۱
آنه تیلیم
ایلک بار تیل آچگنده «آنه» دېیمیز بیز،
«آنه تیلی» – بیرینچی درسلیک،
بیرینچی قۉشیقنی، آنه‌میز اۉز سوتی ایله
روحیمیزگه سینگدیرر بو تیلده‌گینه.
بو تیل، روحیمیز، عشقیمیز، جانی‌میزدیر؛
بو تیل، بیر-بیریمیز-له عهد و پیمانی‌میزدیر؛
بار نرسه‌نی بیزگه تـَنیتگن‌دیر بو تیل؛
بو تیل، اجدادیمیزدن بیزگه میراث قالگن قیمتلی خزینه‌دیر؛
اونی بیز-ده کۉزلریمیزدېک قۉریب،
کېله‌جک نسللر‌گه هدیه اېتمه‌لی.
آنه تیلیم!
سېن،
بلند تاغلریمیزنینگ سۉنگسیز عظمتیدن،
بو توپراقدن،
بو یېردن،
اېلیم بغریدن چیقه‌یاتگن یانغین نغمه‌لردن،
گـُللرنینگ رنگلریدن،
خوشبۉیلیگیدن،
آق ساچلی بابالرنینگ جان‌فدالیگیدن، کمالیدن،
دشمن اوستیگه یاغدیریلگن آلاو پرچه‌لریدن چیققن سېسدن یَره‌لدینگ،
سېن،
خلقیم‌نینگ آلگن ایلک نـَفـَسیدن یره‌لدینگ.
آنه تیلیم!
سېنده‌دیر خلقیم‌نینگ حکمتی، کمالی؛
عرب اۉغلی مجنون‌نینگ دردی سېنده تیل آچدی؛
یوره‌کلرگه یۉل آچگن نوایی نینگ صنعتی،
سېنینگ عظمتینگ نشانی‌دیر.
اې تیلیم!
قدرتینگ-له دنیالرگه یۉل آچدینگ،
سېنده مېنینگ خلقیم‌نینگ قهرمانلیق-له تۉله تاریخی ورقلـَنر،
سېنده نېچه مینگ ییللیک مېنینگ مدنیتیم، شان-شُهرتیم سقلـَنر،
سېن مېنینگ آتیم، سانیم‌سن،
ناموسیم، وجدانیم‌سن.
اې آنه تیلیده سۉزلشماققه، یازماققه عار قیله‌دیگن
دغلباز فسونگرلر!
کۉنگلینگیزگه یاقمه‌یدیگن
قۉشیقلر، گۉزه‌ل سازلر،
بـَریسی، قۉی، مېنینگ بۉلسین،
وطن توپراغی اېسه سیزلرگه غـَنیم بۉلسین.
۲
مېنینگ آنه‌م
سوادسیزدیر،
آتینی-ده یازه‌بیلمس
مېنینگ آنه‌م.
بیراق،
مېنگه،
ساینی بیلدیردی،
آینی اۉرگتدی،
ییلنی اۉرگتدی،
همه‌دن مهمی:
تیلنی اۉرگتدی
مېنینگ آنه‌م.
بو تیل ایله
هم سېوینچنی،
همده قـَیغونی؛
بو تیل ایله،
یره‌تمیشم
هر بیر شعریمنی،
هر بیر نغمه‌منی.
یۉق، مېن اېمس،
یالغان سۉزله‌دیم،
کتاب-کتاب سۉزلریم‌نینگ
مؤلفی آنه‌م‌دیر فقط!
جنوری، ۱۹۶۸
