سئوجه‌یم سنی
میلاد عزیزی (اؤلمز)
سن،
ای سحر یئلی
تورپاق قوخولو یاغمور نمی
نه گؤزل باخیرسان
عیشوه‌لی بنؤوشه‌نین ظریف تنی!
سن،
چاییمین دَمی
فیرتینالاردا گلن یاردیمجی گمی،
قوللارینی ساری منه
مور داغلارین گوموش چَنی!
سن،
قارانلیق گئجه‌مین شمی
قلبیمین سئوینجلی غمی
گؤزومدن اوزاغا گئتمه
ای سئوگینین مسکنی!
سن،
بیر عؤمرون بدلی
باغلارین یاشیل چمنی
نه قده‌ر گونش دوغارسا
سئوه‌جه‌یم گولوم
سئوجه‌یم سنی !
