بلکه قبریم اوسته گله بیلمه‌دین،
یاساق بیر سئوگینین دوعاسی یوخدور!
دئییرلر: بو کیمدی آغلاییر قبره،
ائله بیل یئتیمدی چاراسی یوخدور؟!
یوخومدا گله‌رم گؤروشه دئسن،
بیلمه‌دن، کاریخیب اؤپوشه‌ریک بیز.
اوز- اوزدن اوتانیب حسرته دؤنسه
بو حسرت ایچینده بؤلوشه‌ریک بیز.
یاخیندا، اوزاقدا قیسمت اولمادی
اوزومه توخونا دوداغین سنین.
سینه‌ن‌ده یاتاردیم آمما نه بیلیم
سویوقموش بلکه‌ده قوجاغین سنین!
بَیَنه سئرچه‌لر آغاج‌لار، قوش‌لار
گؤزلدیر گؤزلریم، کؤینه‌ییم، ساچیم.
غفیلدن قوناق گل خیاللاریما،
باشیمی یانیندا بیر گئجه آچیم!
