بیز بیر باجی، آلتی قارداشدیق
آتامیز قاپی‌دان گیرنده
آیاغینا دوراردی هامی.
قیشدا نفت آلماق
بعضا‌ده چؤره‌ک نؤبه‌سینه دورماق
منیم پاییما دوشموشدو.
هر کس اؤز ایاق‌قابی‌لارین مازلایاردی
آخشام‌لار
آتامین دا آیاق‌قابی‌لارین
بعضا
پار- پار پاریلدایاردی آتامین آیاق‌قابی‌لاری.
فوتبولو چوخ سئوردیم من
پاییز گونلری
مکتب حیطینده یئدیییمیز
ایکیسی بیر قیرانلیق هئیودان‌دا.
اوندا پوست‌مودئرنین نه کیمی‌لیین‌ده بیلمزدیم
دئیه‌ردیم بس شعیر
آنامین گؤز یاشی‌دیر
قوش‌لارین له‌له‌یی تؤکولنده
دیزیمین یاماغی‌دیر
دئیه‌ردیم بس.
یاواش- یاواش بؤیودوک
بیزدن بیری آزالدی سونرالار
آزالتدیلار یعنی
توی‌لاریمیزدا یئری بوش گؤرونوردو
بونونلا بئله
سیز دئدینیز
باشیمیز ساغ اولدو.
او گوندن چوخ کئچیبسه‌ده
واخت ائله‌مه‌میشیک هله
عمی‌لرینین سرگوذشتین دانیشاق
نه من
نه اوشاقلاریم.
بیز بیر باجی، بئش قارداشیق.
یک پاسخ
چوخ گؤزل چوخ گؤزل آغزینا ساغلیق عمو ناصیر