حیات یولو
هریزلی
واختسیز آرامیزدان کؤچن شاعردوستوم ممد قاضی‌نین عزیز خاطره‌سینه
عؤمور وار سویوموش سوورولموش اوجاق
عؤمور وار اوجاغی کؤز ایله دولو،
سینه وار بیر آغیز سؤزو تو‌تانمیر
سینه وار دریالار سؤز ایله دولو.
×××
گون‌لر دال با دالا دوزولور بیر- بیر
حیات دویولما‌سا عؤمور گون ایتیر
حیاتی دویماغا، ایکی گوز نه‌دیر؟
بیر اوره‌ک ایسته‌ییر گؤز ایله دولو.
×××
حیات یولون آزدی دایانیب دوران
مقصده چاتمادی بوینونو بوران
آتلی‌لار ساووشدو سانکی بورراغان
تکجه بیر یول قالدی توز ایله دولو.
یای۱۳۸۶
