ایسته‌دیم گئده‌م
من چؤره‌ک آلام
سسله‌دی آنام:
«گل بورا بالام!
باغلی‌دیر هر یئر
کورونا واردیر
ساغلاملیق یولو
چوخ بتر داردیر.
خسته‌لیک گلیب
یولوخور هامی
آیاقدان سالیر
آدام، آدامی.
گل بو گون ائوده
بیشیره‌ک کوکه
بو خسته‌لیکدن
قوروناق بلکه.
سن گتیر بیر آز
یاغ ایله اونو
بیر بالا قابدا
ال‌له‌ییم اونو.
سو ایله دوزون
وار اندازاسی
بیر آز دا ایستر
خمیر مایاسی.
ایندی یئنه بیز
ال‌له‌یک گره‌گ
خمیر ال‌لنسه
یئتیشر چؤره‌ک.
گرکدیر بیر آز
دینجلسین خمیر
اوندا چؤره‌ک‌لر
هئچ اولماز دمیر.
بیر ساعات سونرا
خمیر شیشه‌جک
چؤره‌ک تاوادا
یاخشی بیشه‌جک»
خمیردن کونده
دوزلتدی آنام
سالدی تاوایا
دئدی باخ بالام!
چؤره‌یین آلتی
لاپ گؤزهل بیشدی
دؤندردی اونو
اوستو ده شیشدی.
سئوگی قوخوسو
قالخدی چؤره‌کدن
کورونا غمی
گئتدی اوره‌کدن.
چؤره‌کدن بیر آز
قوپارتدیم، یئدیم
گؤزهل آناما –
«چوخ ساغ اول» دئدیم.
یک پاسخ
سلام سایین دوکتور شئعیرینیز کوکه قوخویور آللاه آنانیزا رحمت ائله‌سین.