تکله‌نیب، تکله‌نیب تک- تک اولموشوق
گلین بیر بیرله‌شک گؤره‌ک نه اولور!
گورشاددان آخان چای زولال آخانماز
داشدان- داشا ده‌ییب گلیب دورولور.
بولانیق آخیریق دورولمامیشیق،
بیز هله یئنی‌دن قورولمامیشیق،
زامان ده‌ییشسه ده دی گل کی والله
دوننکی مجرادان یورولمامیشیق.
گلین او مجرادان قوپارین منی،
آزاد انسان کیمی بیر نفس آلیم!
قوشون جرگه‌نیزه آپارین منی،
چیخیم قفسیمدن بیر قانادلانیم!
گلین هئچ اولماسا دورولدون منی،
بولانیق آخماقدان بئزمیشم داها!
تکله‌نیب، تکله‌نیب تک اولدوغومدان
اؤزومو آز قالا اوزموشم داها.
گلین ساچلاریمی تومارلامایین،
گلین دؤیه- دؤیه دورولدون منی!
گلین سیز هئچ منه هایان اولمایین،
گلین سؤیه- سؤیه دورولدون منی!
تکی تکلیییمدن قوپارین منی،
گلین قاتین منی اؤز جرگه‌نیزه!
گلین گله‌جه‌یه آپارین منی،
بیر اولماق گره‌کدی وطنیمیزه!
وطن ده بؤیوکدو، ملت ده بؤیوک،
بو بؤیوکلوکلرین بیز ذره‌سی‌ییک.
بیرلشیب بیر اولساق دره‌لر دئییل،
اینانین شبهه‌سیز اولاریق بؤیوک.
گلین هم‌سس اولاق چیخاق بو یولا،
گلین قدرین بیلک اؤتن هر آنین!
تکجه سؤزده دئییل، عزیز ساخلایاق
فیکرین، دوشونجه‌سین هر بیر انسانین.
