خدي
فريبا وفي- چئويرن: ع. آغ‌گونئيلي
سؤز قورتاران دئييلدي. تاخچادا كي گوزگونون دوشوب سينماسي دا هاي- كويو آزالتمادي. گوزگونون خيردالاريني ييغيشديرديلار. آرواد اولسايدي دئيه‌ردي: «جانين ساغ اولسون، قادا- بالا جانيندان گئتدي». كيشي يومروغو ياستيق كيمي شيشميش قيچينا تاپدادي. اييليب، سس‌لره قولاق وئردي. بير اوشاق آغلاييردي. كيشي سئچه بيلمه‌دي، نوه‌سي افسانه‌دير، يوخسا پروانه.
«دئييرم احسان پولونو، وئرك بير مستحقّه».
خليل چؤرك يئيه- يئيه دانيشيردي.
«خالقا نه دئيه‌ك؟»
بير نفر توتغون سس ايله اوزاق‌دا قرآن اوخويوردو. يئنه ده سس‌لر بير- بيرينه قاريشدي. كيشي الين فرشين اوستونه چكدي. هله، شامي قاباغيندا دئييلدي. او، بئله بيلدي كي، آروادين باشي سوفره‌يه قاريشيب‌دير. آروادي، سوفره‌ده، ليوانين، قاشيق- چنگلين، چؤره‌يين چوخلوغونو سئوردي. سوفره باشيندا هئي اونون- بونون بويونو اوخشاردي. گونده يوز يول چؤركچي‌يه يول دؤيردي. اوشاق ياخين‌ليقدا ايدي. آرواد اولسايدي، اوشاغي اونون ديزلري‌نين اوستونده اوتورداردي.
او ايسه اوشاغين بارماقلاريني الينه آليب، باشي‌نين يومشاق توك‌لريندن اؤپردي. كيشي اليني سسه ساري اوزاتدي:
«گل گؤروم… اوخاي».
«خليل، قويما اوشاق آتاني اينجيده‌ر».
خليل گئج- گئج اونلاري يوخلاردي. آرواد دئيير:
«نانجيبين بيري نانجيب، اوشاغيمي اليمدن آلدي».
– «اونون بوينونا ييخما، آغاجي اؤز ايچيندن قورد يئيه‌ر».
آرواد قبول ائتمير، هئچ واخت قبول ائتمزدي. داي بو گونلر آروادا دا گوجو چاتمير؛ ايت- پيشيك كيمي يولا گئديرلر. كيشي‌نين الي بوش قاييدير. اوشاق اوزاق‌لاشيب‌دير. خيردا گلني‌نين خيمير- خيمير گولوش‌لري اوجاليب.
«آتاجان، شاميندان ميغايات اول».
كيشي دويو دنه‌لريني بارماق‌لاري‌نين آراسيندا ازير. اونون الينه بير قاشيق وئريرلر. خوره‌يي چؤرك ايله تيكه‌له‌ييب يئمه‌يه اؤيره‌نيب‌دير.
«بير تيكه چؤرهك وئرين».
آرواد ياخين‌ليقدا اولسايدي او آغزيني آشماميشدان بيلردي. اليني اوزاتدي. الي، يومشاق بير شئيه ديدي، تئز اليني دالي‌يا چكدي. هنده‌وري شولوق ايدي. يانيندان چوخ آدام كئچيردي. بورنونا بير سرت ايي دولدو. بؤيوك نوه‌سي ايدي.
«آي بالا بير تيكه منه چؤرهك وئر».
«قاراسيني تاپماديم بونو گئيديم، آييب‌ديرمي؟».
كيشي اؤز- اؤزونه فيکيرلشيردي کي، بو گئجه‌ني ده چؤرهكسيز كئچينسين. بوشقابي لپه ايله دولو ايدي.
«خدي… تكي بير قيله ات».
ارواد ياخين‌ليقدا اولسايدي دئييردي:
«آخيردا سنين بو قارنين باشي‌نين بلاسي اولار».
سونرا دا بير نئچه قيله يومشاق اتي اونون بوشقابينا قوياردي. كيشي سسله‌دي:
«خدي!»
يوخ ايدي، او، يقين سوفره باشينداکيلارين قئيديندهدير کي، آز يئيهن اولماسين، يا دا تورشو جليلين ياخين‌ليقدا اولسون و…
«نئچه آي‌دي، جليل آياغيني بو ائوه باسماييب‌دير؟».
«نه ائله‌سين باشي قاريشيق‌دير».
كيشي طعنه‌لي- طعنه‌لي دانيشير:
«منصوره كفگيرله، مالاغالاري آپاردي؟».
«يقين لازيمي ايميش».
«هئچ گؤر بير قورو الين آغريماسين دئدي؟!».
«سنين آجي ديلين هاميني بو ائودن قاچاق ساليب‌دير».
بير قوجانين سسي ائشيديلدي:
«هامي‌ميز گئتمه‌لي‌ييك».
بير گون گئتميشدي. گوندوزو گئجه‌يه قاتاراق اوياق قاليب كوچه‌ده‌كي سس‌لره قولاق آسميشدي. ياديندان چيخميشدي گئجه ايدي يوخسا گوندوز، آياغي‌نين سسيني ائشيتميشدي. سونرا دا قايناناسي‌نين سسيني.
«مشدي، آخي اينصاف دئييل».
سفئه قارداشي دئميشدي:
«يوخ، يوخ اينصاف دئييل».
و او خديجه‌نين ايييني آلميشدير:
«بوتون بدنيم شوشه خيرداسييلا دولودور، دور بو ائوي سوپور».
اوره‌يينده آند ايچميشدي داي بوندان سونرا نه شوشه سينديرسين نه ده خديجه‌نين اوره‌يين. او خديجه‌نين اوره‌ييني اله آلمالي ايدي. ال‌لريني فرشين اوستونه چكه- چكه خديجه‌نين نفس‌لري‌نين سسي گلن يئره ساري ايمك‌له‌ييب ال‌لريني خديجه‌نين ديزلري‌نين اوستونه قويدو. خديجه ديزلريني قوجاق‌لاييب انگي‌نين آلتينا ديرکلميشدي. اونون گؤز ياشلاري ياناقلاريني ياشالتميشدي.
«حيط‌ده‌كي قيزيل گول‌لري سنين اوچون اكميشم. اونلارين عطيرلريني ائشيتسن هئچ واخت اوره‌ييندن گلمز گئده‌سن».
الي‌نين ايچين يوخاري قالديردي. «اليمه تيكان باتيب، كؤينه‌ييمين ده قولو جيريليب… باخ، اؤزوم تيكميشم. ياخشي تيكميشم، هه؟ گؤرورسن كي، سنه ده محتاج دئييلم…»
خديجه‌نين سسي اونو اورهكدن سئوينديردي:
«هاچان آغ كؤينه‌ييوي آغ ساپي‌نان تيكه بيلسن اوندا ايتيليب گئده‌رم».
دويو قالدي بوغازيندا. ائو بئله شولوق اولماسايدي خديجه دئيه‌ردي كي، دويونو گرك ائله يومشاق بيشيره‌سن كي، بوغازدان راحات كئچه. سونرا دا كوسگونجه‌سينه دئييردي ائله بير تيكه چؤرهك اونون قارنيني دويورار. آغير بدنيني دبرديب، قاپي‌نين ينوووندان ياپيشيب آياغا دوردو. وورنوخدو کي، يانا چكيليب، اونا يول وئرسينلر.
هالدا اوتوران اوشاقلار هيرنا چكيب گولوردولر.
بؤيوك قيزي دئدي:
«هارا گئديرسن آتاجان!»
دوداق آلتي دئدي:
«مطبخه گئديرم».
دئمه‌دي خديجه‌ني آختارير، اؤز- اؤزونه دئدي:
«يقين كي، بو ياخين‌ليقدادير».
مطبخ دولو ايدي.
«بير زاد ايسته‌ييرسن آتاجان؟».
گلني ايدي.
«هئچ بير زاد».
گئري قاييتدي. ديواردان ياپيشا- ياپيشا صانديق‌خانايا ساري گئتدي. خديجه‌ني آختاراندا آخيردا گئديب اونو صانديق‌خانادان تاپاردي.
«خدي! دور گل ائشييه».
قاپي‌نين آستاناسيندا اوتوردو.
«قولاق آس گؤر نه دئييرم. اؤزومو گوزگوده گؤرورم، يامان چيركينم. مندن قاچماغا حاقلي‌سان. چوخ چيركينم، دوزدور؟».
صانديق‌خانادان گلن سس دئيير: «هه، چوخ، چوخ».
«هر نه دئييرسن دي‌ء، قوي اوره‌يين بوشالسين».
«او كوفته‌يه اوخشار بورنووو گوزگوده گؤره بيلدين‌مي؟».
قوجا كيشي بارماقلاريني بورنونا سورته- سورته گولدو: «هه، هه».
«داز باشيوي دا گؤردون‌مو؟».
«هه».
قوجا كيشي اليني باشيندا گزديره‌رك ائهمالجا ائنديريب، ياپيشميش كيرپيك‌لري‌نين اوستونده ساخلادي.
«او، آجي ديليني نئجه؟»
كيشي اوجادان شاققا چكيب گولدو:
«هه، گؤردوم. آغزيمي يوموب لال اولارام، سن گل ائشييه من لال اولارام».
جليل دئدي:
«آتاجان، بير زاد ايسته‌ييرسن؟».
كيشي‌نين دوداقلاري گولوشه اييلدي. قاپي‌نين توتاجاغين بوردو. قاپي باغلي ايدي. يورولموشدو. اوتاغين آغير هاواسيندان بوغولوردو. اوشاقلار قاباغيندان قاچديلار. آياغي قند قابينا ديدي. داياندي.
«آتاجان، هله گئت. آي بالا قاچين گئدين گؤروم».
كيشي فيكيرلشدي:
«گؤره‌سن، بو آرواد هاردادير؟».
پيلله‌كانين سوراهي‌لريندن توتوب آشاغي‌يا ائندي. سويوق بير گئجه ايدي. ائهمالجا سسله‌دي:
«خدي!».
ائودن، هاي- كوي سسي گليردي. كيشي سويوق‌دان اسيردي. پيلله‌كانين اوستونده اوتوردو.
«خدي جان… آي خديجه هارداسان؟».
بوينونو اييب قولاق وئردي. يارپاقلارين سسي گليردي. هاوايا بير يانيق ايي ياييلميشدي. اوجا سسله چاغيردي:
«خدي جان!»
اوميدسيزلييين سويوق دامجي‌سي اوره‌يينه دامدي. گؤز ياشلاري ياپيشيق كيرپيك‌لري‌نين آراسيندان، سوزوب آخدي. ديزلرينه تاپدالاياراق هؤنكور- هؤنكور آغلادي.
«خدي جان… جانيم خدي».