چئویرن: پاشا
ترجمه: پاشا
پاشا
00:00
00:00

انقلاب قوخوسو گلیر؛
اینتیحار ائدیر دوداقلاریم
یاخینلاش منه.

ائهئئئئی گؤزلری پوئزییا خیاوانی،
موغاندا قورا پیشیرن آی؛
تبریزده تیتره‌ین ارک
شوشادا حسرت…
گؤزلرین ایسلاق سون‌باهارین اؤپولمه‌میش دوداغی؛
گؤزلرین آلچا باغی.

گؤزلرین بیر قیزیل آلمانی ایکی‌یه بؤلموش آراز،
یاخینلاش منه بیراز.

گؤزلرین یازارلار بیرلیگینین صدری.
کمال‌الدین کامو-نون «غوربت» شعری
شوتا یاتاشویلی‌نین «دارانمامیش ساچلاری»
نزار قبانی‌نین «یوز سئوگی مکتوبو»دور گؤزلرین.
مایاکووسکی‌نین «شالوارلی بولود»-و،
گؤزلرین نسیمی،
ناظیم حیکمت‌ین آسیلما خبری؛
نوصرت کسمنلی‌نین شاه‌ اثری:
«مندن اسیرگه‌مه او گؤزلرینی…»
گؤزلرین موشفیق‌ین توتقون تاری‌دیر،
آرزولاری‌دیر احمد جاوادین.
سؤکوک اوختای‌دیر،
اوخا تای؛
توختاییرام تیکیلنده دنیزینه…
گؤزلرین سورگون ساهیرین آزادلیق شعری،
ایلاهی‌لشن نادیر
قارشیندا چالینان داریخما سازلار
غزل‌لره سیغمایان داریخمالار…
نیسگیللی بایاتیلار…
قوشمالار…
سربست چیچک توپلوسو.
گؤزلرین اوتوزما قورخوسو!

باخیرسان؛
دیلی توتولور گؤزلریمین،
آغزی باغلانیر دیلیمین!
دوشونمور دوشونجه‌م
هئلئن کئلئرلنیرم…

گؤزلرین شعر اوجاغی‌دیر؛
یانیریرسان
یاخیرسان
باخیرسان، شاعیر اولورام.

گؤزلرین، دیلیمده یازیلان بوتون دیوانلار.
گؤزلرینده ادبی‌ یاتیرام، ادبیات اؤیرنیرم باخیشینین کؤلگه‌سینده.

داغیدیرسان قالیب‌لری
سرحدلر ایتیر
ایت اولور هیتلر
صدام ایتیلیر
گؤزلرین عبدالمالک‌ین پاکیستان تورپاغیندا قورشون چاغی‌دیر؛
سوکوت چکیر ایچیمه…!

باس گؤزلرینین باغرینا منی
گؤزلرین جان‌دیر
گؤنئی‌ده سوسوز اورمو گؤلوندن کوسن دورنالار…
قوزئی‌‌ده سورگون دوشن تورپاقلار؛
گؤزلرین اؤلکه‌م‌ده‌ کی داغلار.
گل!
گلیشینی دوشونورم؛
سینه‌م سو سپیر باخیشلارینا باغلانان کوچه‌لره…

باخیرسان؛
۷۲ هاوا گلیر باشیما
«آیاق جلیلی» گلیرسن آچیق کؤکده؛
باش کؤکده «باش مخمس»
«پاشا کؤچور» گؤزلرینده…
گؤزلرینده بیتیر یاشام
یاشام گؤزلرینده
بوراخما منی.

گؤزللرینی قیسقانیرام
ائهئئئئی… قیز، قان!
قیسقانیرام شعریمده گؤزلرینی.

گؤزلرین‌له شیرین‌دیر یاشام
شیرینیم؛
باهار باخیشلیم،
فصیل‌لره سون قویموش یاز؛
یاخینلات
یاخینلات دوداقلاریما گؤزلرینی بیراز…
۱۳۹۷

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

انقلاب قوخوسو…

پاشا
www.ishiq.net

آذربایجان ادبیات و اینجه‌صنعت سایتی

انقلاب قوخوسو…

پاشا
www.ishiq.net

آذربایجان ادبیات و اینجه‌صنعت سایتی

انقلاب قوخوسو…

پاشا
www.ishiq.net

آذربایجان ادبیات و اینجه‌صنعت سایتی