آذربايجان
مظفر درفشی
اي اولان جوشغون اوره‌کلر قاني آذربايجان!
قلب‌لر درياسي‌نين طوفاني آذربايجان!
اي اولان شئرلر مکاني، قهرمانلار مسکني،
بسله‌ين قوينوندا ستارخاني آذربايجان!
اي قيلان ناحقه قارشي قهريلن دائم قيام،
قالديران ظاليملره عصياني آذربايجان!
اي کئچن حقين يولوندا باش و جانيندان مدام،
ذکر اولان ديللرده دائم شاني آذربايجان!
اي رشادت منبعي، آزاده‌ليک سرچشمه‌سي،
عزت و شان و شرف ميداني آذربايجان!
کئچميشينده اي بؤيوک سيمالاري اظهار ائده‌ن،
کسب ائده‌ن عالمده خوش عنواني آذربايجان!
ياد اولان حؤرمتله ايسمي صفحه‌ي تاريخده،
بحر حيرتده قويان دونياني آذربايجان!
دفترينده ثبت اولان هر بير شهيدين قانيله-
غضبکارين قتلي‌نين فرماني آذربايجان!
افتخار ائيله جهاندا، افتخارايله ياشا،
اي بؤيوک آزادليغين قورباني آذربايجان!