هئچ کس بیلمه‌یه‌جک من ایتیرنی…
میانالی علیرضا

 سیغال گؤرمه‌یه‌جک داها ساچ‌لاریم

هانی او آتا‌لی، آنا‌لی دونیام؟

گئتدی گومراهلیغیم، ارکؤیونلوگوم،

قاییتماز آنا‌لی- آتا‌لی دونیام.

…
هانی اومید یئریم، اوما‌جاق یئریم،

دردیم دونیانین هئچ وئجینه گلمز.

آتام بیر عالمدی، آنام بیر عالم،

کیمسه اؤزوم کیمی دوشونه بیلمز.

…
ایندی بالام بویدا آتایام، دی گل –

هله ده چوخ شئیه آتا گزیرم.

باشیمی دیزینه قویوب، دینجه‌لم –

آنا آختاریرام، آنا گزیرم.

…
ائله بیل قیریلیب قوشا قانادیم؛

هانی شیلتاقلیغیم، اویویان قوجاق؟

اوره ییم اوشویور، جانیم اوشویور

هانی ایسینمه‌یه ایستی بیر اوجاق

…
دوزدو کی، آغاریب ساچیم، ساققالیم،

دؤیولمییم چاتیب آتا الیله.

خمیریم کوت گئدیر نیه، بیلمیرم

سؤیولمک ایسترم آنا دیلیله.

…
حیسسیم، هیجانیم، روحوم هاوادا،

دولای‌لاردا ایتیب گومانیم منیم.

سویوق بیر ائو قالیب اودسوز-اوجاق‌سیز

هانی دینیم منیم، ایمانیم منیم؟

…
ساناسان گون‌لریم دییشیب تامام

اؤزوم اؤز ایچیمده باشقالاشمیشام.

آتا‌لی، آنا‌لی قانادلاریملا

کئچمیشده دئمه بس داغ‌لار آشمیشام.

…
غمیم غم یئرینده، بو گون دمیم ده

کدر جیغیرینا دوشوب ندنسه.

ایچیمی گؤینه‌دیر دوننیم منیم

واللاه، دئمک اولمور بونو بیر کسه.

…
هله گون کئچه‌جک، زامان اؤته‌جک،

دؤوران دییشه‌جک گلن-گئدنی

دردیمه چوخ شریک تاپیلا‌جاق، تک –

هئچ کس بیلمه‌یه‌جک من ایتیرنی.