اوره‌ک سیرری / ایبیش
بیر گیزلی درد اوره‌ییمده کؤک سالیب،
نئجه دئییم؟ کیم ائشیده‌ر، کیم قانار!
دؤزمه‌لییم آغریسینا بو دردین،
قالسین گیزلی، یا یاندیرار، یا یانار.
اوره‌ییمده قالمالی‌دیر، قوی قالسین،
جانیما کؤک سالمالی‌دیر، قوی سالسین،
بو جانیمی آلمالی‌دیر، قوی آلسین،
آچمام اونو، دوشمان گولر، دوست یانار!
بو یئرلرین هر گون رنگی قاریشیر،
چوبان قوردا قوزو وئریر، باریشیر،
قورو قالیب، یاش اودلانیر، آلیشیر،
توستوله‌نر، آلوولانار، ها یانار.
ایللر اؤتور، پاییزی چوخ، یازی آز،
ایتگین‌لرین عذابی چوخ، نازی آز،
فلک یاتما! منه باشقا یازی یاز!
تلس بیر آز، قلبیم سوسار، دایانار!
