زامانی سئومه‌دن یاشاسامدا من
دائیما سن منیم یاراغیم اولدون!
سن سئون بیریسی اولماسامدا من
هارداسا بودره‌دیم دایاغیم اولدون!
کیمسه‌یه ایناندیم تئز آتدی منی،
سئوگین‌سه یئنی‌دن اوجالتدی منی،
عؤمرومه گون قاتیب یاشاتدی منی،
حیاتی سورمه‌یه مایاغیم اولدون!
آینا بولاق تکین دوم – دورو آخان،
گؤره‌ن گؤزلریمسن حیاتا باخان،
کینی، کدورتی یاندیریب یاخان
هر زامان گور اودوم، اوجاغیم اولدون!
حیاتین دادینی سنینله داددیم،
جیلیز دویغولاری باشیمدان آتدیم،
اؤنه آددیملادیم من آددیم – آددیم،
ایره‌لی گئتمه‌یه ایاغیم اولدون!
او آن کی اوره‌کدن وورولدوم سنه
حیات فلسفه‌سین قاندیردین منه،
سندن الهام آلدی «آرازلی» یئنه
سن منیم مایاغیم، چیراغیم اولدون!
تیر آیی – ۱۴۰۱
