(۱)

مئشه آغاج‌لا-

بولود یاغیش‌لا-

گئجه اولدوزلا-

دیری‌دیر؛

و من

سنین ایاق سسلرین‌له.

سن گل

من بولاق اولارام …

(۲)

دونن گئجه،

دونیانین دؤرد بوجاغیندا چال- چاغیر ایدی.

و یاغیش

نه گوزه‌ل چالیردی ائویمین اوستونو:

شعیر‌,

و سئوگی پیچیلتیسی‌دی؛

اولماق

و یاشاماق آن‌لاری‌دی؛

من ایسه،

 بوغولموشدوم قادینلیق دویغولاریمدا.

(۳)

چیینلریمه

سوسن, یاسمن چیچک‌لری اکیرم،

عطیرلری

وطنیمین کؤینه‌یی اولسون دئیه؛

اولاجاق‌می؟

بیلمیرم!

(۴)

 نئجه‌ده

سئویملی کئچیرسن خیالیمدا مندن!

سانکی دونن ایدی

دیواردان قوپموش بیر گچ پارچاسی‌ایله

اوشاقلیغجاسینا چکیردیک شکیلیمیزی

آسفالت اوزه‌رینده؛

و ریاسیز

گولوردوک بیربیریمیزده.

یامان غریبسه‌میشم

 او تمیز اوشاقلیق گونلریمه…