ياسلي ساوالان
عباس بارز
هر زامانکي باخيرام باشينا قار وار گؤرورم
اوغلو اؤلموش آنا تک گؤزلرين آغلار گؤرورم
هر طرفدن چکيليب سينه‌وه داغلار گؤرورم
آي آلان اوستونو غم چيسگيني، هر ياني دومان
آي ياغان باشينا غملر اودو، ياسلي ساوالان
×××
گؤرموشوک يازدا کؤچک‌لرده چيچکلر آچيلار
هر طرفدن چيمنين سينه‌سينه گول ساچيلار
ماهنيلار قوشماغا باشلار يئنه‌ده قوشماچيلار
ياز گليب گئتدي يئنه گولمه‌دين اوچ آيدا بير آن
آي ياغان باشينا غملر اودو، ياسلي ساوالان
×××
قرنيلر کئچدي سنين گولمه‌دي بير لحظه اوزون
قانلي ياش تؤکدو سارالميش اوزونه ياشلي گؤزون
غصّه‌دن دؤندو قارانليق گئجه اولدو گونوزون
نه سوران حاليني اولدو نه وئرن جيسميوه جان
آي ياغان باشينا غملر اودو، ياسلي ساوالان
×××
آند وئررم سني او قانه بلنميش داشيوا
گئجه-گوندوز او گؤزوندن تؤکولن قان باشيوا
اوره‌گين درديني بيلدير او سهند قارداشيوا
سني وارليق، سني تانري، سني بو آه و فغان
آي ياغان باشينا غملر اودو، ياسلي ساوالان
×××
سالارام ياديما بير لحظه او کئچميشلريوي
تؤکولن سنگ جفائيله او دور ديشلريوي
ايزلرم بير بير او حئيرت يارادان ايشلريوي
هاميدان من سنين احوالينا آرتيق نيگران
آي ياغان باشينا غملر اودو، ياسلي ساوالان
×××
ساکيت اول، آغلاما قوي بيرجه چکيلسين بو دومان
گون چيخيب ظولمتي بير يوللوقا قووسون بورادان
نبي گلسين، بوز آت اولسون يئنه داغلار آتيلان
هجرين بلکه ييغيلسين گؤزو يولدان، آناجان
آي ياغان باشينا غملر اودو، ياسلي ساوالان
×××
سؤندوره بيلمه‌دي گؤز ياشين اوره‌کدن اودووي
چاغيريم قوي کؤمک ائتسين سنه اؤز اؤولاديوي
افتخاريله بوگون ذيکر ائده‌ءرم پاک آديوي
مرد اوغوللار بئجريب خلقه وئرن شؤهرت و شأن
آي ياغان باشينا غملر اودو، ياسلي ساوالان
×××
بابکين گئتديسه بوش قالمادي آمما قوجاغين
دولودور مين ائله اوغلانلاريلا هر بوجاغين
نه قده‌ر يئل اسه طوفان قوپا سؤنمز اوجاغين
اي بلالر سپري، خالقا يامان گونده آمان
آي ياغان باشينا غملر اودو، ياسلي ساوالان
×××
چنلي بئلده دلي‌لر قوي يئنه قورسون بوساطي
قوچ کوراوغلو يئنه جولانه گتيرسين قير آتي
هئچ زامان اصلين ايتيرمز او کي دوزگوندو ذاتي
آند اولا آديوا، آي گؤزلري آغلار ياشي قان
آي ياغان باشينا غملر اودو، ياسلي ساوالان
×××
سن دؤيوشلرده بير آسلان کيمي دوردون آياغا
اوخ آتيلديقجا بيزه سينه‌ني وئردين قاباغا
غم يئمکدن داها جانيم يئتيشبدير دوداغا
نه يامان گونلره گؤر قالدي بو احساسلي بالان
آي ياغان باشينا غملر اودو، ياسلي ساوالان
×××
بابالاردان بيزه قالميش بو مثل هاممي بيلير
سو گلن آرخا دئييبلر يئنه بيرگون سو گلر
فلکين داش اورگين آه اوخو آخيردا دلر
“بارز” اوغلوندا يئتر سئوديگي ياره او زامان
آي ياغان باشينا غملر اودو، ياسلي ساوالان
یک پاسخ
ساغ اولون. وار اولون!