یاشیلا بورونور چؤل‌لر، چمن‌لر،
باغدا عطیر سپیر شوخ یاسمن‌لر؛
کؤنلومو اوخشاییر هر بیر منظره،
یازین هاواسی دا منه خوش گلیر.

شیرهاشیر چاغلاییر گور شلاله‌لر،
دوزولور نیظاما دوزده لاله‌لر؛
دورولور آیناسی ماوی گؤل‌لرین،
سو قوناقلیغینا قوناق، قوش گلیر.

هر کند، هر شهرده یاز هاواسی وار،
هر ائلده توی-دویون، ساز هاواسی وار؛
هارا باش وورورسان یاز گونلرینده
سئوینج قارشیلاییر،شنلیک توش گلیر.

یاز گونو چیخاندا سئیره باغ‌لاری
سایریشیر گول‌لرین آل یاناق‌لاری؛
چیچه‌یین قوینونا سوواشان بولبول
سانکی اسارتدن قورتولموش گلیر.

یئنی‌دن دوغولور ائله بیل اینسان،
جان تاپیر وارلیغین سانکی یئنی جان؛
سئیر ائدیب دؤننده یازی «هریزلی»
اوره‌یین غصه‌دن، غم‌دن بوش گلیر.

هریس ۱۴۰۱/۱/۱۱