بولوتلارین خوروزو بانلاییر
یاغیشین قوش اللری
سؤز قاپیلارین کروکیسین چکیر؛
باهار شعریمین
مدرن اوشاغی سئزارین دوغولور.
اکیرم نییه نهیه گلیشین توخومونو
گؤیریر قیفیللار،
قفسلنیر شعرین اینسانلیق سسی؛
هاوا بیتیریر فیل سواللاری
آچارلانیر یئرین آج آیناسی،
آسیلیر توپراغین سوسوز بوینونا؛
جاوابلار پلتک شریطین
عصرین صلیب دوواریندان آسیر.
آینالارا یئریییر سواللار
جاوابلار صلیبه یئرلشمیر
نردوانلاییرام آچارین بوغاز قوشونو،
گؤیون گیلانارلانمیش گؤزلرینه
تاس آتیر هاوا اللری.
استرس قیشی دوشور
یئرین پردهسی دهلینمیش قولاغینا،
بئینیمده سواللار چؤرهیینین داشی گؤیریر،
دهییرمانلانیر فیکریم
دارتیر سواللاری عاغلیم
جاوابلار قاتیشیر چؤرهییمه
قورویور اورهییمین آجی چایی
بیلمیرملر حیلهسی
تویوق دریسینه یازیلیر،
قارغالارین قانادی یونولور
بایقوشلار داشیییر خاراباسینا.
خریطهلنیر کافتارلار
بیلیرملرین الف بارماغی قاناییر
دال بارماغین
سطیرسیز قیرمیزی واراقلار چایینا آخیر،
ایچیر تاریخین شهید صفحهلری.
جهننم معمارلاری
سؤیکهنیب رحمتلیک جویز آغاجینین
سوموکلری چوروموش میزینه،
گلهجهیین ایشیق یوکلو دوهسینه هوروشولر.
دیل آچیر آچارلار
یئر چئینهییر قیفیللاری
پیلهییر هاوا قولاغینا
توپراق قوسور سواللاری
زامان قورباغالانیر
شاعرین شعورو دنیزلنیر
سواللارین جاوابینا…….
