اونودولماز دوستوم خالق شاعیری «حسین عاریف»ی خاطیرلایاراق

بیر گؤزه قورویاندا
دردی ائله چاخناشدی
شاعیر بولودا دؤندو،
آغلادی بولاق کیمی
بوتون عالم یویوندو.
بیر بولاق قورویاندا
یاندی بوتون وارلیغی
شاعیرده اودا دؤندو،
یاغدی آغ یاغیش کیمی
ایچین – ایچین دؤیوندو.
قورویاندا بیرچایلاق
سوسوز آرخ کاناریندا
ده‌لی سؤیوده دؤندو،
یولدو ساچینی شاعیر
ائله هارای قوپاردی
بوتون عالم ده‌ییندی …..
قورویور اورمو گؤلو،
چایلار بولاقلار هانی؟
«قوشاچای»دان سو گلمیر،
«نازلی چای» ایلان کیمی
سوسوزوندان مه‌له‌ییر.
«جیغاتی» یولور یئنه
یاسا باتمیش تئلینی،
وای دوشور، شیون قوپور،
ینه بیر میللت اؤلور!
هانی اوغول؟، هانی قیز؟
قورویور اورمو گؤلو،
تبریزی توز بورویور،
بیر میللتین وارلیغی
دوز ایچینده چورویور!
طالعه باخ!، باختا باخ!
بونا دؤزولجک‌می؟
«ساوالانین»، «سهند»ین
یاشیل یایلاقلاریندان
ائللر اوزولجک می؟
داها «عاشیق آلماسی»
گؤزله‌مه‌سینمی قیزلار
باغمئشه‌دن، واسمیشدان.
شانسینین شورلوغوندان
داها داش دوزا دؤنور،
ناغیلللاشیر وارلیغی
تبریزین باختی سؤنور،
مارال باخیشلی قیزلار
تبریزدن گئده‌جکمی؟
شئر بیلکلی اوغوللار
گؤزلردن ایته‌جک‌می؟
بیرده اوخویاجاقمی
او تبریزلی سئوگیلی:
«تبریزین کوچه‌لری دولانبا دولان
قاراگیله، دولان با دولان
اگر منی سئومیرسن گئت آیری دولان،
قاراگیله ،گئت آیری دولان.
نه منه قیز قحط‌دیر، نه سنه اوغلان،
قارا گیله، نه سنه اوغلان.
قارا گیله، گئت آیری دولان»
بیر ده اوخویاجاقمی تبریز حسرتی چکن
کرکوکلو بیر تورکمن:
« گؤزه‌دیر،
گوموش میل گؤزه‌دیر
زولفون عجم ایپیی
تئلین تبریزه‌دیر»
اورموگؤلو قورویور
ائله بیل کی جان وئریر،
او، هایلی – کویلو تبریز
گؤر نئجه ساکیتیک بیز.
ایچیمیزده سسیمیز،
ارییر سس‌سیز- سس‌سیز.
دوداغی کؤپوکله‌نیب
اورمو گؤلو جان وئریر.
گلین قان وئره‌ک دوستلار!
گلین جان وئرک دوستلار!
۱۳۸۷ – تبریز