بورویوبدو گؤی اوزون
قورخولو بیر زیل قارا،
گئجه چیخاندا چؤله
باخیرام اولدوزلارا.

آنام دئییر: “-گول بالام
هامی‌نین وار اولدوزو؛
هله چوخ اولدوز وار کی،
گؤرمور اینسانین گؤزو.”

گئجه گؤیو بزه‌ییر
گؤزل اولدوز، گؤیچک آی؛
بیلمیرم اولدوزلاردان
هانکی دوشوب منه پای.

آنام یئنه دانیشیر:
“-هامی‌نین اولدوزی وار،
سنین‌ده نازلی بالام
گؤیده اولدوزون اولار.
بالاجا اولدوزلارین-
یییه‌سی اوشاقلاردی؛
بؤیوک آدام‌لاریندا
بؤیوک اولدوزو واردی.”

من کوسورم بو سؤزدن،
دوداغیمی بوزورم؛
هامی‌دان بؤیوک اولان
اولدوزومو گزیرم.

تاپانمیرام سمادا
ایسته‌دیگیم اولدوزو؛
من اولدوز ایسته‌ییرم
ایشیقلادا گوندوزو.

آنام دئییر: “-او اولدوز
گئجه گؤیده تاپیلماز؛
اونون آدی گونش‌دیر
اودا گوندوزسوز اولماز.”

سئوینیرم بو سؤزدن،
بوراخیرام هر ایشی؛
ائوه گیریب یاتیرام
گوندوز گؤره‌م گونشی.

او منیم اولدوزومدور،
سئوه‌جه‌یم اورکدن؛
گئجه‌نی سئومیرم کی،
اولدوزون‌دا سئوه‌م من.
آبان ۱۳۶۴- تبریز