جان تنگه گلدی حال دل بی‌قرار‌دن
کؤنلوم سینیب بو ترسه گلن روزگاردن
عاشیقلرین فغانه گلن خسته چاغی‌دیر
دوشسون بو روزگاری گؤروم اعتباردن
بیچاره کؤنلوم اوستونه ده‌یدیکجه یاره‌لر
دؤزدوم دئدیم داواسی گلر شوخ نیگاردن
آهسته سؤیله‌دی منه هیجران ترانه‌سی
آیا سبب نه‌دیر بو قده‌ر انتظاردن
ای سئوگی تانریسی سنی سئودالی قلب‌لر
مردانه‌لیک قانین تزه‌له شاه‌داماردن
دؤران مین‌اوزلو، ذاتی قیریق جاهیلینکی‌دیر
قورخوم بودور کی جبر گؤره‌م اختیاردن
حق اودلانیر دیانته باخ! عهد قیرمارام
به‌به بو حری بالیغه باخ بیر کناردن
ای حکمت اهلی، ای عرفا سیز بیلیرسینیز
اینسان نه‌لر چکرمی گؤرون بند داردن
افسوس خراباتی‌ده بیر پیر گؤرمورم
فتوایه باغلی‌دیر اوچا بیر قوش حصاردن
بوی وئرمز هر کسه اوزه «اینجیک» درین سولار
معنا محک‌لری باش آچار بو عیاردن
میرجمال حسینی (اینجیک)
چئویرن: میرجمال حسینی (اینجیک)
ترجمه: میرجمال حسینی (اینجیک)
سسلندیرن: میرجمال حسینی (اینجیک)
- شعر
- اوخوماق زامانی: < 1 دقیقه
- https://ishiq.net/?p=32784
چاپ
