اللی ایلدیر گؤیده‌میزده داشییریق
قانی دورماز جنازه‌لری.
بولاق‌می جوشور بو جنازه‌لرین دامارلاریندا؟
یوخسا،
ساوالانین اود پوسگورن سولاری‌دیر-
قایناییر ایستی- ایستی؟!
دونن تهرانین قوزئیینده قیردیلار جاملاریمیزی،
هلیکوپتردن قان فیشقیراندا
دئشیم- دئشیم اولارکن پنجره‌میز
چیچکلندی «طاهره»نین آغ- آپباق دونو،
قیزیللاندی سینه‌میز.
دونیانین کدرلرین سئوینجه دوغرو داشیماق
بیزیم پاییمیزا دوشموش؛
آغری‌لار
سوموکلریمیزین ایلیینه قده‌ر ایشله‌ییرسه ده
ایپک یولوندا یوروین کاروانین دایانماسی یوخ،
یورولماسی یوخ!
دونن ساییمیزدان بیریسی‌ده آزالدی؛
«عارف»ی باسدیراندا
بیریسی قولاغیما پیچیلدادی:
– بونوندا جنازه‌سین کوره‌ییمیزه چاتیب یورومه‌لی‌ییک؛
– یوخ! دئدیم:
ایچیمیزده باسدیریب بئجرمه‌لی‌ییک
گیلاس آغاجلارینین چیچکلنمه‌سینه قده‌ر؛
هله دیزلریمیزه گوج وئریر
قوللارین آچمیش آنا سحر!
۸ تیر ۱۴۰۱
