داغلاری قینامیرام،
قینامیرام داغ‌لاری.
قینامیرام سرتلیک‌لرینی،
تورانلی آخشامینی،
چیسگینلی سحرینی.
قینامیرام سینه‌سینده‌کی زیگیللی جیدیرلارینی،
قینامیرام دؤشونده‌کی نوازشه حسرت قیز قارینی.

داغلاری قینامیرام
سرتلییی ائله همان؛
نه آخشامی ده‌ییشیب، ‌نه سحری،
تورانلیغی همان،
دومانلیغی همان.
قیناسام، ‌نانکور اولارام؛
اؤزومدن اولارام،
گؤزومدن اولارام؛
قیناسام، باخار‌کور اولارام.

جیدیرلاریندا بیتن زیگیل‌لر سنین و منیم.
اوتاندیغیندان اریین قیز قاری سئویله‌نیم، سئوه‌نیم.

داغ‌لاری قینامیرام؛
اونودولانلار قینانیلماز،
اونودانلار قینانار.
تورپاق اوگئی اولماز؛
آنا قلبی یانار،
آنا قلبی اودلانار.
آذر ۱۳۹۱