اووووفففف… نیلوفر
چیچکلرین ماوی‏سی!..
یادداشیمین دفتریندن دوشوب ایتن سن اولدون‏مو؟
یوخسا آدین؟                قادین!..
هئئئئیییییی… ماوی قادین
نه‏‌دن ائله یادداشین کنارینا دوشدون اوزو قوُیلو؟

اوینا!                    آینا!
آینا!                     اوینا!
قوللارینی آچ
قاچا بیلمه‏‌سن ده قاچ.
بو آینا داشداندیر
آیاقلاریندان موغایات اول
یاناقلارینا داش باتماسین.

داش دئدیم یادیما دوشدو
بو داشی بیزه کیم آتدی نیلوفر؟
اؤنونده‏‌کی تیکان حسد آپاریر گولوشلرینه. بیلیرم
و آرخانداکی گول دئییل نیلوفر – گوللـه‌‏دیر…
“آنان اؤلسون نیلوفر،
سارالیبسان نه بتر؟!
سندن سونرا بو حیات
یئتر، نیلوفر، یئتر…”