زامان باشیما دئییل اورییمه سو، داش دوشوب
بره‌لیر گؤزلریمه گئجه‌نی سحر
سیمیت‌لر یالقیزلیغیمی بوراخمادا
شه‌هرین شیرین یوخوسونو،
قیزارداجاق کؤیسومده اولدوز چیچه‌یی.
تتیک‌لر توی توتمادان گل،
گل بوشالت روحومون اینحه‌لییینی گؤزلری‌نین شارابینا
کئفله‌نیم دوشونمه‌ییم زیرنا سسینی!
و دان ایشیغی قورخو دامارلاریما ایشله‌مه‌ده آدینی،
هاوا قییها چکیب قیژیلدادار مرمی‌لری
کئفلی دامارلاریمی، بوشلاماز گؤزلرین
واوندان باشقا هئچ نه‌یی دوشونمه‌رم
آمما؛
سوسوز یورقون قاییداندا اوشویه‌رم شارابین آتشینده
سویون گئجه‌لرینی …
سویون؛
قیرمیزی یایلیغینی اؤرت
اوستومه قیرمیزی ملحه‌فه‌نی
یوخلاییم خییالینی سون یوخو قده‌ر
و بونو بیل کی؛
طبیعت اؤز ایشینه قاریشمیش بیر باشدیر
دوغونو دوغورسا دا گونش
باتی‌‌نی قان چاناغی باشینا چکیب
یاتدیغینی مجبوردور.
آمما سن اؤز ال‌لرینله چیراغینی اوفله‌ییر
سحرینی سیله ده بیلرسن یئددینجی گؤیون
تاوانینی سؤکوب ماساسینی،
چئویره ‌ده بیلرسن سونونجو قاتدا
بو ایشلر اللرینیزله یاپیلار سئوگیلیم
دیرناقلارینیزین رنگی‌ ده ده‌ییشمز اوردا
و کیمسه سنی دلی ده دئمز منی!
یورولسام دا یاتیردا بیلمییه‌جک‌
سئوینجیمی، گؤزلرین …