیق باش‌دان- آیاغا حیوانی باسیب‌دیر. او خورولدایارکن یوخودا اؤزوٍنوٍ قاشیییر. بیرینجی دؤنه دئییل کی، او ماشیندا یوخلاییر. آقا وثاقی بیر هفته‌نین ایچینده، اوٍچ- دؤرد دؤنه اونون یوخولاماغینی گؤروٍبدوٍر. آنجاق حیوانین خورولتوسو، بو دؤنه هر دفه‌کیندن اوجادیر؛ سانکی آغیر بیر یوخویا گئدیب‌دیر. اویاق اولان واختدا اؤزوٍندن شیدتلی بیر ماراقلانما گؤستریر. خیردا گؤزلرینه قریبه بیر حالت وئره‌رک، خیره‌لنیر و آقا وثاقی‌نی شاشقینلاشدیرارکن، بیر مقاما چاتدیریر کی، آقا‌وثاقی کؤهنه و موٍندار بیر پارچا کیمی، اونو ماشیندان ائشییه آتماق ایسته‌ییر.
نئچه آی اوّل، آقا وثاقی، سحر ائودن چیخدیقدا، حیوان اونون دالیسیجا آتیلیر ماشینا مینیر؛ آرخا صندلی‌ده یئرینی راحاتلاییر. آقا وثاقی هر نه قده‌ر چالیشیرسا، حیوانی ماشیندان ائشییه چیخارا بیلمیر. او چاره‌سیز قالاراق رولون دالیسیندا اوتوروب و ایداره‌یه گئدیر. ایداره‌نین پارکینگینده ماشینین قاپیسینی آچیق قویور، بلکه حیوان چیخیب گئده و اونون شرری کسیله. آنجاق، آخشام اوٍستوٍ ایداره‌دن قاییتماق ایسته‌ینده حیوان تاپیلیب گلیر. او ماشینین آرخا صندلی‌سینده اوّلکی یئرینده اوتورو. آقا وثاقی اونو ماشیندان ائشییه چیخارماغا چالیشیر. آنجاق حیوان چیغیر- باغیر سالیر. آقا وثاقی قورخوسوندان اونو بوراخیر، ماشینا مینیب و سوٍرعتله پارکینگدن چیخیر. سایخاش بیر یئره گئدیر. ماشینی ساخلاییر، دوٍشوٍر. حیوانی، دؤیمکله ماشیندان چیخارسین دئیه، آغاجدان بیر شوو قیریر. حیوان های- بیدیریق سالاراق دیره‌نیش گؤستریر.
آقا وثاقی حیوانی ماشیندان ائشییه چکیر، آنجاق حیوان اونا سوواشیب و بوراخماق ایسته‌میر. اولایاراق آقا وثاقی‌نین دؤوره‌سینه دولانیر و های- کوٍی سالیر. آقا‌وثاقی یئردن بیر داش گؤتوٍروٍب و اونون باشینا چیرپماق ایسته‌ییر. حیوان سیچراییر و جلد آقا‌وثاقی‌نین کوٍره‌یینه قالخیر. جایناقلاریلا اونون بوینونو سیخارکن کوٍره‌یینه مؤحکم بیر ضربه وورور. آقا‌وثاقی‌یه بوغولماق حیسّی ال وئریر. قوللاری یانینا دوٍشوٍر، داشی آتیر، دیزلری اوٍسته اوتورور، ناله‌سی اوجالیر.
قورددان دؤنمه ایت یئکه‌لیکده بیر حیوان‌دیر. حرکت‌لری جلد و یوٍنگوٍل بدنی‌نین عوٍضولری مؤحکم و قوٍدرتلی‌دیر. آقا‌وثاقی ایلک گوٍنلر ائله دوٍشوٍنوٍردوٍ کی، حیوان ایتین موٍختلیف نیژادلاری‌نین بیرینده بیر حیوانشوٍناسلیق سؤزلوٍیوٍنده ایت نیژادیندان اللی‌یه قده‌ر آد آپاریب‌لار و هر نؤعوٍن‌ده بوٍتوٍن خصوصیاتینی گئنیش شکیلده ایضاح ائدیبلر.‌ آقا‌وثاقی حیوانین خصوصیاتینی بوٍتوٍن اللی نؤعوٍن دا خصوصیاتی ایله توتوشدورور و باشا دوٍشوٍر کی، حیوانین ایت‌لره اوخشارلیغی دانیلمازدیر، آنجاق بو اوخشارلیق اوٍزدن کئچمه اوخشارلیقدیر.
حیوانین دوٍزگوٍن خصوصیاتی، ایتین موٍختلیف نیژادلاری‌نین هئچ بیرینده یوخدور. حیوانین داورانیشیندا، ایتین داورانیشینا قریبه بیر اوخشارلیق وار؛ خوٍصوصیله تزه پالتارلی، فوکول باغلایان آدام‌لارین قارشیسیندا یالتاق‌لانماسی. حیوانین باشقا خصوصیت‌لریندن بیری ده ایکی آیاغی‌نین اوٍستوٍنده یول گئتمه‌سی‌دیر. ایری- بوروق قیچ‌لاری‌نین اوٍستوٍنده یول گئد‌نده باشینی یوخاری قالدیریر، سینه‌سینی قابآقا وئریر. سانکی یول یئریمه‌سینی تاماشایا قویماق ایسته‌ییر. باشقا خصوصیت‌لری‌نین بیری ده بودور کی، اؤزوٍندن جوٍر به جوٍر گورکم‌لر نوٍماییشه قویور. جوٍر به جوٍر مؤوقع‌لرده اؤزوٍندن بیر سفیل وضعیت‌لر گؤستریر. وضعیت‌لره اویغون اولاراق، بوغازیندان انایین بیر سس‌لر چیخاریر. بو سس‌لر، بعضی واخت یومشاق و التماس ائدیجی و بعضی واخت‌لار دا کوبود و زوربالیغی ایفا ائده‌ن سس‌لر ایدی.
آقا وثاقی چاش‌باش ووراراق باشینی ایتیریر، نه ائده‌جه‌یینی بیلیمر. نه ایسه اونون چاش‌باش اولماغینا حیوانین قریبه بیر حسّاس‌لیغی وار. آقا‌وثاقی نه قده‌ر چاش‌باش وورور، عصبی‌لشیرسه حیوانین کوٍنجکاولیغی بیر او قده‌ر شیددت‌لنیر. سیمیتانلیقجا هر یئردن اونون دالینا دوٍشوٍر. دیققت‌له، اونون سؤزلرینه قولاق آسیر و ایش‌لرینه ده قاریشیر. سانکی ائشیتدیک‌لرینی و گؤردوٍک‌لرینی یادیندا ساخلاماق ایسته‌ییر.
آقا وثاقی بیر- ایکی دؤنه اؤزوٍندن چیخاراق چیغیرتیسی اوجالیر، آنجاق بو چیغیرتی فایداسیزدیر، گئت- گئده حیوان جسارت‌لنیر و اونون ایش‌لری‌نین قارشیسیندا کوٍنجکاولیق گؤستره‌رک، موٍزاحیمتی چوخالیر. هردن بیر نئچه ساعات آقا‌وثاقی‌نی اؤز حالینا بوراخیر، اؤزوٍ ده گؤزدن ایتیر. آنجاق، آقا‌وثاقی بو آزادلیغین تامینی دادیب- دادمامیش یئنی‌دن تاپیلیب گلیر. ماشین‌دا اؤز یئرینده اوتوروب تام کوٍنجکاولیقلا، اونون داورانیشینا دیققت یئتیریر. اونون گل- گئت‌لرینه باشقالاری ایله اوتوروب دوروشوغونا، نیظارت ائده‌‌رکن اونون ایداره‌سینی ایسه اؤز الینه کئچیریر.
آقا وثاقی یاواش- یاواش باشا دوٍشوٍر کی، جاماعاتین دا چوخو اونون دردینه دوٍشوٍبلر. آنجاق حیس ائدیر کی، چوخلاری اؤز دردلرینی آغیر بیر خسته‌لیک کیمی خورا خسته‌لییی کیمی بیر- بیریندن گیزله‌دیرلر. و هانسی سببلره گؤره ایسه خوشلامیرلار کیمسه اونلارین دردیندن باش چیخارسین. بیر دفه، تانیش‌لارین بیری‌نین ائوینده اوزون قورویوجوسو حیوانا بنزه‌ر بیر حیوان گوروٍر. آنجاق اونون حاققیندا دانیشماق ایسته‌ینده تانیشین رنگی آتیر. اؤزوٍنوٍ بیلمه‌مزلییه ووررارق، ائوینده‌کی حیوانین وارلیغی‌نی یئرلی- دیبلی دانیر.
بیر دؤنه ده ایش یئرینده ایذین‌سیز اولاراق ائله باش موٍدیرلری‌نین ایش اوتاغینا گیریر. بئله گوٍمان ائدیر کی، تئلفونلا دانیشمآقا مشغول اولان باش موٍدیر جناب‌لاری‌نین یئرینده اؤزوٍنوٍن قورویوجوسو اولان حیوانا بنزه‌ر بیر حیوان اوتوروب‌دور. خوٍصوصی ایله اونون گؤزلرینده اولان حالت‌لرده و گؤرکمی‌نین حرکتینده اونون قورویوجوسو اولان‌حیوانین گوزلرینده‌کی حالته و گؤرکمینده حرکته قریبه بیر اوخشارلیق وار. آنجاق، آقا‌وثاقی‌نی گؤره‌ن کیمی اونون گوزلری‌نین و سیر- صیفتی‌نین حالتی دییشیلیر. حیوان، باش موٍدیر جناب‌لاری‌نین وارلیغینا هوپور و ایتیر. باش موٍدیر جناب‌لاری ال- آیاغینی ایتیره‌رک تئلفونون دسته‌یینی یئرینه قویارکن چوخ عصبانیت‌له آقا‌وثاقی‌نین باشینا چیغیریر و دئییر نه اوٍچوٍن ایجازه‌سیز اونون اوتاغینا گیریب‌دیر؟
آقا وثاقی یاواش- یاواش اوخشارلیقلاری سئچه بیلیر. اونون ظنّیجه امکداش‌لاری‌نین و ائله‌جه ده اورادا- بورادا گؤردوٍیوٍ جاماعاتین بیر عده‌سی‌نین داورانیش‌لاری‌نین و گؤزلری‌نین حالت‌لری، اونون قورویوجوسو اولان حیوانین، گؤزلری‌نین و داورانیشی‌نین حالتینه بنزه‌ییر. سانکی اونلارین وارلیغینا بیر حیوان گیریب‌دیر. لاپ قریبه‌سی بوراسیندادیر کی، آقا‌وثاقی گوٍزگوٍده اؤزوٍنوٍ گؤرنده، حیوانین بعضی حالت‌لرینی، گؤرکمینی اؤز- اؤزوٍنده ده گؤروٍر. آقا‌وثاقی تزه یویولموش کؤینه‌یینده بؤیوٍک و کیفیر بیر بیت گؤره‌ن کیمیسه کیمی بیردن- بیره دیکسینه‌رک گؤزلری خیره‌لنیر.
حیوانین عنادی و جسورلوغو گوٍن به گوٍن آرتیر و اؤزوٍنوٍ آقا‌وثاقی‌نین ایش‌لرینه قاتیر. آقا‌وثاقی اینسانی سربست‌لییی‌نین الدن وئردییینه گؤره، ائله‌جه ده اوٍره‌یی ایسته‌دییی کیمی ایش‌لره ال وورا بیلمه‌دییینه گؤره داها اؤزوٍنه فخر ائده بیلیمر.
ازه‌ل گوٍنلرده، چوخ حیله و فندیله اونون شرریندن قاچماق ایسته‌ییر. آنجاق حیوانین موٍزاحیمتی آرتیر و حیوان داها آرتیق اؤزوٍنوٍ اونا یاخین‌لاشدیریر. آقا‌وثاقی حئیوانین شرریندن قورتارسین دئیه، هر بیر زادا ال آتیرسا دا آنجاق موٍفّق اولا بیلمیر. نهایتده اومودو اوٍزوٍلرکن حیوانی اونوتماق اوٍچوٍن ایچگی‌یه اوٍز گتیریر. آنجاق بیر گئجه دهشت‌لنیر. بیر گئجه آقا‌وثاقی تیریاک و ‌قومار مجلیسیندن قاییدارکن، حیوان اوندان آسلاناراق وار گوٍجوٍ ایله اونون جانینا گیریب و اونونلا بیرلشمه‌یه چالیشیر. آقا‌وثاقی واختیله حیوانین باش موٍدیرین جانینا گیرمه‌سینی خاطیرلاییر. جانینا تیتره‌تمه دوٍشوٍر. او وار گوٍجوٍ ایله حیوانی یئره چیرپیر و تپییی‌نین آلتینا سالیر، حیوان قاچیر و‌نئچه ساعات اونو راحات بوراخیر.
ائرته‌سی گوٍن، آقا‌وثاقی کیتابخانایا گئدیر. اورادا باشا دوٍشوٍر کی، حیوان کیتاب اوخوماغی خوشلامیر. آقا‌وثاقی کیاب اوخودوغو واخت‌دا اونون داورانیشیندا حؤوصله‌سیزلیک دویولور.
نئچه گوٍندن سونرا، آقا‌وثاقی سئویملی قدیم یولداش‌لاری ایله چؤله چیخاندا، یئنه ده او حالت‌لر، حیوانین داورانیشیندا تاپیلیر. آقا‌وثاقی ده سؤنوٍب یادیرغامیش شادلیق و سئوینج‌لر، بیر داها باش قالدیریب اویانیر. او کیتاب اوخویور، اوٍره‌یی ایسته‌دییی قدیم یولداش‌لاری ایله اوتوروب- دورمآقا باشلاییر. داها، اوّلکی‌لر کیمی ایداره امکداش‌لاری‌نین ائوینه گئتمه‌یه اورادا تیریاک چکیب، قومار اوینامآقا ماراق‌لانمیر.
تعطیل گوٍنلرینده ماشینی‌نی گؤتوٍروٍر، ییغینجاق یئرلرینه گئدیر. ییغینجاق یئرلری، شهردن ائشیکده، سایخاش بیر یئردی. یولداش‌لاری اورایا ییغیلارکن شانلی و طنطنه‌لی کئچه‌جک‌لرینی خاطیرلایاراق، چوخ اوٍمیدوارلیق‌لا آیدین گله‌جه‌یین حاققیندا‌ دانیشیرلار. هم ده هردن- بیر اونلارین اوٍره‌ک‌لرینده تزه آرزو- دیلک‌لرینی اویادان بیر ماهنی اوخویوردولار.
آقا وثاقی بیر دره‌نین قیراغیندا اوتوروب. او، آشاغی‌دا آخان سویون، اوٍره‌یی اوخشایان شیریلتی‌سینا قولاق آسماغی سئویر. حیوان بیر قیراق‌دا بوٍزوٍشوٍب، موٍرگوٍله‌ییر. یاخود اویان- بویانا وورنوخور، اولاییر. کئچمیشده اولدوغو کیمی داها اونون داورانیشیندا کوبودلوق قالمامیشدی. دئمه‌لی، او زهمینی و‌ گوٍجوٍنوٍ الدن وئرمیش قوجا بیر ایته بنزه‌ییردی.
آقا وثاقی بیر قیراق‌دا، ماشینی‌نی ساخلاییر، دوٍشوٍر. یاواش- یاواش دره‌یه ساری گئدیر. هله یولداش‌لاری گلمه‌ییب‌لر. آخی چوخ تئزدیر. دئمه‌لی، یولداش‌لارینی گورمک هوه‌سی آقا‌وثاقی‌نی نئچه ساعات تئز اورایا چکیب‌دیر. همیشه‌کی کیمی موغاییر اولاراق، آقا‌وثاقی داها حیوانین آیاق سسی‌نی و اونون درین نفس‌لرینی اؤز آرخاسیندا ائشیتمیر. آرخایا دؤنوٍر، حیوان ماشین‌دا قالیب و ائشییه چیخمآقا رغبت گؤسترمیر. سانکی، دره‌لرین طراوتی، آخار چایین گورولتوسو هئچ بیری اونون رغبتی‌نی و سئوینجی‌نی اویادا بیلیمر. آقا‌وثاقی گئدیر دره‌نین قیراغیندا بیر داشین اوٍستوٍنده اوتورور.
هر یئر سایخاش‌دیر. آقا‌وثاقی‌دن باشقا بیر کیمسه دؤوره‌ده یوخدور. گوٍنش، اوٍره‌یه یاتیملی ایستی‌سیله اونون اوٍز- گوزوٍنوٍ اوخشاییر. اوٍره‌یی اوخشایان بیر شن‌لیک ده بوٍتوٍن جانینا هوپور. بیر داشا دایانارکن آیاق‌لارینی اوزادیر و طبیعتین اوٍره‌ک اوخشایان گؤزه‌ل‌لییینه دالیر. بو گوزه‌ل‌لیک اونون جانیندا درین بیر دینجلمیش حیسّی یارادیردی. حیوانین زاریلتی‌لاری، آقا‌وثاقی‌نی بیردن اؤزوٍنه گتیریر. حیوانی گؤروٍر. حیوان تابسیز‌لیقلا اویان- بویانا گئدیر، اؤزوٍنوٍ یئره چیرپیر و قریبه بیر سس‌لر چیخاریر. سانکی شاشقین‌لیق و سرسم‌لیک توتوبدور؛ پوزغون و‌ یورغون بیر گؤرکم‌له آقا‌وثاقی‌یه ساری گلیر. التماس ائدیجی گوزلری ایله آقا‌وثاقی‌یه باخیر، بورنونو اونون باشماق‌لارینا سوٍرتوٍر و اونو یئریندن قالدیریب شهره آپارمآقا چالیشیر. اونون پالتاریندان چکیر. تورپاق‌دا اوه‌دییرکن اینیلده‌ییر. اوٍمیدینی الدن وئره‌رکن اویان- بویانا قاچمآقا باشلاییر.
حیوان داماق‌سیزدیر، قریبه سس‌لر چیخاریر. دره‌نی اوٍزوٍ آشاغی گئدیر، چایین قیراغیندا دولانیر. سوٍرعتله یئنی‌دن یوخاری قاییدیر. تورپاق‌دا اوه‌دییرکن قیوریلیر.
یازدی. دره باش‌دان- آیآقا یاشیل‌لیقلا بوٍروٍنوٍب. چایین قیراق‌لاری گول- چیچک‌له بزه‌نیب‌دیر. چای سو ایله دوپ- دولودور. کؤپوٍک‌لوٍ سو تپه‌نین دالینا دؤنوٍب گئدیر.
آقا وثاقی دره‌نین قیراغیندا اوتوروب‌دور. اونون، دوٍشوٍنجه‌سی‌نین آخاری طبیعتین سایخاش‌لیغی ایله اویغون‌دور. دردلی بیر زوزه سسیندن، بیردن اؤزوٍنه گلیر. اونون گوزلری، داشین اوٍستوٍندن زوٍروٍشوٍب، هاوادا ال- آیاق چالا- چالا آشاغی‌یا ساری دیغیرلانان حیوانا ساتاشیر. حیوان بوٍتوٍن آغیرلیغی ایله چایین ایچینه دوٍشوٍر. چایین داشلانان سویو اونو گوتوٍروٍب آپاریر.
آقا وثاقی دورور و دره‌نی اوٍزوٍ آشاغی گئدیر، چایین قیراغیندا دایانیر. داها حیوان‌دان بیر ایز یوخدور. سو اونو گؤتوٍروٍب اؤزو ایله آپاریب‌دیر.
هاوانین صاف‌لیغی گؤز قاماشدیریجی‌دیر. گؤی، گوٍزگوٍ کیمی پارلاییر. آقا‌وثاقی‌نین شکیلی چایین قیراغینداکی گؤلمچه‌یه دوٍشوٍر. گؤلمچه صاف و زوٍلال‌دیر. گوٍنشین ایستی‌لییی و ساری تئل‌لری گؤلمچه‌نین سویوندا عکس اولونور.
آقا وثاقی اووسونلانمیش کیمی گؤلمچه‌نین قارشی‌سیندا دیزلری اوٍسته چؤکرکن سویون ایچینده، اؤز سیماسینا گؤزوٍنوٍ زیلله‌ییر.
او، سویا هوپموش سیماسی‌نین دینج‌لییی‌نی، آیدین‌لیغی‌نی ایندییه‌جک هئچ بیر گوٍزگوٍ ده گؤرمه‌میشدیر.

جمال میرصادقی
علی اشرف درویشیان | ترجمه: 
علی اشرف درویشیان | چئویرن: 
ع. آغ‌ گونئیلی
علی اشرف درویشیان | ترجمه: 
علی اشرف درویشیان | چئویرن: 
ع. آغ‌ گونئیلی
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

قولئیبانی

ع. آغ‌ گونئیلی
www.ishiq.net

آذربایجان ادبیات و اینجه‌صنعت سایتی

قولئیبانی

ع. آغ‌ گونئیلی
www.ishiq.net

آذربایجان ادبیات و اینجه‌صنعت سایتی

قولئیبانی

ع. آغ‌ گونئیلی
www.ishiq.net

آذربایجان ادبیات و اینجه‌صنعت سایتی