شاختادیر، سویوقدان قوورور هاوا
قاپیلار پیچاتلی، شیشه‌لر باغلی
قورخورام هاوادان قان قاری یاغا!!
قاپیلار پیچاتلی، شیشه‌لر باغلی
آچین قاپیلاری بیر اینجه اَللی
سینه‌سی یارالی، اته‌یی گوللو
بیر جیلیز قیزجیغاز، بیر قارا تئللی
سازاقدا قالیبدیر، چاغیریر سیزی
کولَک شاللاقلاییر کؤرپه اوزونه
یاش دولوب شاختادان قارا گؤزونه
یاراسی اینجیدیر، باخمیر سؤزونه
سازاقدا قالیبدیر، چاغیریر سیزی
آچین قاپیلاری، سالین تئز یئرین
چوخ گئدیبدیر قانی، بیرآز سو وئرین
آمان یارالاری دریندیر، درین
سازاقدا قالیبدیر چاغیریر سیزی
کولکده پیچیلدیر بیر روحون سَسی
تنگیمیش، خیسیلدیر آخیر نَفَسی
ائله آرخاسیزدیر یوخدور بیر کسی
سازاقدا قالیبدیر چاغیریر سیزی:
“گلین‌لر صفینه کئچمه‌دیم آمان
قیزلار بولاغیندان ایچمه‌دیم آمان
خَرمنیم تالاندی، بیچمه‌دیم آمان”
سازاقدا قالیبدیر، چاغیریر سیزی
